౬. సుత్తవిఞ్ఞత్తిసిక్ఖాపదం

౬౩౬. తేన సమయేన బుద్ధో భగవా రాజగహే విహరతి వేళువనే కలన్దకనివాపే. తేన ఖో పన సమయేన ఛబ్బగ్గియా భిక్ఖూ చీవరకారసమయే బహుం సుత్తం విఞ్ఞాపేసుం. కతేపి చీవరే బహుం సుత్తం అవసిట్ఠం హోతి. అథ ఖో ఛబ్బగ్గియానం భిక్ఖూనం ఏతదహోసి – ‘‘హన్ద మయం, ఆవుసో, అఞ్ఞమ్పి సుత్తం విఞ్ఞాపేత్వా తన్తవాయేహి చీవరం వాయాపేమా’’తి. అథ ఖో ఛబ్బగ్గియా భిక్ఖూ అఞ్ఞమ్పి సుత్తం విఞ్ఞాపేత్వా తన్తవాయేహి చీవరం వాయాపేసుం. వీతేపి చీవరే బహుం సుత్తం అవసిట్ఠం హోతి. దుతియమ్పి ఖో ఛబ్బగ్గియా భిక్ఖూ అఞ్ఞమ్పి సుత్తం విఞ్ఞాపేత్వా తన్తవాయేహి చీవరం వాయాపేసుం. వీతేపి చీవరే బహుం సుత్తం అవసిట్ఠం హోతి. తతియమ్పి ఖో ఛబ్బగ్గియా భిక్ఖూ అఞ్ఞమ్పి సుత్తం విఞ్ఞాపేత్వా తన్తవాయేహి చీవరం వాయాపేసుం. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా సామం సుత్తం విఞ్ఞాపేత్వా తన్తవాయేహి చీవరం వాయాపేస్సన్తీ’’తి!

అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ సామం సుత్తం విఞ్ఞాపేత్వా తన్తవాయేహి చీవరం వాయాపేస్సన్తీ’’తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, సామం సుత్తం విఞ్ఞాపేత్వా తన్తవాయేహి చీవరం వాయాపేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, సామం సుత్తం విఞ్ఞాపేత్వా తన్తవాయేహి చీవరం వాయాపేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౬౩౭. ‘‘యో పన భిక్ఖు సామం సుత్తం విఞ్ఞాపేత్వా తన్తవాయేహి చీవరం వాయాపేయ్య, నిస్సగ్గియం పాచిత్తియ’’న్తి.

౬౩౮. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

సామన్తి సయం విఞ్ఞాపేత్వా.

సుత్తం నామ ఛ సుత్తాని – ఖోమం కప్పాసికం కోసేయ్యం కమ్బలం సాణం భఙ్గం.

తన్తవాయేహీతి పేసకారేహి వాయాపేతి, పయోగే పయోగే దుక్కటం [వాయాపేతి, పయోగే దుక్కటం (స్యా.)]. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, చీవరం సామం సుత్తం విఞ్ఞాపేత్వా తన్తవాయేహి వాయాపితం నిస్సగ్గియం. ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౬౩౯. వాయాపితే వాయాపితసఞ్ఞీ, నిస్సగ్గియం పాచిత్తియం. వాయాపితే వేమతికో, నిస్సగ్గియం పాచిత్తియం. వాయాపితే అవాయాపితసఞ్ఞీ, నిస్సగ్గియం పాచిత్తియం.

అవాయాపితే వాయాపితసఞ్ఞీ, ఆపత్తి దుక్కటస్స. అవాయాపితే వేమతికో, ఆపత్తి దుక్కటస్స. అవాయాపితే అవాయాపితసఞ్ఞీ, అనాపత్తి.

౬౪౦. అనాపత్తి – చీవరం సిబ్బేతుం, ఆయోగే, కాయబన్ధనే, అంసబన్ధకే [అంసవట్టకే (సీ.)], పత్తత్థవికాయ, పరిస్సావనే, ఞాతకానం, పవారితానం, అఞ్ఞస్సత్థాయ, అత్తనో ధనేన, ఉమ్మత్తకస్స, ఆదికమ్మికస్సాతి.

సుత్తవిఞ్ఞత్తిసిక్ఖాపదం నిట్ఠితం ఛట్ఠం.