౨. దుతియపారాజికం
౮౪. తేన సమయేన బుద్ధో భగవా రాజగహే విహరతి గిజ్ఝకూటే పబ్బతే. తేన ఖో పన సమయేన సమ్బహులా సన్దిట్ఠా సమ్భత్తా భిక్ఖూ ఇసిగిలిపస్సే తిణకుటియో కరిత్వా వస్సం ఉపగచ్ఛింసు. ఆయస్మాపి ధనియో కుమ్భకారపుత్తో తిణకుటికం కరిత్వా వస్సం ఉపగచ్ఛి. అథ ఖో తే భిక్ఖూ వస్సంవుట్ఠా తేమాసచ్చయేన తిణకుటియో భిన్దిత్వా తిణఞ్చ కట్ఠఞ్చ పటిసామేత్వా జనపదచారికం పక్కమింసు. ఆయస్మా పన ధనియో కుమ్భకారపుత్తో తత్థేవ వస్సం వసి, తత్థ హేమన్తం, తత్థ గిమ్హం. అథ ఖో ఆయస్మతో ధనియస్స కుమ్భకారపుత్తస్స గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు. దుతియమ్పి ఖో ఆయస్మా ధనియో కుమ్భకారపుత్తో తిణఞ్చ కట్ఠఞ్చ సంకడ్ఢిత్వా తిణకుటికం అకాసి. దుతియమ్పి ఖో ఆయస్మతో ధనియస్స కుమ్భకారపుత్తస్స గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు. తతియమ్పి ఖో ఆయస్మా ధనియో కుమ్భకారపుత్తో తిణఞ్చ కట్ఠఞ్చ సంకడ్ఢిత్వా తిణకుటికం అకాసి. తతియమ్పి ఖో ఆయస్మతో ధనియస్స కుమ్భకారపుత్తస్స గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు.
అథ ఖో ఆయస్మతో ధనియస్స కుమ్భకారపుత్తస్స ఏతదహోసి – ‘‘యావతతియకం ఖో మే గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు. అహం ఖో పన సుసిక్ఖితో అనవయో సకే ఆచరియకే కుమ్భకారకమ్మే పరియోదాతసిప్పో. యంనూనాహం సామం చిక్ఖల్లం మద్దిత్వా సబ్బమత్తికామయం కుటికం కరేయ్య’’న్తి! అథ ఖో ఆయస్మా ధనియో కుమ్భకారపుత్తో సామం చిక్ఖల్లం మద్దిత్వా సబ్బమత్తికామయం కుటికం కరిత్వా తిణఞ్చ కట్ఠఞ్చ గోమయఞ్చ సంకడ్ఢిత్వా తం కుటికం పచి. సా అహోసి కుటికా అభిరూపా దస్సనీయా పాసాదికా లోహితికా [లోహితకా (స్యా.)], సేయ్యథాపి ఇన్దగోపకో. సేయ్యథాపి నామ కిఙ్కణికసద్దో [కిఙ్కిణికసద్దో (సీ. స్యా.)] ఏవమేవం తస్సా కుటికాయ సద్దో అహోసి.
౮౫. అథ ఖో భగవా సమ్బహులేహి భిక్ఖూహి సద్ధిం గిజ్ఝకూటా పబ్బతా ఓరోహన్తో అద్దస తం కుటికం అభిరూపం దస్సనీయం పాసాదికం లోహితికం. దిస్వాన భిక్ఖూ ఆమన్తేసి – ‘‘కిం ఏతం, భిక్ఖవే, అభిరూపం దస్సనీయం పాసాదికం లోహితికం, సేయ్యథాపి ఇన్దగోపకో’’తి? అథ ఖో తే భిక్ఖూ భగవతో ఏతమత్థం ఆరోచేసుం. విగరహి బుద్ధో భగవా – ‘‘అననుచ్ఛవికం, భిక్ఖవే, తస్స మోఘపురిసస్స అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ సో, భిక్ఖవే, మోఘపురిసో సబ్బమత్తికామయం కుటికం కరిస్సతి! న హి నామ, భిక్ఖవే, తస్స మోఘపురిసస్స పాణేసు అనుద్దయా అనుకమ్పా అవిహేసా భవిస్సతి! గచ్ఛథేతం, భిక్ఖవే, కుటికం భిన్దథ. మా పచ్ఛిమా జనతా పాణేసు పాతబ్యతం ఆపజ్జి. న చ, భిక్ఖవే, సబ్బమత్తికామయా కుటికా కాతబ్బా. యో కరేయ్య, ఆపత్తి దుక్కటస్సా’’తి. ‘‘ఏవం, భన్తే’’తి, ఖో తే భిక్ఖూ భగవతో పటిస్సుణిత్వా యేన సా కుటికా తేనుపసఙ్కమింసు; ఉపసఙ్కమిత్వా తం కుటికం భిన్దింసు. అథ ఖో ఆయస్మా ధనియో కుమ్భకారపుత్తో తే భిక్ఖూ ఏతదవోచ – ‘‘కిస్స మే తుమ్హే, ఆవుసో, కుటికం భిన్దథా’’తి? ‘‘భగవా, ఆవుసో, భేదాపేతీ’’తి. ‘‘భిన్దథావుసో, సచే ధమ్మస్సామీ భేదాపేతీ’’తి.
