๕. รุหกวคฺโค

๑๙๑. รุหกชาตกํ (๒-๕-๑)

๘๑. อปิ [อมฺโภ (สฺยา. ก. สี.)] รุหก ฉินฺนาปิ, ชิยา สนฺธียเต ปุน;

สนฺธียสฺสุ ปุราณิยา, มา โกธสฺส วสํ คมิ.

๘๒. วิชฺชมาเนสุ วาเกสุ [วิชฺชมานาสุ มรุวาสุ (สี.), วิชฺชมานาสุ มรูทฺวาสุ (ปี.)], วิชฺชมาเนสุ การิสุ;

อญฺญํ ชิยํ กริสฺสามิ, อลญฺเญว ปุราณิยาติ.

รุหกชาตกํ ปฐมํ.

๑๙๒. สิริกาฬกณฺณิชาตกํ (๒-๕-๒)

๘๓. อิตฺถี สิยา รูปวตี, สา จ สีลวตี สิยา;

ปุริโส ตํ น อิจฺเฉยฺย, สทฺทหาสิ มโหสธ.

๘๔. สทฺทหามิ มหาราช, ปุริโส ทุพฺภโค สิยา;

สิรี จ กาฬกณฺณี จ, น สเมนฺติ กุทาจนนฺติ.

สิริกาฬกณฺณิชาตกํ ทุติยํ.

๑๙๓. จูฬปทุมชาตกํ (๒-๕-๓)

๘๕. อยเมว สา อหมปิ [อหมฺปิ (สี. สฺยา. ปี.), อหสฺมิ (ก.)] โส อนญฺโญ, อยเมว โส หตฺถจฺฉินฺโน อนญฺโญ;

ยมาห ‘‘โกมารปตี มม’’นฺติ, วชฺฌิตฺถิโย นตฺถิ อิตฺถีสุ สจฺจํ.

๘๖. อิมญฺจ ชมฺมํ มุสเลน หนฺตฺวา, ลุทฺทํ ฉวํ ปรทารูปเสวึ;

อิมิสฺสา จ นํ ปาปปติพฺพตาย, ชีวนฺติยา ฉินฺทถ กณฺณนาสนฺติ.

จูฬปทุมชาตกํ ตติยํ.

๑๙๔. มณิโจรชาตกํ (๒-๕-๔)

๘๗. น สนฺติ เทวา ปวสนฺติ นูน, น หิ นูน สนฺติ อิธ โลกปาลา;

สหสา กโรนฺตานมสญฺญตานํ, น หิ นูน สนฺตี ปฏิเสธิตาโร.

๘๘. อกาเล วสฺสตี ตสฺส, กาเล ตสฺส น วสฺสติ;

สคฺคา จ จวติ ฐานา, นนุ โส ตาวตา หโตติ.

มณิโจรชาตกํ จตุตฺถํ.

๑๙๕. ปพฺพตูปตฺถรชาตกํ (๒-๕-๕)

๘๙. ปพฺพตูปตฺถเร [ปพฺพตปตฺถเร (สี. สฺยา. ปี.)] รมฺเม, ชาตา โปกฺขรณี สิวา;

ตํ สิงฺคาโล อปาปายิ [อปาปาสิ (สี. สฺยา. ปี.)], ชานํ สีเหน รกฺขิตํ.

๙๐. ปิวนฺติ เจ [ปิวนฺติ เว (สี.), ปิวนฺติว (ปี.), ปิวนฺเตว (?)] มหาราช, สาปทานิ มหานทึ;

น เตน อนที โหติ, ขมสฺสุ ยทิ เต ปิยาติ.

ปพฺพตูปตฺถร [ปพฺพตปตฺถร (สี. สฺยา. ปี.)] ชาตกํ ปญฺจมํ.

๑๙๖. วลาหกสฺสชาตกํ (๒-๕-๖)

๙๑. เย น กาหนฺติ โอวาทํ, นรา พุทฺเธน เทสิตํ;

พฺยสนํ เต คมิสฺสนฺติ, รกฺขสีหิว วาณิชา.

