౮. ఉపక్ఖటసిక్ఖాపదం

౫౨౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరో పురిసో పజాపతిం ఏతదవోచ – ‘‘అయ్యం ఉపనన్దం చీవరేన అచ్ఛాదేస్సామీ’’తి. అస్సోసి ఖో అఞ్ఞతరో పిణ్డచారికో భిక్ఖు తస్స పురిసస్స ఇమం వాచం భాసమానస్స. అథ ఖో సో భిక్ఖు యేనాయస్మా ఉపనన్దో సక్యపుత్తో తేనుపసఙ్కమి; ఉపసఙ్కమిత్వా ఆయస్మన్తం ఉపనన్దం సక్యపుత్తం ఏతదవోచ – ‘‘మహాపుఞ్ఞోసి త్వం, ఆవుసో ఉపనన్ద, అముకస్మిం ఓకాసే అఞ్ఞతరో పురిసో పజాపతిం ఏతదవోచ – ‘‘అయ్యం ఉపనన్దం చీవరేన అచ్ఛాదేస్సామీ’’’తి. ‘‘అత్థావుసో, మం సో ఉపట్ఠాకో’’తి. అథ ఖో ఆయస్మా ఉపనన్దో సక్యపుత్తో యేన సో పురిసో తేనుపసఙ్కమి; ఉపసఙ్కమిత్వా తం పురిసం ఏతదవోచ – ‘‘సచ్చం కిర మం త్వం, ఆవుసో, చీవరేన అచ్ఛాదేతుకామోసీ’’తి? ‘‘అపి మేయ్య, ఏవం హోతి – ‘అయ్యం ఉపనన్దం చీవరేన అచ్ఛాదేస్సామీ’’’తి. ‘‘సచే ఖో మం త్వం, ఆవుసో, చీవరేన అచ్ఛాదేతుకామోసి, ఏవరూపేన చీవరేన అచ్ఛాదేహి. క్యాహం తేన అచ్ఛన్నోపి కరిస్సామి యాహం న పరిభుఞ్జిస్సామీ’’తి.

అథ ఖో సో పురిసో ఉజ్ఝాయతి ఖియ్యతి విపాచేతి – ‘‘మహిచ్ఛా ఇమే సమణా సక్యపుత్తియా అసన్తుట్ఠా. నయిమే సుకరా చీవరేన అచ్ఛాదేతుం. కథఞ్హి నామ అయ్యో ఉపనన్దో మయా పుబ్బే అప్పవారితో మం ఉపసఙ్కమిత్వా చీవరే వికప్పం ఆపజ్జిస్సతీ’’తి! అస్సోసుం ఖో భిక్ఖూ తస్స పురిసస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయ్యన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో పుబ్బే అప్పవారితో గహపతికం ఉపసఙ్కమిత్వా చీవరే వికప్పం ఆపజ్జిస్సతీ’’తి! అథ ఖో తే భిక్ఖూ ఆయస్మన్తం ఉపనన్దం సక్యపుత్తం అనేకపరియాయేన విగరహిత్వా భగవతో ఏతమత్థం ఆరోచేసుం …పే… ‘‘సచ్చం కిర త్వం, ఉపనన్ద, పుబ్బే అప్పవారితో గహపతికం ఉపసఙ్కమిత్వా చీవరే వికప్పం ఆపజ్జసీ’’తి? ‘‘సచ్చం, భగవా’’తి. ‘‘ఞాతకో తే, ఉపనన్ద, అఞ్ఞాతకో’’తి? ‘‘అఞ్ఞాతకో, భగవా’’తి. ‘‘అఞ్ఞాతకో, మోఘపురిస, అఞ్ఞాతకస్స న జానాతి పతిరూపం వా అప్పతిరూపం వా సన్తం వా అసన్తం వా. తత్థ నామ త్వం, మోఘపురిస, పుబ్బే అప్పవారితో అఞ్ఞాతకం గహపతికం ఉపసఙ్కమిత్వా చీవరే వికప్పం ఆపజ్జిస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౨౮. ‘‘భిక్ఖుం పనేవ ఉద్దిస్స అఞ్ఞాతకస్స గహపతిస్స వా గహపతానియా వా చీవరచేతాపన్నం [చీవరచేతాపనం (స్యా.)] ఉపక్ఖటం హోతి – ‘ఇమినా చీవరచేతాపన్నేన చీవరం చేతాపేత్వా ఇత్థన్నామం భిక్ఖుం చీవరేన అచ్ఛాదేస్సామీ’తి; తత్ర చే సో భిక్ఖు పుబ్బే అప్పవారితో ఉపసఙ్కమిత్వా చీవరే వికప్పం ఆపజ్జేయ్య – ‘సాధు వత మం ఆయస్మా ఇమినా చీవరచేతాపన్నేన ఏవరూపం వా ఏవరూపం వా చీవరం చేతాపేత్వా అచ్ఛాదేహీ’తి, కల్యాణకమ్యతం ఉపాదాయ, నిస్సగ్గియం పాచిత్తియ’’న్తి.