౮౬. అథ ఖో ఆయస్మతో ధనియస్స కుమ్భకారపుత్తస్స ఏతదహోసి – ‘‘యావతతియకం ఖో మే గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు. యాపి మయా సబ్బమత్తికామయా కుటికా కతా సాపి భగవతా భేదాపితా. అత్థి చ మే దారుగహే గణకో సన్దిట్ఠో. యంనూనాహం దారుగహే గణకం దారూని యాచిత్వా దారుకుటికం కరేయ్య’’న్తి. అథ ఖో ఆయస్మా ధనియో కుమ్భకారపుత్తో యేన దారుగహే గణకో తేనుపసఙ్కమి; ఉపసఙ్కమిత్వా దారుగహే గణకం ఏతదవోచ – ‘‘యావతతియకం ఖో మే, ఆవుసో, గామం పిణ్డాయ పవిట్ఠస్స తిణహారియో కట్ఠహారియో తిణకుటికం భిన్దిత్వా తిణఞ్చ కట్ఠఞ్చ ఆదాయ అగమంసు. యాపి మయా సబ్బమత్తికామయా కుటికా కతా సాపి భగవతా భేదాపితా. దేహి మే, ఆవుసో, దారూని. ఇచ్ఛామి దారుకుటికం [దారుకుడ్డికం కుటికం (సీ.)] కాతు’’న్తి. ‘‘నత్థి, భన్తే, తాదిసాని దారూని యానాహం అయ్యస్స దదేయ్యం. అత్థి, భన్తే, దేవగహదారూని నగరపటిసఙ్ఖారికాని ఆపదత్థాయ నిక్ఖిత్తాని. సచే తాని దారూని రాజా దాపేతి హరాపేథ, భన్తే’’తి. ‘‘దిన్నాని, ఆవుసో, రఞ్ఞా’’తి. అథ ఖో దారుగహే గణకస్స ఏతదహోసి – ‘‘ఇమే ఖో సమణా సక్యపుత్తియా ధమ్మచారినో సమచారినో [సమ్మచారినో (క.)] బ్రహ్మచారినో సచ్చవాదినో సీలవన్తో కల్యాణధమ్మా. రాజాపిమేసం అభిప్పసన్నో. నారహతి అదిన్నం దిన్నన్తి వత్తు’’న్తి. అథ ఖో దారుగహే గణకో ఆయస్మన్తం ధనియం కుమ్భకారపుత్తం ఏతదవోచ – ‘‘హరాపేథ, భన్తే’’తి. అథ ఖో ఆయస్మా ధనియో కుమ్భకారపుత్తో తాని దారూని ఖణ్డాఖణ్డికం ఛేదాపేత్వా సకటేహి నిబ్బాహాపేత్వా దారుకుటికం అకాసి.
౮౭. అథ ఖో వస్సకారో బ్రాహ్మణో మగధమహామత్తో రాజగహే కమ్మన్తే అనుసఞ్ఞాయమానో యేన దారుగహే గణకో తేనుపసఙ్కమి; ఉపసఙ్కమిత్వా దారుగహే గణకం ఏతదవోచ – ‘‘యాని తాని, భణే, దేవగహదారూని నగరపటిసఙ్ఖారికాని ఆపదత్థాయ నిక్ఖిత్తాని కహం తాని దారూనీ’’తి? ‘‘తాని, సామి, దారూని దేవేన అయ్యస్స ధనియస్స కుమ్భకారపుత్తస్స దిన్నానీ’’తి. అథ ఖో వస్సకారో బ్రాహ్మణో మగధమహామత్తో అనత్తమనో అహోసి – ‘‘కథఞ్హి నామ దేవో దేవగహదారూని నగరపటిసఙ్ఖారికాని ఆపదత్థాయ నిక్ఖిత్తాని ధనియస్స కుమ్భకారపుత్తస్స దస్సతీ’’తి! అథ ఖో వస్సకారో బ్రాహ్మణో మగధమహామత్తో యేన రాజా మాగధో సేనియో బిమ్బిసారో తేనుపసఙ్కమి; ఉపసఙ్కమిత్వా రాజానం మాగధం సేనియం బిమ్బిసారం ఏతదవోచ – ‘‘సచ్చం కిర, దేవేన [సచ్చం కిర దేవ దేవేన (సీ.)] దేవగహదారూని నగరపటిసఙ్ఖారికాని ఆపదత్థాయ నిక్ఖిత్తాని ధనియస్స కుమ్భకారపుత్తస్స దిన్నానీ’’తి? ‘‘కో ఏవమాహా’’తి? ‘‘దారుగహే గణకో, దేవా’’తి. ‘‘తేన హి, బ్రాహ్మణ, దారుగహే గణకం ఆణాపేహీ’’తి. అథ ఖో వస్సకారో బ్రాహ్మణో మగధమహామత్తో దారుగహే గణకం బన్ధం [బద్ధం (సీ.)] ఆణాపేసి. అద్దస ఖో ఆయస్మా ధనియో కుమ్భకారపుత్తో దారుగహే గణకం బన్ధం నియ్యమానం. దిస్వాన దారుగహే గణకం ఏతదవోచ – ‘‘కిస్స త్వం, ఆవుసో, బన్ధో నియ్యాసీ’’తి? ‘‘తేసం, భన్తే, దారూనం కిచ్చా’’తి. ‘‘గచ్ఛావుసో, అహమ్పి ఆగచ్ఛామీ’’తి. ‘‘ఏయ్యాసి, భన్తే, పురాహం హఞ్ఞామీ’’తి.
