๔. อสทิสวคฺโค

๑๘๑. อสทิสชาตกํ (๒-๔-๑)

๖๑. ธนุคฺคโห อสทิโส, ราชปุตฺโต มหพฺพโล;

ทูเรปาตี อกฺขณเวธี, มหากายปฺปทาลโน.

๖๒. สพฺพามิตฺเต รณํ กตฺวา, น จ กญฺจิ วิเหฐยิ;

ภาตรํ โสตฺถึ กตฺวาน, สํยมํ อชฺฌุปาคมีติ.

อสทิสชาตกํ ปฐมํ.

๑๘๒. สงฺคามาวจรชาตกํ (๒-๔-๒)

๖๓. สงฺคามาวจโร สูโร, พลวา อิติ วิสฺสุโต;

กึ นุ โตรณมาสชฺช, ปฏิกฺกมสิ กุญฺชร.

๖๔. โอมทฺท ขิปฺปํ ปลิฆํ, เอสิกานิ จ อพฺพห [อุพฺพห (สฺยา.), อพฺภุห (ก.)];

โตรณานิ จ มทฺทิตฺวา, ขิปฺปํ ปวิส กุญฺชราติ.

สงฺคามาวจรชาตกํ ทุติยํ.

๑๘๓. วาโลทกชาตกํ (๒-๔-๓)

๖๕. วาโลทกํ อปฺปรสํ นิหีนํ, ปิตฺวา [ปีตฺวา (สี. ปี.)] มโท ชายติ คทฺรภานํ;

อิมญฺจ ปิตฺวาน รสํ ปณีตํ, มโท น สญฺชายติ สินฺธวานํ.

๖๖. อปฺปํ ปิวิตฺวาน นิหีนชจฺโจ, โส มชฺชตี เตน ชนินฺท ปุฏฺโฐ [ผุฏฺโฐ (สี. สฺยา.), มุฏฺโฐ (ก.)];

โธรยฺหสีลี จ กุลมฺหิ ชาโต, น มชฺชตี อคฺครสํ ปิวิตฺวาติ.

วาโลทกชาตกํ ตติยํ.

๑๘๔. คิริทตฺตชาตกํ (๒-๔-๔)

๖๗. ทูสิโต คิริทตฺเตน [คิริทนฺเตน (ปี.)], หโย สามสฺส ปณฺฑโว;

โปราณํ ปกตึ หิตฺวา, ตสฺเสวานุวิธิยฺยติ [นุวิธียติ (สี. ปี.)].

๖๘. สเจ จ ตนุโช โปโส, สิขราการ [สิงฺคาราการ (สฺยา.)] กปฺปิโต;

อานเน นํ [ตํ (สี. สฺยา. ปี.)] คเหตฺวาน, มณฺฑเล ปริวตฺตเย;

ขิปฺปเมว ปหนฺตฺวาน, ตสฺเสวานุวิธิยฺยตีติ.

คิริทตฺตชาตกํ จตุตฺถํ.

๑๘๕. อนภิรติชาตกํ (๒-๔-๕)

๖๙. ยโถทเก อาวิเล อปฺปสนฺเน, น ปสฺสติ สิปฺปิกสมฺพุกญฺจ;

สกฺขรํ วาลุกํ มจฺฉคุมฺพํ, เอวํ อาวิลมฺหิ [อาวิเล หิ (สี.)] จิตฺเต;

น ปสฺสติ อตฺตทตฺถํ ปรตฺถํ.

๗๐. ยโถทเก อจฺเฉ วิปฺปสนฺเน, โส ปสฺสติ สิปฺปิกสมฺพุกญฺจ;

สกฺขรํ วาลุกํ มจฺฉคุมฺพํ, เอวํ อนาวิลมฺหิ จิตฺเต;

โส ปสฺสติ อตฺตทตฺถํ ปรตฺถนฺติ.

อนภิรติชาตกํ ปญฺจมํ.

๑๘๖. ทธิวาหนชาตกํ (๒-๔-๖)

๗๑. วณฺณคนฺธรสูเปโต, อมฺโพยํ อหุวา ปุเร;

ตเมว ปูชํ ลภมาโน, เกนมฺโพ กฏุกปฺผโล.

๗๒. ปุจิมนฺทปริวาโร, อมฺโพ เต ทธิวาหน;

มูลํ มูเลน สํสฏฺฐํ, สาขา สาขา [สาขํ (สฺยา. ก.)] นิเสวเร [นิวีสเร (ก.)];

อสาตสนฺนิวาเสน, เตนมฺโพ กฏุกปฺผโลติ.

ทธิวาหนชาตกํ ฉฏฺฐํ.

๑๘๗. จตุมฏฺฐชาตกํ (๒-๔-๗)

๗๓. อุจฺเจ วิฏภิมารุยฺห, มนฺตยโวฺห รโหคตา;

นีเจ โอรุยฺห มนฺตโวฺห, มิคราชาปิ โสสฺสติ.

๗๔. ยํ สุวณฺโณ สุวณฺเณน [ยํ สุปณฺโณ สุปณฺเณน (สี. สฺยา. ปี.)], เทโว เทเวน มนฺตเย;

กึ เตตฺถ จตุมฏฺฐสฺส, พิลํ ปวิส ชมฺพุกาติ.

จตุมฏฺฐชาตกํ สตฺตมํ.

๑๘๘. สีหโกตฺถุชาตกํ (๒-๔-๘)

๗๕. สีหงฺคุลี สีหนโข, สีหปาทปติฏฺฐิโต;

โส สีโห สีหสงฺฆมฺหิ, เอโก นทติ อญฺญถา.

๗๖. มา ตฺวํ นทิ ราชปุตฺต, อปฺปสทฺโท วเน วส;

สเรน โข [มา (ก.)] ตํ ชาเนยฺยุํ, น หิ เต เปตฺติโก สโรติ.

สีหโกตฺถุชาตกํ อฏฺฐมํ.

๑๘๙. สีหจมฺมชาตกํ (๒-๔-๙)

๗๗. เนตํ สีหสฺส นทิตํ, น พฺยคฺฆสฺส น [พฺยคฺฆสฺส น จ (ก.)] ทีปิโน;

ปารุโต สีหจมฺเมน, ชมฺโม นทติ คทฺรโภ.

๗๘. จิรมฺปิ โข ตํ ขาเทยฺย, คทฺรโภ หริตํ ยวํ;

ปารุโต สีหจมฺเมน, รวมาโนว ทูสยีติ.

สีหจมฺมชาตกํ นวมํ.

๑๙๐. สีลานิสํสชาตกํ (๒-๔-๑๐)

๗๙. ปสฺส สทฺธาย สีลสฺส, จาคสฺส จ อยํ ผลํ;

นาโค นาวาย วณฺเณน, สทฺธํ วหตุปาสกํ.

๘๐. สพฺภิเรว สมาเสถ, สพฺภิ กุพฺเพถ สนฺถวํ;

สตญฺหิ สนฺนิวาเสน, โสตฺถึ คจฺฉติ นฺหาปิโตติ.

สีลานิสํสชาตกํ ทสมํ.

อสทิสวคฺโค จตุตฺโถ.

ตสฺสุทฺทานํ –

ธนุคฺคห กุญฺชร อปฺปรโส, คิริทตฺตมนาวิลจิตฺตวรํ;

ทธิวาหน ชมฺพูก สีหนโข, หริตยว นาควเรน ทสาติ.