౫౨౯. భిక్ఖుం పనేవ ఉద్దిస్సాతి భిక్ఖుస్సత్థాయ, భిక్ఖుం ఆరమ్మణం కరిత్వా, భిక్ఖుం అచ్ఛాదేతుకామో.

అఞ్ఞాతకో నామ మాతితో వా పితితో వా యావ సత్తమా పితామహయుగా అసమ్బద్ధో.

గహపతి నామ యో కోచి అగారం అజ్ఝావసతి.

గహపతానీ నామ యా కాచి అగారం అజ్ఝావసతి.

చీవరచేతాపన్నం నామ హిరఞ్ఞం వా సువణ్ణం వా ముత్తా వా మణి వా పవాళో వా ఫలికో వా పటకో వా సుత్తం వా కప్పాసో వా.

ఇమినా చీవరచేతాపన్నేనాతి పచ్చుపట్ఠితేన.

చేతాపేత్వాతి పరివత్తేత్వా.

అచ్ఛాదేస్సామీతి దస్సామి.

తత్ర చే సో భిక్ఖూతి యం భిక్ఖుం ఉద్దిస్స చీవరచేతాపన్నం ఉపక్ఖటం హోతి సో భిక్ఖు.

పుబ్బే అప్పవారితోతి పుబ్బే అవుత్తో హోతి – ‘‘కీదిసేన తే, భన్తే, చీవరేన అత్థో, కీదిసం తే చీవరం చేతాపేమీ’’తి?

ఉపసఙ్కమిత్వాతి ఘరం గన్త్వా యత్థ కత్థచి ఉపసఙ్కమిత్వా .

చీవరే వికప్పం ఆపజ్జేయ్యాతి ఆయతం వా హోతు విత్థతం వా అప్పితం వా సణ్హం వా.

ఇమినా చీవరచేతాపన్నేనాతి పచ్చుపట్ఠితేన.

ఏవరూపం వా ఏవరూపం వాతి. ఆయతం వా విత్థతం వా అప్పితం వా సణ్హం వా.

చేతాపేత్వాతి పరివత్తేత్వా.

అచ్ఛాదేహీతి దజ్జేహి.

కల్యాణకమ్యతం ఉపాదాయాతి సాధత్థికో [సాధుత్థికో (స్యా.)] మహగ్ఘత్థికో. తస్స వచనేన ఆయతం వా విత్థతం వా అప్పితం వా సణ్హం వా చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, చీవరం పుబ్బే అప్పవారితో అఞ్ఞాతకం గహపతికం ఉపసఙ్కమిత్వా చీవరే వికప్పం ఆపన్నం నిస్సగ్గియం, ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౩౦. అఞ్ఞాతకే అఞ్ఞాతకసఞ్ఞీ పుబ్బే అప్పవారితో గహపతికం ఉపసఙ్కమిత్వా చీవరే వికప్పం ఆపజ్జతి, నిస్సగ్గియం పాచిత్తియం. అఞ్ఞాతకే వేమతికో పుబ్బే అప్పవారితో గహపతికం ఉపసఙ్కమిత్వా చీవరే వికప్పం ఆపజ్జతి, నిస్సగ్గియం పాచిత్తియం. అఞ్ఞాతకే ఞాతకసఞ్ఞీ పుబ్బే అప్పవారితో గహపతికం ఉపసఙ్కమిత్వా చీవరే వికప్పం ఆపజ్జతి, నిస్సగ్గియం పాచిత్తియం.

ఞాతకే అఞ్ఞాతకసఞ్ఞీ, ఆపత్తి దుక్కటస్స. ఞాతకే వేమతికో, ఆపత్తి దుక్కటస్స. ఞాతకే ఞాతకసఞ్ఞీ, అనాపత్తి.

౫౩౧. అనాపత్తి ఞాతకానం, పవారితానం, అఞ్ఞస్సత్థాయ, అత్తనో ధనేన, మహగ్ఘం చేతాపేతుకామస్స అప్పగ్ఘం చేతాపేతి, ఉమ్మత్తకస్స, ఆదికమ్మికస్సాతి.

ఉపక్ఖటసిక్ఖాపదం నిట్ఠితం అట్ఠమం.