౪. ఛబ్బస్ససిక్ఖాపదం

౫౫౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖూ అనువస్సం సన్థతం కారాపేన్తి. తే యాచనబహులా విఞ్ఞత్తిబహులా విహరన్తి – ‘‘ఏళకలోమాని దేథ. ఏళకలోమేహి అత్థో’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా అనువస్సం సన్థతం కారాపేస్సన్తి, యాచనబహులా విఞ్ఞత్తిబహులా విహరిస్సన్తి – ‘ఏళకలోమాని దేథ, ఏళకలోమేహి అత్థో’’’తి! అమ్హాకం పన సకిం కతాని సన్థతాని పఞ్చపి ఛపి వస్సాని హోన్తి, యేసం నో దారకా ఉహదన్తిపి ఉమ్మిహన్తిపి ఉన్దూరేహిపి ఖజ్జన్తి. ఇమే పన సమణా సక్యపుత్తియా అనువస్సం సన్థతం కారాపేన్తి, యాచనబహులా విఞ్ఞత్తిబహులా విహరన్తి – ‘‘ఏళకలోమాని దేథ, ఏళకలోమేహి అత్థో’’తి!

అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖూ అనువస్సం సన్థతం కారాపేస్సన్తి, యాచనబహులా విఞ్ఞత్తిబహులా విహరిస్సన్తి – ‘ఏళకలోమాని దేథ, ఏళకలోమేహి అత్థో’’’తి! అథ ఖో తే భిక్ఖూ తే అనేకపరియాయేన విగరహిత్వా భగవతో ఏతమత్థం ఆరోచేసుం…పే… సచ్చం కిర, భిక్ఖవే, భిక్ఖూ అనువస్సం సన్థతం కారాపేన్తి, యాచనబహులా విఞ్ఞత్తిబహులా విహరన్తి – ‘ఏళకలోమాని దేథ, ఏళకలోమేహి అత్థో’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తే, భిక్ఖవే, మోఘపురిసా అనువస్సం సన్థతం కారాపేస్సన్తి, యాచనబహులా విఞ్ఞత్తిబహులా విహరిస్సన్తి – ‘ఏళకలోమాని దేథ, ఏళకలోమేహి అత్థో’తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౫౮. ‘‘నవం పన భిక్ఖునా సన్థతం కారాపేత్వా ఛబ్బస్సాని ధారేతబ్బం. ఓరేన చే ఛన్నం వస్సానం తం సన్థతం విస్సజ్జేత్వా వా అవిస్సజ్జేత్వా వా అఞ్ఞం నవం సన్థతం కారాపేయ్య, నిస్సగ్గియం పాచిత్తియ’’న్తి.

ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.

౫౫౯. తేన ఖో పన సమయేన అఞ్ఞతరో భిక్ఖు కోసమ్బియం గిలానో హోతి. ఞాతకా తస్స భిక్ఖునో సన్తికే దూతం పాహేసుం – ‘‘ఆగచ్ఛతు, భదన్తో మయం ఉపట్ఠహిస్సామా’’తి. భిక్ఖూపి ఏవమాహంసు – ‘‘గచ్ఛావుసో, ఞాతకా తం ఉపట్ఠహిస్సన్తీ’’తి. సో ఏవమాహ – ‘‘భగవతా, ఆవుసో, సిక్ఖాపదం పఞ్ఞత్తం – ‘నవం పన భిక్ఖునా సన్థతం కారాపేత్వా ఛబ్బస్సాని ధారేతబ్బ’న్తి. అహఞ్చమ్హి గిలానో, న సక్కోమి సన్థతం ఆదాయ పక్కమితుం. మయ్హఞ్చ వినా సన్థతా న ఫాసు హోతి. నాహం గమిస్సామీ’’తి. భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, గిలానస్స భిక్ఖునో సన్థతసమ్ముతిం దాతుం. ఏవఞ్చ పన, భిక్ఖవే, దాతబ్బా. తేన గిలానేన భిక్ఖునా సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖూనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘అహం, భన్తే, గిలానో. న సక్కోమి సన్థతం ఆదాయ పక్కమితుం. సోహం, భన్తే, సఙ్ఘం సన్థతసమ్ముతిం యాచామీ’తి. దుతియమ్పి యాచితబ్బా. తతియమ్పి యాచితబ్బా. బ్యత్తేన భిక్ఖునా పటిబలేన సఙ్ఘో ఞాపేతబ్బో –