౮౮. అథ ఖో ఆయస్మా ధనియో కుమ్భకారపుత్తో యేన రఞ్ఞో మాగధస్స సేనియస్స బిమ్బిసారస్స నివేసనం తేనుపసఙ్కమి; ఉపసఙ్కమిత్వా పఞ్ఞత్తే ఆసనే నిసీది. అథ ఖో రాజా మాగధో సేనియో బిమ్బిసారో యేనాయస్మా ధనియో కుమ్భకారపుత్తో తేనుపసఙ్కమి; ఉపసఙ్కమిత్వా ఆయస్మన్తం ధనియం కుమ్భకారపుత్తం అభివాదేత్వా ఏకమన్తం నిసీది. ఏకమన్తం నిసిన్నో ఖో రాజా మాగధో సేనియో బిమ్బిసారో ఆయస్మన్తం ధనియం కుమ్భకారపుత్తం ఏతదవోచ – ‘‘సచ్చం కిర మయా, భన్తే, దేవగహదారూని నగరపటిసఙ్ఖారికాని ఆపదత్థాయ నిక్ఖిత్తాని అయ్యస్స దిన్నానీ’’తి? ‘‘ఏవం, మహారాజా’’తి. ‘‘మయం ఖో, భన్తే, రాజానో నామ బహుకిచ్చా బహుకరణీయా, దత్వాపి న సరేయ్యామ; ఇఙ్ఘ, భన్తే, సరాపేహీ’’తి. ‘‘సరసి త్వం, మహారాజ, పఠమాభిసిత్తో ఏవరూపిం వాచం భాసితా – ‘‘దిన్నఞ్ఞేవ సమణబ్రాహ్మణానం తిణకట్ఠోదకం పరిభుఞ్జన్తూ’’తి. ‘‘సరామహం, భన్తే. సన్తి, భన్తే, సమణబ్రాహ్మణా లజ్జినో కుక్కుచ్చకా సిక్ఖాకామా. తేసం అప్పమత్తకేపి కుక్కుచ్చం ఉప్పజ్జతి. తేసం మయా సన్ధాయ భాసితం, తఞ్చ ఖో అరఞ్ఞే అపరిగ్గహితం. సో త్వం, భన్తే, తేన లేసేన దారూని అదిన్నం హరితుం మఞ్ఞసి! కథఞ్హి నామ మాదిసో సమణం వా బ్రాహ్మణం వా విజితే వసన్తం హనేయ్య వా బన్ధేయ్య వా పబ్బాజేయ్య వా! గచ్ఛ, భన్తే, లోమేన త్వం ముత్తోసి. మాస్సు పునపి ఏవరూపం అకాసీ’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘అలజ్జినో ఇమే సమణా సక్యపుత్తియా దుస్సీలా ముసావాదినో. ఇమే హి నామ ధమ్మచారినో సమచారినో బ్రాహ్మచారినో సచ్చవాదినో సీలవన్తో కల్యాణధమ్మా పటిజానిస్సన్తి! నత్థి ఇమేసం సామఞ్ఞం, నత్థి ఇమేసం బ్రహ్మఞ్ఞం. నట్ఠం ఇమేసం సామఞ్ఞం, నట్ఠం ఇమేసం బ్రహ్మఞ్ఞం. కుతో ఇమేసం సామఞ్ఞం, కుతో ఇమేసం బ్రహ్మఞ్ఞం! అపగతా ఇమే సామఞ్ఞా, అపగతా ఇమే బ్రహ్మఞ్ఞా. రాజానమ్పి ఇమే వఞ్చేన్తి, కిం పనఞ్ఞే మనుస్సే’’తి! అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా సన్తుట్ఠా లజ్జినో కుక్కుచ్చకా సిక్ఖాకామా తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ధనియో కుమ్భకారపుత్తో రఞ్ఞో దారూని అదిన్నం ఆదియిస్సతీ’’తి! అథ ఖో తే భిక్ఖూ ఆయస్మన్తం ధనియం కుమ్భకారపుత్తం అనేకపరియాయేన విగరహిత్వా భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఆయస్మన్తం ధనియం కుమ్భకారపుత్తం పటిపుచ్ఛి – ‘‘సచ్చం కిర త్వం, ధనియ, రఞ్ఞో దారూని అదిన్నం ఆదియీ’’తి? ‘‘సచ్చం, భగవా’’తి. విగరహి బుద్ధో భగవా – ‘‘అననుచ్ఛవికం, మోఘపురిస, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ త్వం, మోఘపురిస, రఞ్ఞో దారూని అదిన్నం ఆదియిస్ససి! నేతం, మోఘపురిస, అప్పసన్నానం వా పసాదాయ పసన్నానం వా భియ్యోభావాయ; అథఖ్వేతం, మోఘపురిస, అప్పసన్నానఞ్చేవ అప్పసాదాయ పసన్నానఞ్చ ఏకచ్చానం అఞ్ఞథత్తాయా’’తి.
