๔๓๔. จกฺกวากชาตกํ (๘)

๖๙. กาสายวตฺเถ สกุเณ วทามิ, ทุเว ทุเว นนฺทมเน [นนฺทิมเน (สี. ปี.)] จรนฺเต;

กํ อณฺฑชํ อณฺฑชา มานุเสสุ, ชาตึ ปสํสนฺติ ตทิงฺฆ พฺรูถ.

๗๐. อเมฺห มนุสฺเสสุ มนุสฺสหึส, อนุพฺพเต [อนุปุพฺพเก (ก.)] จกฺกวาเก วทนฺติ;

กลฺยาณภาวเมฺห [ภาว’มฺห (สี. ปี.)] ทิเชสุ สมฺมตา, อภิรูปา [อภีตรูปา (สี. สฺยา. ปี.)] วิจราม อณฺณเว. ( ) [(น ฆาสเหตูปิ กโรม ปาปํ) (ก.)]

๗๑. กึ อณฺณเว กานิ ผลานิ ภุญฺเช, มํสํ กุโต ขาทถ จกฺกวากา;

กึ โภชนํ ภุญฺชถ โว อโนมา [อภิณฺหํ (ก.)], พลญฺจ วณฺโณ จ อนปฺปรูปา [อนปฺปรูโป (สี. สฺยา. ปี.)].

๗๒. น อณฺณเว สนฺติ ผลานิ ธงฺก, มํสํ กุโต ขาทิตุํ จกฺกวาเก;

เสวาลภกฺขมฺห [ภกฺขิมฺห (ก.)] อปาณโภชนา [อวากโภชนา (สี. ปี.)], น ฆาสเหตูปิ กโรม ปาปํ.

๗๓. น เม อิทํ รุจฺจติ จกฺกวาก, อสฺมึ ภเว โภชนสนฺนิกาโส;

อโหสิ ปุพฺเพ ตโต เม อญฺญถา, อิจฺเจว เม วิมติ เอตฺถ ชาตา.

๗๔. อหมฺปิ มํสานิ ผลานิ ภุญฺเช, อนฺนานิ จ โลณิยเตลิยานิ;

รสํ มนุสฺเสสุ ลภามิ โภตฺตุํ, สูโรว สงฺคามมุขํ วิเชตฺวา;

น จ เม ตาทิโส วณฺโณ, จกฺกวาก ยถา ตว.

๗๕. อสุทฺธภกฺโขสิ ขณานุปาตี, กิจฺเฉน เต ลพฺภติ อนฺนปานํ;

น ตุสฺสสี รุกฺขผเลหิ ธงฺก, มํสานิ วา ยานิ สุสานมชฺเฌ.

๗๖. โย สาหเสน อธิคมฺม โภเค, ปริภุญฺชติ ธงฺก ขณานุปาตี;

ตโต อุปกฺโกสติ นํ สภาโว, อุปกฺกุฏฺโฐ วณฺณพลํ ชหาติ.

๗๗. อปฺปมฺปิ เจ นิพฺพุตึ ภุญฺชตี ยทิ, อสาหเสน อปรูปฆาตี [อสาหเสนานุปฆาติโน (ก.)];

พลญฺจ วณฺโณ จ ตทสฺส โหติ, น หิ สพฺโพ อาหารมเยน วณฺโณติ.

จกฺกวากชาตกํ อฏฺฐมํ.