౨. ఊనపఞ్చబన్ధనసిక్ఖాపదం

౬౦౯. తేన సమయేన బుద్ధో భగవా సక్కేసు విహరతి కపిలవత్థుస్మిం నిగ్రోధారామే. తేన ఖో పన సమయేన అఞ్ఞతరేన కుమ్భకారేన భిక్ఖూ పవారితా హోన్తి – ‘‘యేసం అయ్యానం పత్తేన అత్థో అహం పత్తేనా’’తి. తేన ఖో పన సమయేన భిక్ఖూ న మత్తం జానిత్వా బహూ పత్తే విఞ్ఞాపేన్తి. యేసం ఖుద్దకా పత్తా తే మహన్తే పత్తే విఞ్ఞాపేన్తి. యేసం మహన్తా పత్తా తే ఖుద్దకే పత్తే విఞ్ఞాపేన్తి. అథ ఖో సో కుమ్భకారో భిక్ఖూనం బహూ పత్తే కరోన్తో న సక్కోతి అఞ్ఞం విక్కాయికం భణ్డం కాతుం, అత్తనాపి న యాపేతి, పుత్తదారాపిస్స కిలమన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా న మత్తం జానిత్వా బహూ పత్తే విఞ్ఞాపేస్సన్తి! అయం ఇమేసం బహూ పత్తే కరోన్తో న సక్కోతి అఞ్ఞం విక్కాయికం భణ్డం కాతుం, అత్తనాపి న యాపేతి, పుత్తదారాపిస్స కిలమన్తీ’’తి.

అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖూ న మత్తం జానిత్వా బహూ పత్తే విఞ్ఞాపేస్సన్తీ’’తి! అథ ఖో తే భిక్ఖూ తే అనేకపరియాయేన విగరహిత్వా భగవతో ఏతమత్థం ఆరోచేసుం…పే… సచ్చం కిర, భిక్ఖవే, భిక్ఖూ న మత్తం జానిత్వా బహూ పత్తే విఞ్ఞాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తే, భిక్ఖవే, మోఘపురిసా న మత్తం జానిత్వా బహూ పత్తే విఞ్ఞాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, పత్తో విఞ్ఞాపేతబ్బో. యో విఞ్ఞాపేయ్య, ఆపత్తి దుక్కటస్సా’’తి.

౬౧౦. తేన ఖో పన సమయేన అఞ్ఞతరస్స భిక్ఖునో పత్తో భిన్నో హోతి. అథ ఖో సో భిక్ఖు – ‘‘భగవతా పటిక్ఖిత్తం పత్తం విఞ్ఞాపేతు’’న్తి కుక్కుచ్చాయన్తో న విఞ్ఞాపేతి. హత్థేసు పిణ్డాయ చరతి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా హత్థేసు పిణ్డాయ చరిస్సన్తి, సేయ్యథాపి తిత్థియా’’తి! అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, నట్ఠపత్తస్స వా భిన్నపత్తస్స వా పత్తం విఞ్ఞాపేతు’’న్తి.

౬౧౧. తేన ఖో పన సమయేన ఛబ్బగ్గియా భిక్ఖూ – ‘‘భగవతా అనుఞ్ఞాతం నట్ఠపత్తస్స వా భిన్నపత్తస్స వా పత్తం విఞ్ఞాపేతు’’న్తి అప్పమత్తకేనపి భిన్నేన అప్పమత్తకేనపి ఖణ్డేన విలిఖితమత్తేనపి బహూ పత్తే విఞ్ఞాపేన్తి. అథ ఖో సో కుమ్భకారో భిక్ఖూనం తథేవ బహూ పత్తే కరోన్తో న సక్కోతి అఞ్ఞం విక్కాయికం భణ్డం కాతుం, అత్తనాపి న యాపేతి, పుత్తదారాపిస్స కిలమన్తి. మనుస్సా తథేవ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా న మత్తం జానిత్వా బహూ పత్తే విఞ్ఞాపేస్సన్తి! అయం ఇమేసం బహూ పత్తే కరోన్తో న సక్కోతి అఞ్ఞం విక్కాయికం భణ్డం కాతుం, అత్తనాపి న యాపేతి, పుత్తదారాపిస్స కిలమన్తీ’’తి.

అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ అప్పమత్తకేనపి భిన్నేన అప్పమత్తకేనపి ఖణ్డేన విలిఖితమత్తేనపి బహూ పత్తే విఞ్ఞాపేస్సన్తీ’’తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, అప్పమత్తకేనపి భిన్నేన అప్పమత్తకేనపి ఖణ్డేన విలిఖితమత్తేనపి బహూ పత్తే విఞ్ఞాపేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, అప్పమత్తకేనపి భిన్నేన అప్పమత్తకేనపి ఖణ్డేన విలిఖితమత్తేనపి బహూ పత్తే విఞ్ఞాపేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౬౧౨. ‘‘యో పన భిక్ఖు ఊనపఞ్చబన్ధనేన పత్తేన అఞ్ఞం నవం పత్తం చేతాపేయ్య, నిస్సగ్గియం పాచిత్తియం. తేన భిక్ఖునా సో పత్తో భిక్ఖుపరిసాయ నిస్సజ్జితబ్బో. యో చ తస్సా భిక్ఖుపరిసాయ పత్తపరియన్తో సో తస్స భిక్ఖునో పదాతబ్బో – ‘అయం తే, భిక్ఖు, పత్తో యావ భేదనాయ ధారేతబ్బో’తి. అయం తత్థ సామీచీ’’తి.

౬౧౩. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

ఊనపఞ్చబన్ధనో నామ పత్తో అబన్ధనో వా ఏకబన్ధనో వా ద్విబన్ధనో వా తిబన్ధనో వా చతుబన్ధనో వా. అబన్ధనోకాసో నామ పత్తో యస్స ద్వఙ్గులా రాజి న హోతి. బన్ధనోకాసో నామ పత్తో యస్స ద్వఙ్గులా రాజి హోతి. నవో నామ పత్తో విఞ్ఞత్తిం ఉపాదాయ వుచ్చతి.

చేతాపేయ్యాతి విఞ్ఞాపేతి, పయోగే దుక్కటం. పటిలాభేన నిస్సగ్గియో హోతి. సఙ్ఘమజ్ఝే నిస్సజ్జితబ్బో. సబ్బేహేవ అధిట్ఠితపత్తం గహేత్వా సన్నిపతితబ్బం. న లామకో పత్తో అధిట్ఠాతబ్బో – ‘‘మహగ్ఘం పత్తం గహేస్సామీ’’తి. సచే లామకం పత్తం అధిట్ఠేతి – ‘‘మహగ్ఘం పత్తం గహేస్సామీ’’తి, ఆపత్తి దుక్కటస్స. ఏవఞ్చ పన, భిక్ఖవే, నిస్సజ్జితబ్బో. తేన భిక్ఖునా సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖూనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అయం మే, భన్తే, పత్తో ఊనపఞ్చబన్ధనేన పత్తేన చేతాపితో నిస్సగ్గియో. ఇమాహం సఙ్ఘస్స నిస్సజ్జామీ’’తి. నిస్సజ్జిత్వా ఆపత్తి దేసేతబ్బా. బ్యత్తేన భిక్ఖునా పటిబలేన ఆపత్తి పటిగ్గహేతబ్బా. పఞ్చహఙ్గేహి సమన్నాగతో భిక్ఖు పత్తగ్గాహాపకో సమ్మన్నితబ్బో – యో న ఛన్దాగతిం గచ్ఛేయ్య, న దోసాగతిం గచ్ఛేయ్య, న మోహాగతిం గచ్ఛేయ్య, న భయాగతిం గచ్ఛేయ్య, గాహితాగాహితఞ్చ జానేయ్య. ఏవఞ్చ పన, భిక్ఖవే, సమ్మన్నితబ్బో. పఠమం భిక్ఖు యాచితబ్బో. యాచిత్వా బ్యత్తేన భిక్ఖునా పటిబలేన సఙ్ఘో ఞాపేతబ్బో –

౬౧౪. ‘‘సుణాతు మే, భన్తే, సఙ్ఘో. యది సఙ్ఘస్స పత్తకల్లం, సఙ్ఘో ఇత్థన్నామం భిక్ఖుం పత్తగ్గాహాపకం సమ్మన్నేయ్య. ఏసా ఞత్తి.

