๗. พีรณถมฺภวคฺโค

๒๑๑. โสมทตฺตชาตกํ (๒-๗-๑)

๑๒๑. อกาสิ โยคฺคํ ธุวมปฺปมตฺโต, สํวจฺฉรํ พีรณถมฺภกสฺมึ;

พฺยากาสิ สญฺญํ ปริสํ วิคยฺห, น นิยฺยโม ตายติ อปฺปปญฺญํ.

๑๒๒. ทฺวยํ ยาจนโก ตาต, โสมทตฺต นิคจฺฉติ;

อลาภํ ธนลาภํ วา, เอวํ ธมฺมา หิ ยาจนาติ.

โสมทตฺตชาตกํ ปฐมํ.

๒๑๒. อุจฺฉิฏฺฐภตฺตชาตกํ (๒-๗-๒)

๑๒๓. อญฺโญ อุปริโม วณฺโณ, อญฺโญ วณฺโณ จ เหฏฺฐิโม;

พฺราหฺมณี เตฺวว ปุจฺฉามิ, กึ เหฏฺฐา กิญฺจ อุปฺปริ.

๑๒๔. อหํ นโฏสฺมิ ภทฺทนฺเต, ภิกฺขโกสฺมิ อิธาคโต;

อยญฺหิ โกฏฺฐโมติณฺโณ, อยํ โส ยํ [ตฺวํ (ก.)] คเวสสีติ.

อุจฺฉิฏฺฐภตฺตชาตกํ ทุติยํ.

๒๑๓. ภรุชาตกํ (๒-๗-๓)

๑๒๕. อิสีนมนฺตรํ กตฺวา, ภรุราชาติ [กุรุราชาติ (ก.)] เม สุตํ;

อุจฺฉินฺโน สห รฏฺเฐหิ [รฏฺเฐน (สี. ปี.)], สราชา วิภวงฺคโต.

๑๒๖. ตสฺมา หิ ฉนฺทาคมนํ, นปฺปสํสนฺติ ปณฺฑิตา;

อทุฏฺฐจิตฺโต ภาเสยฺย, คิรํ สจฺจุปสํหิตนฺติ.

ภรุชาตกํ [กุรุราตกํ (ก.)] ตติยํ.

๒๑๔. ปุณฺณนทีชาตกํ (๒-๗-๔)

๑๒๗. ปุณฺณํ นทึ เยน จ เปยฺยมาหุ, ชาตํ ยวํ เยน จ คุยฺหมาหุ;

ทูรํ คตํ เยน จ อวฺหยนฺติ, โส ตฺยาคโต [ตฺยาภโต (สฺยา. ก.) ปเหฬิคาถาภาโว มนสิ กาตพฺโพ] หนฺท จ ภุญฺช พฺราหฺมณ.

๑๒๘. ยโต มํ สรตี ราชา, วายสมฺปิ ปเหตเว;

หํสา โกญฺจา มยูรา จ [หํสโกญฺจมยูรานํ (ก. อฏฺฐ. ปาฐนฺตรํ)], อสตีเยว ปาปิยาติ.

ปุณฺณนทีชาตกํ จตุตฺถํ.

๒๑๕. กจฺฉปชาตกํ (๒-๗-๕)

๑๒๙. อวธี วต อตฺตานํ, กจฺฉโป พฺยาหรํ คิรํ [กจฺฉโปว ปพฺยาหรํ (สฺยา.), กจฺฉโป โส ปพฺยาหรํ (ก.)];

สุคฺคหีตสฺมึ กฏฺฐสฺมึ, วาจาย สกิยาวธิ.

๑๓๐. เอตมฺปิ ทิสฺวา นรวีริยเสฏฺฐ, วาจํ ปมุญฺเจ กุสลํ นาติเวลํ;

ปสฺสสิ พหุภาเณน, กจฺฉปํ พฺยสนํ คตนฺติ.

กจฺฉปชาตกํ ปญฺจมํ.