తేన ఖో పన సమయేన అఞ్ఞతరో పురాణవోహారికో మహామత్తో భిక్ఖూసు పబ్బజితో భగవతో అవిదూరే నిసిన్నో హోతి. అథ ఖో భగవా తం భిక్ఖుం ఏతదవోచ – ‘‘కిత్తకేన ఖో భిక్ఖు రాజా మాగధో సేనియో బిమ్బిసారో చోరం గహేత్వా హనతి వా బన్ధతి వా పబ్బాజేతి వా’’తి? ‘‘పాదేన వా, భగవా, పాదారహేన వా’’తి [పాదారహేనవా అతిరేకపాదేనవాతి (స్యా.)]. తేన ఖో పన సమయేన రాజగహే పఞ్చమాసకో పాదో హోతి. అథ ఖో భగవా ఆయస్మన్తం ధనియం కుమ్భకారపుత్తం అనేకపరియాయేన విగరహిత్వా దుబ్భరతాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౮౯. ‘‘యో పన భిక్ఖు అదిన్నం థేయ్యసఙ్ఖాతం ఆదియేయ్య, యథారూపే అదిన్నాదానే రాజానో చోరం గహేత్వా హనేయ్యుం వా బన్ధేయ్యుం వా పబ్బాజేయ్యుం వా – ‘చోరోసి బాలోసి మూళ్హోసి థేనోసీ’తి, తథారూపం భిక్ఖు అదిన్నం ఆదియమానో అయమ్పి పారాజికో హోతి అసంవాసో’’తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౯౦. తేన ఖో పన సమయేన ఛబ్బగ్గియా భిక్ఖూ రజకత్థరణం గన్త్వా రజకభణ్డికం అవహరిత్వా ఆరామం హరిత్వా భాజేసుం. భిక్ఖూ ఏవమాహంసు – ‘‘మహాపుఞ్ఞత్థ తుమ్హే, ఆవుసో. బహుం తుమ్హాకం చీవరం ఉప్పన్న’’న్తి. ‘‘కుతో ఆవుసో, అమ్హాకం పుఞ్ఞం, ఇదాని మయం రజకత్థరణం గన్త్వా రజకభణ్డికం అవహరిమ్హా’’తి. ‘‘నను, ఆవుసో, భగవతా సిక్ఖాపదం పఞ్ఞత్తం. కిస్స తుమ్హే, ఆవుసో, రజకభణ్డికం అవహరిత్థా’’తి? ‘‘సచ్చం, ఆవుసో, భగవతా సిక్ఖాపదం పఞ్ఞత్తం. తఞ్చ ఖో గామే, నో అరఞ్ఞే’’తి. ‘‘నను, ఆవుసో, తథేవేతం హోతి. అననుచ్ఛవికం, ఆవుసో, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ తుమ్హే, ఆవుసో, రజకభణ్డికం అవహరిస్సథ! నేతం, ఆవుసో, అప్పసన్నానం వా పసాదాయ పసన్నానం వా భియ్యోభావాయ; అథఖ్వేతం, ఆవుసో, అప్పసన్నానఞ్చేవ అప్పసాదాయ పసన్నానఞ్చ ఏకచ్చానం అఞ్ఞథత్తాయా’’తి. అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఛబ్బగ్గియే భిక్ఖూ పటిపుచ్ఛి – ‘‘సచ్చం కిర తుమ్హే, భిక్ఖవే, రజకత్థరణం గన్త్వా రజకభణ్డికం అవహరిత్థా’’తి? ‘‘సచ్చం, భగవా’’తి. విగరహి బుద్ధో భగవా – ‘‘అననుచ్ఛవికం, మోఘపురిసా, అననులోమికం అప్పటిరూపం అస్సామణకం అకప్పియం అకరణీయం. కథఞ్హి నామ తుమ్హే, మోఘపురిసా, రజకభణ్డికం అవహరిస్సథ! నేతం, మోఘపురిసా, అప్పసన్నానం వా పసాదాయ పసన్నానం వా భియ్యోభావాయ; అథ ఖ్వేతం, మోఘపురిసా, అప్పసన్నానఞ్చేవ అప్పసాదాయ పసన్నానఞ్చ ఏకచ్చానం అఞ్ఞథత్తాయా’’తి. అథ ఖో భగవా ఛబ్బగ్గియే భిక్ఖూ అనేకపరియాయేన విగరహిత్వా దుబ్భరతాయ…పే… వీరియారమ్భస్స వణ్ణం భాసిత్వా భిక్ఖూనం తదనుచ్ఛవికం తదనులోమికం ధమ్మిం కథం కత్వా భిక్ఖూ ఆమన్తేసి…పే… ‘‘ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౯౧. ‘‘యో పన భిక్ఖు గామా వా అరఞ్ఞా వా అదిన్నం థేయ్యసఙ్ఖాతం ఆదియేయ్య, యథారూపే అదిన్నాదానే రాజానో చోరం గహేత్వా హనేయ్యుం వా బన్ధేయ్యుం వా పబ్బాజేయ్యుం వా – ‘చోరోసి బాలోసి మూళ్హోసి థేనోసీ’తి, తథారూపం భిక్ఖు అదిన్నం ఆదియమానో అయమ్పి పారాజికో హోతి అసంవాసో’’తి.
౯౨. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
గామో నామ ఏకకుటికోపి గామో, ద్వికుటికోపి గామో, తికుటికోపి గామో, చతుకుటికోపి గామో, సమనుస్సోపి గామో, అమనుస్సోపి గామో, పరిక్ఖిత్తోపి గామో, అపరిక్ఖిత్తోపి గామో, గోనిసాదినివిట్ఠోపి గామో, యోపి సత్థో అతిరేకచతుమాసనివిట్ఠో సోపి వుచ్చతి గామో.
గామూపచారో నామ పరిక్ఖిత్తస్స గామస్స ఇన్దఖీలే [ఇన్దఖిలే (క.)] ఠితస్స మజ్ఝిమస్స పురిసస్స లేడ్డుపాతో, అపరిక్ఖిత్తస్స గామస్స ఘరూపచారే ఠితస్స మజ్ఝిమస్స పురిసస్స లేడ్డుపాతో.
