౪. వస్సికసాటికసిక్ఖాపదం

౬౨౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భగవతా భిక్ఖూనం వస్సికసాటికా అనుఞ్ఞాతా హోతి. ఛబ్బగ్గియా భిక్ఖూ – ‘‘భగవతా వస్సికసాటికా అనుఞ్ఞాతా’’తి, పటికచ్చేవ [పటిగచ్చేవ (సీ.)] వస్సికసాటికచీవరం పరియేసన్తి, పటికచ్చేవ కత్వా నివాసేన్తి, జిణ్ణాయ వస్సికసాటికాయ నగ్గా కాయం ఓవస్సాపేన్తి. యే తే భిక్ఖూ అప్పిచ్ఛా… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ పటికచ్చేవ వస్సికసాటికచీవరం పరియేసిస్సన్తి, పటికచ్చేవ కత్వా నివాసేస్సన్తి, జిణ్ణాయ వస్సికసాటికాయ నగ్గా కాయం ఓవస్సాపేస్సన్తీ’’తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, పటికచ్చేవ వస్సికసాటికచీవరం పరియేసథ? పటికచ్చేవ కత్వా నివాసేథ? జిణ్ణాయ వస్సికసాటికాయ నగ్గా కాయం ఓవస్సాపేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే మోఘపురిసా, పటికచ్చేవ వస్సికసాటికచీవరం పరియేసిస్సథ, పటికచ్చేవ కత్వా నివాసేస్సథ, జిణ్ణాయ వస్సికసాటికాయ నగ్గా కాయం ఓవస్సాపేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౬౨౭. ‘‘మాసో సేసో గిమ్హాన’న్తి భిక్ఖునా వస్సికసాటికచీవరం పరియేసితబ్బం; ‘అద్ధమాసో సేసో గిమ్హాన’న్తి కత్వా నివాసేతబ్బం. ‘ఓరేన చే మాసో సేసో గిమ్హాన’న్తి వస్సికసాటికచీవరం పరియేసేయ్య, ‘ఓరేనద్ధమాసో సేసో గిమ్హాన’న్తి కత్వా నివాసేయ్య, నిస్సగ్గియం పాచిత్తియ’’న్తి.

౬౨౮. ‘మాసో సేసో గిమ్హాన’న్తి భిక్ఖునా వస్సికసాటికచీవరం పరియేసితబ్బన్తి. యే మనుస్సా పుబ్బేపి వస్సికసాటికచీవరం దేన్తి తే ఉపసఙ్కమిత్వా ఏవమస్సు వచనీయా – ‘‘కాలో వస్సికసాటికాయ, సమయో వస్సికసాటికాయ, అఞ్ఞేపి మనుస్సా వస్సికసాటికచీవరం దేన్తీ’’తి. న వత్తబ్బా – ‘‘దేథ మే వస్సికసాటికచీవరం, ఆహరథ మే వస్సికసాటికచీవరం, పరివత్తేథ మే వస్సికసాటికచీవరం, చేతాపేథ మే వస్సికసాటికచీవర’’న్తి.

‘అద్ధమాసో సేసో గిమ్హాన’న్తి కత్వా నివాసేతబ్బన్తి. అద్ధమాసే సేసే గిమ్హానే కత్వా నివాసేతబ్బం.

‘ఓరేన చే మాసో సేసో గిమ్హాన’న్తి అతిరేకమాసే సేస గిమ్హానే వస్సికసాటికచీవరం పరియేసతి, నిస్సగ్గియం పాచిత్తియం.

‘ఓరేనద్ధమాసో సేసో గిమ్హాన’న్తి అతిరేకద్ధమాసే సేసే గిమ్హానే కత్వా నివాసేతి, నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, వస్సికసాటికచీవరం అతిరేకమాసే సేసే గిమ్హానే పరియిట్ఠం అతిరేకద్ధమాసే సేసే గిమ్హానే కత్వా పరిదహితం నిస్సగ్గియం. ఇమాహం సఙ్ఘస్స నిస్సజ్జామీతి.…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౬౨౯. అతిరేకమాసే సేసే గిమ్హానే అతిరేకసఞ్ఞీ వస్సికసాటికచీవరం పరియేసతి, నిస్సగ్గియం పాచిత్తియం. అతిరేకమాసే సేసే గిమ్హానే వేమతికో వస్సికసాటికచీవరం పరియేసతి, నిస్సగ్గియం పాచిత్తియం. అతిరేకమాసే సేసే గిమ్హానే ఊనకసఞ్ఞీ వస్సికసాటికచీవరం పరియేసతి, నిస్సగ్గియం పాచిత్తియం.

అతిరేకద్ధమాసే సేసే గిమ్హానే అతిరేకసఞ్ఞీ కత్వా నివాసేతి, నిస్సగ్గియం పాచిత్తియం. అతిరేకద్ధమాసే సేసే గిమ్హానే వేమతికో కత్వా నివాసేతి, నిస్సగ్గియం పాచిత్తియం. అతిరేకద్ధమాసే సేసే గిమ్హానే ఊనకసఞ్ఞీ కత్వా నివాసేతి, నిస్సగ్గియం పాచిత్తియం.

సతియా వస్సికసాటికాయ నగ్గో కాయం ఓవస్సాపేతి, ఆపత్తి దుక్కటస్స. ఊనకమాసే సేసే గిమ్హానే అతిరేకసఞ్ఞీ, ఆపత్తి దుక్కటస్స. ఊనకమాసే సేసే గిమ్హానే వేమతికో, ఆపత్తి దుక్కటస్స. ఊనకమాసే సేసే గిమ్హానే ఊనకసఞ్ఞీ, అనాపత్తి.

ఊనకద్ధమాసే సేసే గిమ్హానే అతిరేకసఞ్ఞీ, ఆపత్తి దుక్కటస్స. ఊనకద్ధమాసే సేసే గిమ్హానే వేమతికో, ఆపత్తి దుక్కటస్స. ఊనకద్ధమాసే సేసే గిమ్హానే ఊనకసఞ్ఞీ, అనాపత్తి.

౬౩౦. అనాపత్తి ‘మాసో సేసో గిమ్హాన’న్తి వస్సికసాటికచీవరం పరియేసతి, ‘అద్ధమాసో సేసో గిమ్హాన’న్తి కత్వా నివాసేతి, ‘ఊనకమాసో సేసో గిమ్హాన’న్తి వస్సికసాటికచీవరం పరియేసతి, ‘ఊనకద్ధమాసో సేసో గిమ్హాన’న్తి కత్వా నివాసేతి, పరియిట్ఠాయ వస్సికసాటికాయ వస్సం ఉక్కడ్ఢియ్యతి, నివత్థాయ వస్సికసాటికాయ వస్సం ఉక్కడ్ఢియ్యతి, ధోవిత్వా నిక్ఖిపితబ్బం; సమయే నివాసేతబ్బం, అచ్ఛిన్నచీవరస్స, నట్ఠచీవరస్స, ఆపదాసు, ఉమ్మత్తకస్స, ఆదికమ్మికస్సాతి.

వస్సికసాటికసిక్ఖాపదం నిట్ఠితం చతుత్థం.