౩. ద్వేభాగసిక్ఖాపదం

౫౫౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ – ‘‘భగవతా పటిక్ఖిత్తం సుద్ధకాళకానం ఏళకలోమానం సన్థతం కారాపేతు’’న్తి, తే థోకంయేవ ఓదాతం అన్తే ఆదియిత్వా తథేవ సుద్ధకాళకానం ఏళకలోమానం సన్థతం కారాపేన్తి. యే తే భిక్ఖూ అప్పిచ్ఛా… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ థోకంయేవ ఓదాతం అన్తే ఆదియిత్వా తథేవ సుద్ధకాళకానం ఏళకలోమానం సన్థతం కారాపేస్సన్తీ’’తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, థోకంయేవ ఓదాతం అన్తే ఆదియిత్వా తథేవ సుద్ధకాళకానం ఏళకలోమానం సన్థతం కారాపేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, థోకంయేవ ఓదాతం అన్తే ఆదియిత్వా తథేవ సుద్ధకాళకానం ఏళకలోమానం సన్థతం కారాపేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౫౩. ‘‘నవం పన భిక్ఖునా సన్థతం కారయమానేన ద్వే భాగా సుద్ధకాళకానం ఏళకలోమానం ఆదాతబ్బా తతియం ఓదాతానం చతుత్థం గోచరియానం. అనాదా చే భిక్ఖు ద్వే భాగే సుద్ధకాళకానం ఏళకలోమానం తతియం ఓదాతానం చతుత్థం గోచరియానం నవం సన్థతం కారాపేయ్య, నిస్సగ్గియం పాచిత్తియ’’న్తి.

౫౫౪. నవం నామ కరణం ఉపాదాయ వుచ్చతి.

సన్థతం నామ సన్థరిత్వా కతం హోతి అవాయిమం.

కారయమానేనాతి కరోన్తో వా కారాపేన్తో వా.

ద్వే భాగా సుద్ధకాళకానం ఏళకలోమానం ఆదాతబ్బాతి ధారయిత్వా ద్వే తులా ఆదాతబ్బా.

తతియం ఓదాతానన్తి తులం ఓదాతానం.

చతుత్థం గోచరియానన్తి తులం గోచరియానం.

అనాదా చే భిక్ఖు ద్వే భాగే సుద్ధకాళకానం ఏళకలోమానం తతియం ఓదాతానం చతుత్థం గోచరియానన్తి. అనాదియిత్వా ద్వే తులే సుద్ధకాళకానం ఏళకలోమానం తులం ఓదాతానం తులం గోచరియానం నవం సన్థతం కరోతి వా కారాపేతి వా పయోగే దుక్కటం, పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, భన్తే, సన్థతం అనాదియిత్వా ద్వే తులే సుద్ధకాళకానం ఏళకలోమానం తులం ఓదాతానం తులం గోచరియానం కారాపితం నిస్సగ్గియం. ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౫౫. అత్తనా విప్పకతం అత్తనా పరియోసాపేతి, నిస్సగ్గియం పాచిత్తియం. అత్తనా విప్పకతం పరేహి పరియోసాపేతి, నిస్సగ్గియం పాచిత్తియం. పరేహి విప్పకతం అత్తనా పరియోసాపేతి, నిస్సగ్గియం పాచిత్తియం. పరేహి విప్పకతం పరేహి పరియోసాపేతి, నిస్సగ్గియం పాచిత్తియం.

అఞ్ఞస్సత్థాయ కరోతి వా కారాపేతి వా, ఆపత్తి దుక్కటస్స. అఞ్ఞేన కతం పటిలభిత్వా పరిభుఞ్జతి, ఆపత్తి దుక్కటస్స.

౫౫౬. అనాపత్తి తులం ఓదాతానం తులం గోచరియానం ఆదియిత్వా కరోతి, బహుతరం ఓదాతానం బహుతరం గోచరియానం ఆదియిత్వా కరోతి, సుద్ధం ఓదాతానం సుద్ధం గోచరియానం ఆదియిత్వా కరోతి, వితానం వా భూమత్థరణం వా సాణిపాకారం వా భిసిం వా బిబ్బోహనం వా కరోతి, ఉమ్మత్తకస్స, ఆదికమ్మికస్సాతి.

ద్వేభాగసిక్ఖాపదం నిట్ఠితం తతియం.