‘‘సుణాతు మే, భన్తే, సఙ్ఘో. సఙ్ఘో ఇత్థన్నామం భిక్ఖుం పత్తగ్గాహాపకం సమ్మన్నతి. యస్సాయస్మతో ఖమతి ఇత్థన్నామస్స భిక్ఖునో పత్తగ్గాహాపకస్స సమ్ముతి, సో తుణ్హస్స; యస్స నక్ఖమతి, సో భాసేయ్య.

‘‘సమ్మతో సఙ్ఘేన ఇత్థన్నామో భిక్ఖు పత్తగ్గాహాపకో. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౬౧౫. తేన సమ్మతేన భిక్ఖునా పత్తో గాహేతబ్బో. థేరో వత్తబ్బో – ‘‘గణ్హాతు, భన్తే, థేరో పత్త’’న్తి. సచే థేరో గణ్హాతి, థేరస్స పత్తో దుతియస్స గాహేతబ్బో. న చ తస్స అనుద్దయతాయ న గహేతబ్బో. యో న గణ్హేయ్య, ఆపత్తి దుక్కటస్స. అపత్తకస్స న గాహేతబ్బో. ఏతేనేవ ఉపాయేన యావ సఙ్ఘనవకా గాహేతబ్బా. యో చ తస్సా భిక్ఖుపరిసాయ పత్తపరియన్తో, సో తస్స భిక్ఖునో పదాతబ్బో – ‘‘అయం తే, భిక్ఖు, పత్తో యావ భేదనాయ ధారేతబ్బో’’తి.

తేన భిక్ఖునా సో పత్తో న అదేసే నిక్ఖిపితబ్బో, న అభోగేన భుఞ్జితబ్బో, న విస్సజ్జేతబ్బో – ‘‘కథాయం పత్తో నస్సేయ్య వా వినస్సేయ్య వా భిజ్జేయ్య వా’’తి? సచే అదేసే వా నిక్ఖిపతి అభోగేన వా భుఞ్జతి విస్సజ్జేతి వా, ఆపత్తి దుక్కటస్స.

అయం తత్థ సామీచీతి అయం తత్థ అనుధమ్మతా.

౬౧౬. అబన్ధనేన పత్తేన అబన్ధనం పత్తం చేతాపేతి, నిస్సగ్గియం పాచిత్తియం. అబన్ధనేన పత్తేన ఏకబన్ధనం పత్తం చేతాపేతి, నిస్సగ్గియం పాచిత్తియం. అబన్ధనేన పత్తేన ద్విబన్ధనం పత్తం చేతాపేతి, నిస్సగ్గియం పాచిత్తియం. అబన్ధనేన పత్తేన తిబన్ధనం పత్తం చేతాపేతి, నిస్సగ్గియం పాచిత్తియం. అబన్ధనేన పత్తేన చతుబన్ధనం పత్తం చేతాపేతి, నిస్సగ్గియం పాచిత్తియం.

ఏకబన్ధనేన పత్తేన అబన్ధనం పత్తం చేతాపేతి, నిస్సగ్గియం పాచిత్తియం. ఏకబన్ధనేన పత్తేన ఏకబన్ధనం పత్తం చేతాపేతి, నిస్సగ్గియం పాచిత్తియం. ఏకబన్ధనేన పత్తేన ద్విబన్ధనం పత్తం చేతాపేతి, నిస్సగ్గియం పాచిత్తియం. ఏకబన్ధనేన పత్తేన తిబన్ధనం పత్తం చేతాపేతి, నిస్సగ్గియం పాచిత్తియం. ఏకబన్ధనేన పత్తేన చతుబన్ధనం పత్తం చేతాపేతి, నిస్సగ్గియం పాచిత్తియం.