అరఞ్ఞం నామ ఠపేత్వా గామఞ్చ గామూపచారఞ్చ అవసేసం అరఞ్ఞం నామ.
అదిన్నం నామం యం అదిన్నం అనిస్సట్ఠం అపరిచ్చత్తం రక్ఖితం గోపితం మమాయితం పరపరిగ్గహితం. ఏతం అదిన్నం నామ.
థేయ్యసఙ్ఖాతన్తి థేయ్యచిత్తో అవహరణచిత్తో.
ఆదియేయ్యాతి ఆదియేయ్య హరేయ్య అవహరేయ్య ఇరియాపథం వికోపేయ్య ఠానా చావేయ్య సఙ్కేతం వీతినామేయ్య.
యథారూపం నామ పాదం వా పాదారహం వా అతిరేకపాదం వా.
రాజానో నామ పథబ్యారాజా పదేసరాజా మణ్డలికా అన్తరభోగికా అక్ఖదస్సా మహామత్తా, యే వా పన ఛేజ్జభేజ్జం కరోన్తా అనుసాసన్తి. ఏతే రాజానో నామ.
చోరో నామ యో పఞ్చమాసకం వా అతిరేకపఞ్చమాసకం వా అగ్ఘనకం అదిన్నం థేయ్యసఙ్ఖాతం ఆదియతి. ఏసో చోరో నామ.
హనేయ్యుం వాతి హత్థేన వా పాదేన వా కసాయ వా వేత్తేన వా అడ్ఢదణ్డకేన వా ఛేజ్జాయ వా హనేయ్యుం.
బన్ధేయ్యుం వాతి రజ్జుబన్ధనేన వా అన్దుబన్ధనేన వా సఙ్ఖలికబన్ధనేన వా ఘరబన్ధనేన వా నగరబన్ధనేన వా గామబన్ధనేన వా నిగమబన్ధనేన వా బన్ధేయ్యుం, పురిసగుత్తిం వా కరేయ్యుం.
పబ్బాజేయ్యుం వాతి గామా వా నిగమా వా నగరా వా జనపదా వా జనపదపదేసా వా పబ్బాజేయ్యుం.
చోరోసి బాలోసి మూళ్హోసి థేనోసీతి పరిభాసో ఏసో.
తథారూపం నామ పాదం వా పాదారహం వా అతిరేకపాదం వా.
ఆదియమానోతి ఆదియమానో హరమానో అవహరమానో ఇరియాపథం వికోపయమానో ఠానా చావయమానో సఙ్కేతం వీతినామయమానో.
అయమ్పీతి పురిమం ఉపాదాయ వుచ్చతి.
పారాజికో హోతీతి సేయ్యథాపి నామ పణ్డుపలాసో బన్ధనా పవుత్తో [హరితత్తాయ (సీ. స్యా.)] అభబ్బో హరితత్థాయ [హరితత్తాయ (సీ. స్యా.)], ఏవమేవ భిక్ఖు పాదం వా పాదారహం వా అతిరేకపాదం వా అదిన్నం థేయ్యసఙ్ఖాతం ఆదియిత్వా అస్సమణో హోతి అసక్యపుత్తియో. తేన వుచ్చతి – ‘పారాజికో హోతీ’తి.
అసంవాసోతి సంవాసో నామ ఏకకమ్మం ఏకుద్దేసో సమసిక్ఖతా. ఏసో సంవాసో నామ. సో తేన సద్ధిం నత్థి. తేన వుచ్చతి – ‘అసంవాసో’తి.
౯౩. భూమట్ఠం థలట్ఠం ఆకాసట్ఠం వేహాసట్ఠం ఉదకట్ఠం నావట్ఠం యానట్ఠం భారట్ఠం ఆరామట్ఠం విహారట్ఠం ఖేత్తట్ఠం వత్థుట్ఠం గామట్ఠం అరఞ్ఞట్ఠం ఉదకం దన్తపోణం [దన్తపోనం (సీ. క.)] వనప్పతి హరణకం ఉపనిధి సుఙ్కఘాతం పాణో అపదం ద్విపదం చతుప్పదం బహుప్పదం ఓచరకో ఓణిరక్ఖో సంవిదావహారో సఙ్కేతకమ్మం నిమిత్తకమ్మన్తి.
౯౪. భూమట్ఠం నామ భణ్డం భూమియం నిక్ఖిత్తం హోతి నిఖాతం పటిచ్ఛన్నం. భూమట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి కుదాలం వా పిటకం వా పరియేసతి గచ్ఛతి వా, ఆపత్తి దుక్కటస్స. తత్థ జాతకం కట్ఠం వా లతం వా ఛిన్దతి, ఆపత్తి దుక్కటస్స. తత్థ పంసుం ఖణతి వా బ్యూహతి [వియూహతి (స్యా.)] వా ఉద్ధరతి వా, ఆపత్తి దుక్కటస్స. కుమ్భిం ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. అత్తనో భాజనం పవేసేత్వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. అత్తనో భాజనగతం వా కరోతి ముట్ఠిం వా ఛిన్దతి, ఆపత్తి పారాజికస్స. సుత్తారుళ్హం భణ్డం పామఙ్గం వా కణ్ఠసుత్తకం వా కటిసుత్తకం వా సాటకం వా వేఠనం వా థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. కోటియం గహేత్వా ఉచ్చారేతి, ఆపత్తి థుల్లచ్చయస్స. ఘంసన్తో నీహరతి, ఆపత్తి థుల్లచ్చయస్స. అన్తమసో కేసగ్గమత్తమ్పి కుమ్భిముఖా మోచేతి, ఆపత్తి పారాజికస్స. సప్పిం వా తేలం వా మధుం వా ఫాణితం వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఏకేన పయోగేన పివతి, ఆపత్తి పారాజికస్స. తత్థేవ భిన్దతి వా ఛడ్డేతి వా ఝాపేతి వా అపరిభోగం వా కరోతి, ఆపత్తి దుక్కటస్స.
