౭. ఏళకలోమధోవాపనసిక్ఖాపదం

౫౭౬. తేన సమయేన బుద్ధో భగవా సక్కేసు విహరతి కపిలవత్థుస్మిం నిగ్రోధారామే. తేన ఖో పన సమయేన ఛబ్బగ్గియా భిక్ఖూ భిక్ఖునీహి ఏళకలోమాని ధోవాపేన్తిపి రజాపేన్తిపి విజటాపేన్తిపి. భిక్ఖునియో ఏళకలోమాని ధోవన్తియో రజన్తియో విజటేన్తియో రిఞ్చన్తి ఉద్దేసం పరిపుచ్ఛం అధిసీలం అధిచిత్తం అధిపఞ్ఞం. అథ ఖో మహాపజాపతి గోతమీ యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితం ఖో మహాపజాపతిం గోతమిం భగవా ఏతదవోచ – ‘‘కచ్చి, గోతమి, భిక్ఖునియో అప్పమత్తా ఆతాపినియో పహితత్తా విహరన్తీ’’తి? ‘‘కుతో, భన్తే, భిక్ఖునీనం అప్పమాదో! అయ్యా ఛబ్బగ్గియా భిక్ఖునీహి ఏళకలోమాని ధోవాపేన్తిపి రజాపేన్తిపి విజటాపేన్తిపి. భిక్ఖునియో ఏళకలోమాని ధోవన్తియో రజన్తియో విజటేన్తియో రిఞ్చన్తి ఉద్దేసం పరిపుచ్ఛం అధిసీలం అధిచిత్తం అధిపఞ్ఞ’’న్తి.

అథ ఖో భగవా మహాపజాపతిం గోతమిం ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో మహాపజాపతి గోతమీ భగవతా ధమ్మియా కథాయ సన్దస్సితా సమాదపితా సముత్తేజితా సమ్పహంసితా భగవన్తం అభివాదేత్వా పదక్ఖిణం కత్వా పక్కామి. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఛబ్బగ్గియే భిక్ఖూ పటిపుచ్ఛి – ‘‘సచ్చం కిర తుమ్హే, భిక్ఖవే, భిక్ఖునీహి ఏళకలోమాని ధోవాపేథపి రజాపేథపి విజటాపేథపీ’’తి? ‘‘సచ్చం, భగవా’’తి. ‘‘ఞాతికాయో తుమ్హాకం, భిక్ఖవే, అఞ్ఞాతికాయో’’తి? ‘‘అఞ్ఞాతికాయో, భగవా’’తి. ‘‘అఞ్ఞాతకా, మోఘపురిసా, అఞ్ఞాతికానం న జానన్తి పతిరూపం వా అప్పతిరూపం వా పాసాదికం వా అపాసాదికం. తత్థ నామ తుమ్హే, మోఘపురిసా, అఞ్ఞాతికాహి భిక్ఖునీహి ఏళకలోమాని ధోవాపేస్సథపి రజాపేస్సథపి విజటాపేస్సథపి! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౭౭. ‘‘యో పన భిక్ఖు అఞ్ఞాతికాయ భిక్ఖునియా ఏళకలోమాని ధోవాపేయ్య వా రజాపేయ్య వా విజటాపేయ్య వా, నిస్సగ్గియం పాచిత్తియ’’న్తి.

౫౭౮. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

అఞ్ఞాతికా నామ మాతితో వా పితితో వా యావ సత్తమా పితామహయుగా అసమ్బద్ధా.

భిక్ఖునీ నామ ఉభతోసఙ్ఘే ఉపసమ్పన్నా.

ధోవాతి ఆణాపేతి, ఆపత్తి దుక్కటస్స. ధోతాని నిస్సగ్గియాని హోన్తి. రజాతి ఆణాపేతి, ఆపత్తి దుక్కటస్స. రత్తాని నిస్సగ్గియాని హోన్తి. విజటేహీతి ఆణాపేతి, ఆపత్తి దుక్కటస్స. విజటితాని నిస్సగ్గియాని హోన్తి. నిస్సజ్జితబ్బాని సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బాని…పే… ఇమాని మే, భన్తే, ఏళకలోమాని అఞ్ఞాతికాయ భిక్ఖునియా ధోవాపితాని నిస్సగ్గియాని. ఇమానాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౭౯. అఞ్ఞాతికాయ అఞ్ఞాతికసఞ్ఞీ ఏళకలోమాని ధోవాపేతి, నిస్సగ్గియం పాచిత్తియం. అఞ్ఞాతికాయ అఞ్ఞాతికసఞ్ఞీ ఏళకలోమాని ధోవాపేతి రజాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని ధోవాపేతి విజటాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని ధోవాపేతి రజాపేతి విజటాపేతి, నిస్సగ్గియేన ఆపత్తి ద్విన్నం దుక్కటానం.

అఞ్ఞాతికాయ అఞ్ఞాతికసఞ్ఞీ ఏళకలోమాని రజాపేతి, నిస్సగ్గియం పాచిత్తియం. అఞ్ఞాతికాయ అఞ్ఞాతికసఞ్ఞీ ఏళకలోమాని రజాపేతి విజటాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని రజాపేతి ధోవాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని రజాపేతి విజటాపేతి ధోవాపేతి, నిస్సగ్గియేన ఆపత్తి ద్విన్నం దుక్కటానం.

అఞ్ఞాతికాయ అఞ్ఞాతికసఞ్ఞీ ఏళకలోమాని విజటాపేతి, నిస్సగ్గియం పాచిత్తియం. అఞ్ఞాతికాయ అఞ్ఞాతికసఞ్ఞీ ఏళకలోమాని విజటాపేతి ధోవాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని విజటాపేతి రజాపేతి, నిస్సగ్గియేన ఆపత్తి దుక్కటస్స. అఞ్ఞాతికాయ అఞ్ఞాతికసఞ్ఞీ ఏళకలోమాని విజటాపేతి ధోవాపేతి రజాపేతి, నిస్సగ్గియేన ఆపత్తి ద్విన్నం దుక్కటానం.

౫౮౦. అఞ్ఞాతికాయ వేమతికో…పే… అఞ్ఞాతికాయ ఞాతికసఞ్ఞీ…పే… అఞ్ఞస్స ఏళకలోమాని ధోవాపేతి, ఆపత్తి దుక్కటస్స. ఏకతో ఉపసమ్పన్నాయ ధోవాపేతి, ఆపత్తి దుక్కటస్స. ఞాతికాయ అఞ్ఞాతికసఞ్ఞీ, ఆపత్తి దుక్కటస్స. ఞాతికాయ వేమతికో, ఆపత్తి దుక్కటస్స. ఞాతికాయ ఞాతికసఞ్ఞీ, అనాపత్తి.

౫౮౧. అనాపత్తి ఞాతికాయ ధావన్తియా అఞ్ఞాతికా దుతియా హోతి, అవుత్తా ధోవతి, అపరిభుత్తం కతభణ్డం ధోవాపేతి, సిక్ఖమానాయ సామణేరియా ఉమ్మత్తకస్స ఆదికమ్మికస్సాతి.

ఏళకలోమధోవాపనసిక్ఖాపదం నిట్ఠితం సత్తమం.