౬. ఏళకలోమసిక్ఖాపదం

౫౭౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరస్స భిక్ఖునో కోసలేసు జనపదే సావత్థిం గచ్ఛన్తస్స అన్తరామగ్గే ఏళకలోమాని ఉప్పజ్జింసు. అథ ఖో సో భిక్ఖు తాని ఏళకలోమాని ఉత్తరాసఙ్గేన భణ్డికం బన్ధిత్వా అగమాసి. మనుస్సా తం భిక్ఖుం పస్సిత్వా ఉప్పణ్డేసుం – ‘‘కిత్తకేన తే, భన్తే, కీతాని? కిత్తకో ఉదయో భవిస్సతీ’’తి? సో భిక్ఖు తేహి మనుస్సేహి ఉప్పణ్డియమానో మఙ్కు అహోసి. అథ ఖో సో భిక్ఖు సావత్థిం గన్త్వా తాని ఏళకలోమాని ఠితకోవ ఆసుమ్భి. భిక్ఖూ తం భిక్ఖుం ఏతదవోచుం – ‘‘కిస్స త్వం, ఆవుసో, ఇమాని ఏళకలోమాని ఠితకోవ ఆసుమ్భసీ’’తి? ‘‘తథా హి పనాహం, ఆవుసో, ఇమేసం ఏళకలోమానం కారణా మనుస్సేహి ఉప్పణ్డితో’’తి. ‘‘కీవ దూరతో పన త్వం, ఆవుసో, ఇమాని ఏళకలోమాని ఆహరీ’’తి? ‘‘అతిరేకతియోజనం, ఆవుసో’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖు అతిరేకతియోజనం ఏళకలోమాని ఆహరిస్సతీ’’తి! అథ ఖో తే భిక్ఖూ తం భిక్ఖుం అనేకపరియాయేన విగరహిత్వా భగవతో ఏతమత్థం ఆరోచేసుం…పే… సచ్చం కిర త్వం, భిక్ఖు, అతిరేకతియోజనం ఏళకలోమాని ఆహరీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, అతిరేకతియోజనం ఏళకలోమాని ఆహరిస్ససి! నేతం మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౭౨. ‘‘భిక్ఖునో పనేవ అద్ధానమగ్గప్పటిపన్నస్స ఏళకలోమాని ఉప్పజ్జయ్యుం. ఆకఙ్ఖమానేన భిక్ఖునా పటిగ్గహేతబ్బాని. పటిగ్గహేత్వా తియోజనపరమం సహత్థా హరితబ్బాని [హారేతబ్బాని (సీ. స్యా. క.)], అసన్తే హారకే. తతో చే ఉత్తరి హరేయ్య, అసన్తేపి హారకే, నిస్సగ్గియం పాచిత్తియ’’న్తి.

౫౭౩. భిక్ఖునో పనేవ అద్ధానమగ్గప్పటిపన్నస్సాతి పన్థం గచ్ఛన్తస్స.

ఏళకలోమాని ఉప్పజ్జేయ్యున్తి ఉప్పజ్జేయ్యుం సఙ్ఘతో వా గణతో వా ఞాతితో వా మిత్తతో వా పంసుకూలం వా అత్తనో వా ధనేన.

ఆకఙ్ఖమానేనాతి ఇచ్ఛమానేన పటిగ్గహేతబ్బాని.

పటిగ్గహేత్వా తియోజనపరమం సహత్థా హరితబ్బానీతి తియోజనపరమతా సహత్థా హరితబ్బాని.

అసన్తే హారకేతి నాఞ్ఞో కోచి హారకో హోతి ఇత్థీ వా పురిసో వా గహట్ఠో వా పబ్బజితో వా.

తతో చే ఉత్తరి హరేయ్య, అసన్తేపి హారకేతి పఠమం పాదం తియోజనం అతిక్కామేతి, ఆపత్తి దుక్కటస్స. దుతియం పాదం అతిక్కామేతి, నిస్సగ్గియం పాచిత్తియం [నిస్సగ్గియాని హోన్తి (స్యా.)]. అన్తోతియోజనే ఠితో బహితియోజనం పాతేతి, నిస్సగ్గియం పాచిత్తియం [నిస్సగ్గియాని హోన్తి (స్యా.)]. అఞ్ఞస్స యానే వా భణ్డే వా అజానన్తస్స పక్ఖిపిత్వా తియోజనం అతిక్కామేతి, నిస్సగ్గియాని హోన్తి. నిస్సజ్జితబ్బాని సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బాని…పే… ఇమాని మే, భన్తే, ఏళకలోమాని తియోజనం అతిక్కామితాని నిస్సగ్గియాని. ఇమానాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౭౪. అతిరేకతియోజనే అతిరేకసఞ్ఞీ అతిక్కామేతి [తియోజనం అతిక్కామేతి (స్యా.)], నిస్సగ్గియం పాచిత్తియం. అతిరేకతియోజనే వేమతికో అతిక్కామేతి [తియోజనం అతిక్కామేతి (స్యా.)], నిస్సగ్గియం పాచిత్తియం. అతిరేకతియోజనే ఊనకసఞ్ఞీ అతిక్కామేతి [తియోజనం అతిక్కామేతి (స్యా.)], నిస్సగ్గియం పాచిత్తియం.

ఊనకతియోజనే అతిరేకసఞ్ఞీ, ఆపత్తి దుక్కటస్స. ఊనకతియోజనే వేమతికో, ఆపత్తి దుక్కటస్స. ఊనకతియోజనే ఊనకసఞ్ఞీ, అనాపత్తి.

౫౭౫. అనాపత్తి తియోజనం హరతి, ఊనకతియోజనం హరతి, తియోజనం హరతిపి, పచ్చాహరతిపి, తియోజనం వాసాధిప్పాయో గన్త్వా తతో పరం హరతి, అచ్ఛిన్నం పటిలభిత్వా హరతి, నిస్సట్ఠం పటిలభిత్వా హరతి, అఞ్ఞం హరాపేతి కతభణ్డం, ఉమ్మత్తకస్స, ఆదికమ్మికస్సాతి.

ఏళకలోమసిక్ఖాపదం నిట్ఠితం ఛట్ఠం.