౯౫. థలట్ఠం నామ భణ్డం థలే నిక్ఖిత్తం హోతి. థలట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౯౬. ఆకాసట్ఠం నామ భణ్డం ఆకాసగతం హోతి. మోరో వా కపిఞ్జరో వా తిత్తిరో వా వట్టకో వా, సాటకం వా వేఠనం వా హిరఞ్ఞం వా సువణ్ణం వా ఛిజ్జమానం పతతి. ఆకాసట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. గమనం ఉపచ్ఛిన్దతి, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౯౭. వేహాసట్ఠం నామ భణ్డం వేహాసగతం హోతి. మఞ్చే వా పీఠే వా చీవరవంసే వా చీవరరజ్జుయా వా భిత్తిఖిలే వా నాగదన్తే వా రుక్ఖే వా లగ్గితం హోతి, అన్తమసో పత్తాధారకేపి. వేహాసట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౯౮. ఉదకట్ఠం నామ భణ్డం ఉదకే నిక్ఖిత్తం హోతి. ఉదకట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. నిముజ్జతి వా ఉమ్ముజ్జతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. తత్థ జాతకం ఉప్పలం వా పదుమం వా పుణ్డరీకం వా భిసం వా మచ్ఛం వా కచ్ఛపం వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౯౯. నావా నామ యాయ తరతి. నావట్ఠం నామ భణ్డం నావాయ నిక్ఖిత్తం హోతి. ‘‘నావట్ఠం భణ్డం అవహరిస్సామీ’’తి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. నావం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. బన్ధనం మోచేతి, ఆపత్తి దుక్కటస్స. బన్ధనం మోచేత్వా ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఉద్ధం వా అధో వా తిరియం వా అన్తమసో కేసగ్గమత్తమ్పి సఙ్కామేతి, ఆపత్తి పారాజికస్స.
౧౦౦. యానం నామ వయ్హం రథో సకటం సన్దమానికా. యానట్ఠం నామ భణ్డం యానే నిక్ఖిత్తం హోతి. యానట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. యానం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౦౧. భారో నామ సీసభారో ఖన్ధభారో కటిభారో ఓలమ్బకో. సీసే భారం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఖన్ధం ఓరోపేతి, ఆపత్తి పారాజికస్స. ఖన్ధే భారం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. కటిం ఓరోపేతి, ఆపత్తి పారాజికస్స. కటియా భారం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. హత్థేన గణ్హాతి, ఆపత్తి పారాజికస్స. హత్థే భారం థేయ్యచిత్తో భూమియం నిక్ఖిపతి, ఆపత్తి పారాజికస్స. థేయ్యచిత్తో భూమితో గణ్హాతి, ఆపత్తి పారాజికస్స.
౧౦౨. ఆరామో నామ పుప్ఫారామో ఫలారామో. ఆరామట్ఠం నామ భణ్డం ఆరామే చతూహి ఠానేహి నిక్ఖిత్తం హోతి – భూమట్ఠం థలట్ఠం, ఆకాసట్ఠం, వేహాసట్ఠం. ఆరామట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. తత్థ జాతకం మూలం వా తచం వా పత్తం వా పుప్ఫం వా ఫలం వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. ఆరామం అభియుఞ్జతి, ఆపత్తి దుక్కటస్స. సామికస్స విమతిం ఉప్పాదేతి, ఆపత్తి థుల్లచ్చయస్స. సామికో న మయ్హం భవిస్సతీతి ధురం నిక్ఖిపతి, ఆపత్తి పారాజికస్స. ధమ్మం చరన్తో సామికం పరాజేతి, ఆపత్తి పారాజికస్స. ధమ్మం చరన్తో పరజ్జతి, ఆపత్తి థుల్లచ్చయస్స.
౧౦౩. విహారట్ఠం నామ భణ్డం విహారే చతూహి ఠానేహి నిక్ఖిత్తం హోతి – భూమట్ఠం, థలట్ఠం, ఆకాసట్ఠం, వేహాసట్ఠం. విహారట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. విహారం అభియుఞ్జతి, ఆపత్తి దుక్కటస్స. సామికస్స విమతిం ఉప్పాదేతి, ఆపత్తి థుల్లచ్చయస్స. సామికో న మయ్హం భవిస్సతీతి ధురం నిక్ఖిపతి, ఆపత్తి పారాజికస్స. ధమ్మం చరన్తో సామికం పరాజేతి, ఆపత్తి పారాజికస్స. ధమ్మం చరన్తో పరజ్జతి, ఆపత్తి థుల్లచ్చయస్స.