๙๒. เย จ กาหนฺติ โอวาทํ, นรา พุทฺเธน เทสิตํ;

โสตฺถึ ปารํ คมิสฺสนฺติ, วลาเหเนว [วาลาเหเนว (สี. ปี.)] วาณิชาติ.

วลาหกสฺส [วาลาหสฺส (สี. ปี.)] ชาตกํ ฉฏฺฐํ.

๑๙๗. มิตฺตามิตฺตชาตกํ (๒-๕-๗)

๙๓. น นํ อุมฺหยเต ทิสฺวา, น จ นํ ปฏินนฺทติ;

จกฺขูนิ จสฺส น ททาติ, ปฏิโลมญฺจ วตฺตติ.

๙๔. เอเต ภวนฺติ อาการา, อมิตฺตสฺมึ ปติฏฺฐิตา;

เยหิ อมิตฺตํ ชาเนยฺย, ทิสฺวา สุตฺวา จ ปณฺฑิโตติ.

มิตฺตามิตฺตชาตกํ สตฺตมํ.

๑๙๘. ราธชาตกํ (๒-๕-๘)

๙๕. ปวาสา อาคโต ตาต, อิทานิ นจิราคโต;

กจฺจินฺนุ ตาต เต มาตา, น อญฺญมุปเสวติ.

๙๖. น โข ปเนตํ สุภณํ, คิรํ สจฺจุปสํหิตํ;

สเยถ โปฏฺฐปาโทว, มุมฺมุเร [มุมฺมุเร (สฺยา.), มํ ปุเร (ก.) มุมฺมุรสทฺโท ถุสคฺคิมฺหิ กุกฺกุเฬ จ วตฺตตีติ สกฺกตาภิธาเนสุ] อุปกูถิโตติ [อุปกูสิโตติ (สี. สฺยา. ปี.), อุปกูลิโต (ก.)].

ราธชาตกํ อฏฺฐมํ.

๑๙๙. คหปติชาตกํ (๒-๕-๙)

๙๗. อุภยํ เม น ขมติ, อุภยํ เม น รุจฺจติ;

ยาจายํ โกฏฺฐโมติณฺณา, นาทฺทสํ อิติ ภาสติ.

๙๘. ตํ ตํ คามปติ พฺรูมิ, กทเร อปฺปสฺมิ ชีวิเต;

เทฺว มาเส สงฺครํ กตฺวา [การํ กตฺวาน (สี. ปี.), สํกรํ กตฺวา (ก.)], มํสํ ชรคฺควํ กิสํ;

อปฺปตฺตกาเล โจเทสิ, ตมฺปิ มยฺหํ น รุจฺจตีติ.

คหปติชาตกํ นวมํ.

๒๐๐. สาธุสีลชาตกํ (๒-๕-๑๐)

๙๙. สรีรทพฺยํ วุฑฺฒพฺยํ [วทฺธพฺยํ (สี. ปี.)], โสชจฺจํ สาธุสีลิยํ;

พฺราหฺมณํ เตว ปุจฺฉาม, กนฺนุ เตสํ วนิมฺหเส [วณิมฺหเส (สี. ปี.)].

๑๐๐. อตฺโถ อตฺถิ สรีรสฺมึ, วุฑฺฒพฺยสฺส นโม กเร;

อตฺโถ อตฺถิ สุชาตสฺมึ, สีลํ อสฺมาก รุจฺจตีติ.

สาธุสีลชาตกํ ทสมํ.

รุหกวคฺโค ปญฺจโม.

ตสฺสุทฺทานํ –

อปิรุหก รูปวตี มุสโล, ปวสนฺติ สปญฺจมโปกฺขรณี;

อถ มุตฺติมวาณิช อุมฺหยเต, จิรอาคต โกฏฺฐ สรีร ทสาติ.