ద్విబన్ధనేన పత్తేన అబన్ధనం పత్తం చేతాపేతి, నిస్సగ్గియం పాచిత్తియం. ద్విబన్ధనేన పత్తేన ఏకబన్ధనం పత్తం…పే… ద్విబన్ధనం పత్తం… తిబన్ధనం పత్తం… చతుబన్ధనం పత్తం చేతాపేతి, నిస్సగ్గియం పాచిత్తియం.

తిబన్ధనేన పత్తేన అబన్ధనం పత్తం…పే… ఏకబన్ధనం పత్తం…పే… ద్విబన్ధనం పత్తం… తిబన్ధనం పత్తం… చతుబన్ధనం పత్తం చేతాపేతి, నిస్సగ్గియం పాచిత్తియం.

చతుబన్ధనేన పత్తేన అబన్ధనం పత్తం…పే… ఏకబన్ధనం పత్తం… ద్విబన్ధనం పత్తం… తిబన్ధనం పత్తం… చతుబన్ధనం పత్తం చేతాపేతి, నిస్సగ్గియం పాచిత్తియం.

అబన్ధనేన పత్తేన అబన్ధనోకాసం పత్తం చేతాపేతి, నిస్సగ్గియం పాచిత్తియం. అబన్ధనేన పత్తేన ఏకబన్ధనోకాసం పత్తం…పే… ద్విబన్ధనోకాసం పత్తం … తిబన్ధనోకాసం పత్తం… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

ఏకబన్ధనేన పత్తేన అబన్ధనోకాసం పత్తం…పే… ఏకబన్ధనోకాసం పత్తం… ద్విబన్ధనోకాసం పత్తం… తిబన్ధనోకాసం పత్తం… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

ద్విబన్ధనేన పత్తేన అబన్ధనోకాసం పత్తం…పే… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

తిబన్ధనేన పత్తేన అబన్ధనోకాసం పత్తం…పే… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

చతుబన్ధనేన పత్తేన అబన్ధనోకాసం పత్తం…పే… ఏకబన్ధనోకాసం పత్తం… ద్విబన్ధనోకాసం పత్తం… తిబన్ధనోకాసం పత్తం… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

అబన్ధనోకాసేన పత్తేన అబన్ధనం పత్తం చేతాపేతి, నిస్సగ్గియం పాచిత్తియం. అబన్ధనోకాసేన పత్తేన ఏకబన్ధనం పత్తం…పే… ద్విబన్ధనం పత్తం… తిబన్ధనం పత్తం… చతుబన్ధనం పత్తం చేతాపేతి, నిస్సగ్గియం పాచిత్తియం.

చతుబన్ధనోకాసేన పత్తేన అబన్ధనం పత్తం చేతాపేతి, నిస్సగ్గియం పాచిత్తియం. చతుబన్ధనోకాసేన పత్తేన ఏకబన్ధనం పత్తం…పే… ద్విబన్ధనం పత్తం… తిబన్ధనం పత్తం… చతుబన్ధనం పత్తం చేతాపేతి, నిస్సగ్గియం పాచిత్తియం.

అబన్ధనోకాసేన పత్తేన అబన్ధనోకాసం పత్తం…పే… ఏకబన్ధనోకాసం పత్తం… ద్విబన్ధనోకాసం పత్తం… తిబన్ధనోకాసం పత్తం… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

చతుబన్ధనోకాసేన పత్తేన అబన్ధనోకాసం పత్తం…పే… ఏకబన్ధనోకాసం పత్తం… ద్విబన్ధనోకాసం పత్తం… తిబన్ధనోకాసం పత్తం… చతుబన్ధనోకాసం పత్తం చేతాపేతి, నిస్సగ్గియం పాచిత్తియం.

౬౧౭. అనాపత్తి నట్ఠపత్తస్స, భిన్నపత్తస్స, ఞాతకానం పవారితానం, అఞ్ఞస్సత్థాయ, అత్తనో ధనేన, ఉమ్మత్తకస్స, ఆదికమ్మికస్సాతి.

ఊనపఞ్చబన్ధనసిక్ఖాపదం నిట్ఠితం దుతియం.