౧౦౪. ఖేత్తం నామ యత్థ పుబ్బణ్ణం వా అపరణ్ణం వా జాయతి. ఖేత్తట్ఠం నామ భణ్డం ఖేత్తే చతూహి ఠానేహి నిక్ఖిత్తం హోతి – భూమట్ఠం, థలట్ఠం, ఆకాసట్ఠం, వేహాసట్ఠం. ఖేత్తట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి, దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. తత్థ జాతకం పుబ్బణ్ణం వా అపరణ్ణం వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. ఖేత్తం అభియుఞ్జతి, ఆపత్తి దుక్కటస్స. సామికస్స విమతిం ఉప్పాదేతి, ఆపత్తి థుల్లచ్చయస్స. సామికో న మయ్హం భవిస్సతీతి ధురం నిక్ఖిపతి, ఆపత్తి పారాజికస్స. ధమ్మం చరన్తో సామికం పరాజేతి, ఆపత్తి పారాజికస్స. ధమ్మం చరన్తో పరజ్జతి, ఆపత్తి థుల్లచ్చయస్స. ఖిలం వా రజ్జుం వా వతిం వా మరియాదం వా సఙ్కామేతి, ఆపత్తి దుక్కటస్స. ఏకం పయోగం అనాగతే, ఆపత్తి థుల్లచ్చయస్స. తస్మిం పయోగే ఆగతే, ఆపత్తి పారాజికస్స.
౧౦౫. వత్థు నామ ఆరామవత్థు విహారవత్థు. వత్థుట్ఠం నామ భణ్డం వత్థుస్మిం చతూహి ఠానేహి నిక్ఖిత్తం హోతి – భూమట్ఠం, థలట్ఠం, ఆకాసట్ఠం, వేహాసట్ఠం. వత్థుట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. వత్థుం అభియుఞ్జతి, ఆపత్తి దుక్కటస్స. సామికస్స విమతిం ఉప్పాదేతి, ఆపత్తి థుల్లచ్చయస్స. సామికో న మయ్హం భవిస్సతీతి ధురం నిక్ఖిపతి, ఆపత్తి పారాజికస్స. ధమ్మం చరన్తో సామికం పరాజేతి, ఆపత్తి పారాజికస్స. ధమ్మం చరన్తో పరజ్జతి, ఆపత్తి థుల్లచ్చయస్స. ఖీలం వా రజ్జుం వా వతిం వా పాకారం వా సఙ్కామేతి, ఆపత్తి దుక్కటస్స. ఏకం పయోగం అనాగతే ఆపత్తి థుల్లచ్చయస్స. తస్మిం పయోగే ఆగతే ఆపత్తి పారాజికస్స.
౧౦౬. గామట్ఠం నామ భణ్డం గామే చతూహి ఠానేహి నిక్ఖిత్తం హోతి – భూమట్ఠం, థలట్ఠం, ఆకాసట్ఠం, వేహాసట్ఠం. గామట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౦౭. అరఞ్ఞం నామ యం మనుస్సానం పరిగ్గహితం హోతి, తం అరఞ్ఞం. అరఞ్ఞట్ఠం నామ భణ్డం అరఞ్ఞే చతూహి ఠానేహి నిక్ఖిత్తం హోతి – భూమట్ఠం, థలట్ఠం, ఆకాసట్ఠం, వేహాసట్ఠం. అరఞ్ఞట్ఠం భణ్డం అవహరిస్సామీతి థేయ్యచిత్తో దుతియం వా పరియేసతి గచ్ఛతి వా, ఆపత్తి దుక్కటస్స. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. తత్థ జాతకం కట్ఠం వా లతం వా తిణం వా పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౦౮. ఉదకం నామ భాజనగతం వా హోతి పోక్ఖరణియా వా తళాకే వా. థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. అత్తనో భాజనం పవేసేత్వా పఞ్చమాసకం వా అతిరేకపఞ్చమాసకం వా అగ్ఘనకం ఉదకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. అత్తనో భాజనగతం కరోతి, ఆపత్తి పారాజికస్స. మరియాదం భిన్దతి, ఆపత్తి దుక్కటస్స. మరియాదం భిన్దిత్వా పఞ్చమాసకం వా అతిరేకపఞ్చమాసకం వా అగ్ఘనకం ఉదకం నిక్ఖామేతి, ఆపత్తి పారాజికస్స. అతిరేకమాసకం వా ఊనపఞ్చమాసకం వా అగ్ఘనకం ఉదకం నిక్ఖామేతి, ఆపత్తి థుల్లచ్చయస్స. మాసకం వా ఊనమాసకం వా అగ్ఘనకం ఉదకం నిక్ఖామేతి, ఆపత్తి దుక్కటస్స.
౧౦౯. దన్తపోణం నామ ఛిన్నం వా అచ్ఛిన్నం వా. పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౧౦. వనప్పతి నామ యో మనుస్సానం పరిగ్గహితో హోతి రుక్ఖో పరిభోగో. థేయ్యచిత్తో ఛిన్దతి, పహారే పహారే ఆపత్తి దుక్కటస్స. ఏకం పహారం అనాగతే, ఆపత్తి థుల్లచ్చయస్స. తస్మిం పహారే ఆగతే, ఆపత్తి పారాజికస్స.