౫౬౦. ‘‘సుణాతు మే, భన్తే, సఙ్ఘో. అయం ఇత్థన్నామో భిక్ఖు గిలానో. న సక్కోతి సన్థతం ఆదాయ పక్కమితుం. సో సఙ్ఘం సన్థతసమ్ముతిం యాచతి. యది సఙ్ఘస్స పత్తకల్లం, సఙ్ఘో ఇత్థన్నామస్స భిక్ఖునో సన్థతసమ్ముతిం దదేయ్య. ఏసా ఞత్తి.

‘‘సుణాతు మే, భన్తే, సఙ్ఘో. అయం ఇత్థన్నామో భిక్ఖు గిలానో. న సక్కోతి సన్థతం ఆదాయ పక్కమితుం. సో సఙ్ఘం సన్థతసమ్ముతిం యాచతి. సఙ్ఘో ఇత్థన్నామస్స భిక్ఖునో సన్థతసమ్ముతిం దేతి. యస్సాయస్మతో ఖమతి ఇత్థన్నామస్స భిక్ఖునో సన్థతసమ్ముతియా దానం, సో తుణ్హస్స; యస్స నక్ఖమతి, సో భాసేయ్య.

‘‘దిన్నా సఙ్ఘేన ఇత్థన్నామస్స భిక్ఖునో సన్థతసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౬౧. ‘‘నవం పన భిక్ఖునా సన్థతం కారాపేత్వా ఛబ్బస్సాని ధారేతబ్బం. ఓరేన చే ఛన్నం వస్సానం తం సన్థతం విస్సజ్జేత్వా వా అవిస్సజ్జేత్వా వా అఞ్ఞం నవం సన్థతం కారాపేయ్య, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియ’’న్తి.

౫౬౨. నవం నామ కరణం ఉపాదాయ వుచ్చతి.

సన్థతం నామ సన్థరిత్వా కతం హోతి అవాయిమం.

కారాపేత్వాతి కరిత్వా వా కారాపేత్వా వా.

ఛబ్బస్సాని ధారేతబ్బన్తి ఛబ్బస్సపరమతా ధారేతబ్బం.

ఓరేన చే ఛన్నం వస్సానన్తి ఊనకఛబ్బస్సాని.

తం సన్థతం విస్సజ్జేత్వాతి అఞ్ఞేసం దత్వా.

అవిస్సజ్జేత్వాతి న కస్సచి దత్వా.

అఞ్ఞత్ర భిక్ఖుసమ్ముతియాతి ఠపేత్వా భిక్ఖుసమ్ముతిం అఞ్ఞం నవం సన్థతం కరోతి వా కారాపేతి వా, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, సన్థతం ఊనకఛబ్బస్సాని కారాపితం, అఞ్ఞత్ర భిక్ఖుసమ్ముతియా, నిస్సగ్గియం. ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౬౩. అత్తనా విప్పకతం అత్తనా పరియోసాపేతి, నిస్సగ్గియం పాచిత్తియం. అత్తనా విప్పకతం పరేహి పరియోసాపేతి, నిస్సగ్గియం పాచిత్తియం. పరేహి విప్పకతం అత్తనా పరియోసాపేతి, నిస్సగ్గియం పాచిత్తియం. పరేహి విప్పకతం పరేహి పరియోసాపేతి, నిస్సగ్గియం పాచిత్తియం.

౫౬౪. అనాపత్తి ఛబ్బస్సాని కరోతి, అతిరేకఛబ్బస్సాని కరోతి, అఞ్ఞస్సత్థాయ కరోతి వా కారాపేతి వా, అఞ్ఞేన కతం పటిలభిత్వా పరిభుఞ్జతి, వితానం వా భూమత్థరణం వా సాణిపాకారం వా భిసిం వా బిబ్బోహనం వా కరోతి, భిక్ఖుసమ్ముతియా, ఉమ్మత్తకస్స, ఆదికమ్మికస్సాతి.

ఛబ్బస్ససిక్ఖాపదం నిట్ఠితం చతుత్థం.