๒๑๖. มจฺฉชาตกํ (๒-๗-๖)

๑๓๑. น มายมคฺคิ ตปติ, น สูโล สาธุตจฺฉิโต;

ยญฺจ มํ มญฺญเต มจฺฉี, อญฺญํ โส รติยา คโต.

๑๓๒. โส มํ ทหติ ราคคฺคิ, จิตฺตํ จูปตเปติ มํ;

ชาลิโน มุญฺจถายิรา มํ, น กาเม หญฺญเต กฺวจีติ.

มจฺฉชาตกํ ฉฏฺฐํ.

๒๑๗. เสคฺคุชาตกํ (๒-๗-๗)

๑๓๓. สพฺโพ โลโก อตฺตมโน อโหสิ, อโกวิทา คามธมฺมสฺส เสคฺคุ;

โกมาริ โก นาม [โกมาริกา นาม (ก.), โกมาริโก นาม (สฺยา. ปี.)] ตวชฺช ธมฺโม, ยํ ตฺวํ คหิตา ปวเน ปโรทสิ.

๑๓๔. โย ทุกฺขผุฏฺฐาย ภเวยฺย ตาณํ, โส เม ปิตา ทุพฺภิ วเน กโรติ;

สา กสฺส กนฺทามิ วนสฺส มชฺเฌ, โย ตายิตา โส สหสํ กโรตีติ.

เสคฺคุชาตกํ สตฺตมํ.

๒๑๘. กูฏวาณิชชาตกํ (๒-๗-๘)

๑๓๕. สฐสฺส สาเฐยฺยมิทํ สุจินฺติตํ, ปจฺโจฑฺฑิตํ ปฏิกูฏสฺส กูฏํ;

ผาลญฺเจ ขาเทยฺยุํ [อเทยฺยุํ (สี. ปี.)] มูสิกา, กสฺมา กุมารํ กุลลา น [โน (สี. สฺยา. ปี.)] หเรยฺยุํ.

๑๓๖. กูฏสฺส หิ สนฺติ [สนฺตีธ (ก.)] กูฏกูฏา, ภวติ [ภวนฺติ (ก.)] จาปิ นิกติโน นิกตฺยา;

เทหิ ปุตฺตนฏฺฐ ผาลนฏฺฐสฺส ผาลํ, มา เต ปุตฺตมหาสิ ผาลนฏฺโฐติ.

กูฏวาณิชชาตกํ อฏฺฐมํ.

๒๑๙. ครหิตชาตกํ (๒-๗-๙)

๑๓๗. หิรญฺญํ เม สุวณฺณํ เม, เอสา รตฺตึ ทิวา กถา;

ทุมฺเมธานํ มนุสฺสานํ, อริยธมฺมํ อปสฺสตํ.

๑๓๘. เทฺว เทฺว คหปตโย เคเห, เอโก ตตฺถ อมสฺสุโก;

ลมฺพตฺถโน เวณิกโต, อโถ องฺกิตกณฺณโก;

กีโต ธเนน พหุนา, โส ตํ วิตุทเต ชนนฺติ.

ครหิตชาตกํ นวมํ.

๒๒๐. ธมฺมธชชาตกํ (๒-๗-๑๐)

๑๓๙. สุขํ ชีวิตรูโปสิ, รฏฺฐา วิวนมาคโต;

โส เอกโก รุกฺขมูเล [อรญฺญสฺมึ (สี. สฺยา. ปี.)], กปโณ วิย ฌายสิ.

๑๔๐. สุขํ ชีวิตรูโปสฺมิ, รฏฺฐา วิวนมาคโต;

โส เอกโก รุกฺขมูเล, กปโณ วิย ฌายามิ;

สตํ ธมฺมํ อนุสฺสรํติ.

ธมฺมธชชาตกํ ทสมํ.

พีรณถมฺภวคฺโค สตฺตโม.

ตสฺสุทฺทานํ –

อถ พีรณถมฺภวโร จ นโฏ, ภรุราชวรุตฺตมปุณฺณนที;

พหุภาณิ อคฺคิปวเน มูสิกา, สหลมฺพตฺถโน กปเณน ทสาติ.