౫. చీవరఅచ్ఛిన్దనసిక్ఖాపదం

౬౩౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో భాతునో సద్ధివిహారికం భిక్ఖుం ఏతదవోచ – ‘‘ఏహావుసో, జనపదచారికం పక్కమిస్సామా’’తి. ‘‘నాహం, భన్తే, గమిస్సామి; దుబ్బలచీవరోమ్హీ’’తి. ‘‘ఏహావుసో, అహం తే చీవరం దస్సామీ’’తి తస్స చీవరం అదాసి. అస్సోసి ఖో సో భిక్ఖు – ‘‘భగవా కిర జనపదచారికం పక్కమిస్సతీ’’తి. అథ ఖో తస్స భిక్ఖునో ఏతదహోసి – ‘‘న దానాహం ఆయస్మతా ఉపనన్దేన సక్యపుత్తేన సద్ధిం జనపదచారికం పక్కమిస్సామి, భగవతా సద్ధిం జనపదచారికం పక్కమిస్సామీ’’తి. అథ ఖో ఆయస్మా ఉపనన్దో సక్యపుత్తో తం భిక్ఖుం ఏతదవోచ – ‘‘ఏహి దాని, ఆవుసో, జనపదచారికం పక్కమిస్సామా’’తి. ‘‘నాహం, భన్తే, తయా సద్ధిం జనపదచారికం పక్కమిస్సామి, భగవతా సద్ధిం జనపదచారికం పక్కమిస్సామీ’’తి. ‘‘యమ్పి త్యాహం, ఆవుసో, చీవరం అదాసిం, మయా సద్ధిం జనపదచారికం పక్కమిస్సతీ’’తి, కుపితో అనత్తమనో అచ్ఛిన్ది.

అథ ఖో సో భిక్ఖు భిక్ఖూనం ఏతమత్థం ఆరోచేసి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో భిక్ఖుస్స సామం చీవరం దత్వా కుపితో అనత్తమనో అచ్ఛిన్దిస్సతీ’’తి! అథ ఖో తే భిక్ఖూ ఆయస్మన్తం ఉపనన్దం సక్యపుత్తం అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర త్వం, ఉపనన్ద, భిక్ఖుస్స సామం చీవరం దత్వా కుపితో అనత్తమనో అచ్ఛిన్దీ’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, భిక్ఖుస్స సామం చీవరం దత్వా కుపితో అనత్తమనో అచ్ఛిన్దిస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౬౩౨. ‘‘యో పన భిక్ఖు భిక్ఖుస్స సామం చీవరం దత్వా కుపితో అనత్తమనో అచ్ఛిన్దేయ్య వా అచ్ఛిన్దాపేయ్య వా, నిస్సగ్గియం పాచిత్తియ’’న్తి.

౬౩౩. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

భిక్ఖుస్సాతి అఞ్ఞస్స భిక్ఖుస్స.

సామన్తి సయం దత్వా.

చీవరం నామ ఛన్నం చీవరానం అఞ్ఞతరం చీవరం, వికప్పనుపగం పచ్ఛిమం.

కుపితో అనత్తమనోతి అనభిరద్ధో ఆహతచిత్తో ఖిలజాతో.

అచ్ఛిన్దేయ్యాతి సయం అచ్ఛిన్దతి, నిస్సగ్గియం పాచిత్తియం [నిస్సగ్గియం హోతి (స్యా.)].

అచ్ఛిన్దాపేయ్యాతి అఞ్ఞం ఆణాపేతి, ఆపత్తి దుక్కటస్స. సకిం ఆణత్తో బహుకమ్పి అచ్ఛిన్దతి, నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, చీవరం భిక్ఖుస్స సామం దత్వా అచ్ఛిన్నం నిస్సగ్గియం ఇమాహం సఙ్ఘస్స నిస్సజ్జామీతి…పే… దదేయ్యాతి …పే… దదేయ్యున్తి…పే… ఆయస్మతో దమ్మీతి.

౬౩౪. ఉపసమ్పన్నే ఉపసమ్పన్నసఞ్ఞీ చీవరం దత్వా కుపితో అనత్తమనో అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం. ఉపసమ్పన్నే వేమతికో చీవరం దత్వా కుపితో అనత్తమనో అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం. ఉపసమ్పన్నే అనుపసమ్పన్నసఞ్ఞీ చీవరం దత్వా కుపితో అనత్తమనో అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం.

అఞ్ఞం పరిక్ఖారం దత్వా కుపితో అనత్తమనో అచ్ఛిన్దతి వా అచ్ఛిన్దాపేతి వా, ఆపత్తి దుక్కటస్స. అనుపసమ్పన్నస్స చీవరం వా అఞ్ఞం వా పరిక్ఖారం దత్వా కుపితో అనత్తమనో అచ్ఛిన్దతి వా అచ్ఛిన్దాపేతి వా, ఆపత్తి దుక్కటస్స. అనుపసమ్పన్నే ఉపసమ్పన్నసఞ్ఞీ, ఆపత్తి దుక్కటస్స. అనుపసమ్పన్నే వేమతికో, ఆపత్తి దుక్కటస్స. అనుపసమ్పన్నే అనుపసమ్పన్నసఞ్ఞీ, ఆపత్తి దుక్కటస్స.

౬౩౫. అనాపత్తి – సో వా దేతి, తస్స వా విస్ససన్తో గణ్హాతి, ఉమ్మత్తకస్స ఆదికమ్మికస్సాతి.

చీవరఅచ్ఛిన్దనసిక్ఖాపదం నిట్ఠితం పఞ్చమం.