౧౧౧. హరణకం నామ అఞ్ఞస్స హరణకం భణ్డం. థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. సహభణ్డహారకం పదసా నేస్సామీతి పఠమం పాదం సఙ్కామేతి, ఆపత్తి థుల్లచ్చయస్స. దుతియం పాదం సఙ్కామేతి, ఆపత్తి పారాజికస్స. పతితం భణ్డం గహేస్సామీతి పాతాపేతి, ఆపత్తి దుక్కటస్స. పతితం భణ్డం పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౧౨. ఉపనిధి నామ ఉపనిక్ఖిత్తం భణ్డం. దేహి మే భణ్డన్తి వుచ్చమానో నాహం గణ్హామీతి భణతి, ఆపత్తి దుక్కటస్స. సామికస్స విమతిం ఉప్పాదేతి, ఆపత్తి థుల్లచ్చయస్స. సామికో న మయ్హం దస్సతీతి ధురం నిక్ఖిపతి, ఆపత్తి పారాజికస్స. ధమ్మం చరన్తో సామికం పరాజేతి, ఆపత్తి పారాజికస్స. ధమ్మం చరన్తో పరజ్జతి, ఆపత్తి థుల్లచ్చయస్స.
౧౧౩. సుఙ్కఘాతం నామ రఞ్ఞా ఠపితం హోతి పబ్బతఖణ్డే వా నదీతిత్థే వా గామద్వారే వా – ‘అత్ర పవిట్ఠస్స సుఙ్కం గణ్హన్తూ’తి. తత్ర పవిసిత్వా రాజగ్గం [రాజగ్ఘం (సీ. స్యా.)] భణ్డం పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. పఠమం పాదం సుఙ్కఘాతం అతిక్కామేతి, ఆపత్తి థుల్లచ్చయస్స. దుతియం పాదం అతిక్కామేతి, ఆపత్తి పారాజికస్స. అన్తోసుఙ్కఘాతే ఠితో బహిసుఙ్కఘాతం పాతేతి, ఆపత్తి పారాజికస్స. సుఙ్కం పరిహరతి, ఆపత్తి దుక్కటస్స.
౧౧౪. పాణో నామ మనుస్సపాణో వుచ్చతి. థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. పదసా నేస్సామీతి పఠమం పాదం సఙ్కామేతి, ఆపత్తి థుల్లచ్చయస్స. దుతియం పాదం సఙ్కామేతి, ఆపత్తి పారాజికస్స.
అపదం నామ అహి మచ్ఛా. పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౧౫. ద్విపదం నామ మనుస్సా, పక్ఖజాతా. థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. పదసా నేస్సామీతి పఠమం పాదం సఙ్కామేతి, ఆపత్తి థుల్లచ్చయస్స. దుతియం పాదం సఙ్కామేతి, ఆపత్తి పారాజికస్స.
౧౧౬. చతుప్పదం నామ – హత్థీ అస్సా ఓట్ఠా గోణా గద్రభా పసుకా. థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. పదసా నేస్సామీతి పఠమం పాదం సఙ్కామేతి, ఆపత్తి థుల్లచ్చయస్స. దుతియం పాదం సఙ్కామేతి, ఆపత్తి థుల్లచ్చయస్స. తతియం పాదం సఙ్కామేతి, ఆపత్తి థుల్లచ్చయస్స. చతుత్థం పాదం సఙ్కామేతి, ఆపత్తి పారాజికస్స.
౧౧౭. బహుప్పదం నామ – విచ్ఛికా సతపదీ ఉచ్చాలిఙ్గపాణకా. పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స. పదసా నేస్సామీతి సఙ్కామేతి, పదే పదే ఆపత్తి థుల్లచ్చయస్స. పచ్ఛిమం పాదం సఙ్కామేతి, ఆపత్తి పారాజికస్స.
౧౧౮. ఓచరకో నామ భణ్డం ఓచరిత్వా ఆచిక్ఖతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో తం భణ్డం అవహరతి, ఆపత్తి ఉభిన్నం పారాజికస్స.
ఓణిరక్ఖో నామ ఆహటం భణ్డం గోపేన్తో పఞ్చమాసకం వా అతిరేకపఞ్చమాసకం వా అగ్ఘనకం థేయ్యచిత్తో ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
సంవిదావహారో నామ సమ్బహులా సంవిదహిత్వా ఏకో భణ్డం అవహరతి, ఆపత్తి సబ్బేసం పారాజికస్స.
౧౧౯. సఙ్కేతకమ్మం నామ సఙ్కేతం కరోతి – ‘‘పురేభత్తం వా పచ్ఛాభత్తం వా రత్తిం వా దివా వా తేన సఙ్కేతేన తం భణ్డం అవహరా’’తి, ఆపత్తి దుక్కటస్స. తేన సఙ్కేతేన తం భణ్డం అవహరతి, ఆపత్తి ఉభిన్నం పారాజికస్స. తం సఙ్కేతం పురే వా పచ్ఛా వా తం భణ్డం అవహరతి, మూలట్ఠస్స అనాపత్తి. అవహారకస్స ఆపత్తి పారాజికస్స.
౧౨౦. నిమిత్తకమ్మం నామ నిమిత్తం కరోతి. అక్ఖిం వా నిఖణిస్సామి భముకం వా ఉక్ఖిపిస్సామి సీసం వా ఉక్ఖిపిస్సామి, తేన నిమిత్తేన తం భణ్డం అవహరాతి, ఆపత్తి దుక్కటస్స. తేన నిమిత్తేన తం భణ్డం అవహరతి, ఆపత్తి ఉభిన్నం పారాజికస్స. తం నిమిత్తం పురే వా పచ్ఛా వా తం భణ్డం అవహరతి, మూలట్ఠస్స అనాపత్తి. అవహారకస్స ఆపత్తి పారాజికస్స.
౧౨౧. భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో తం మఞ్ఞమానో తం అవహరతి, ఆపత్తి ఉభిన్నం పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో తం మఞ్ఞమానో అఞ్ఞం అవహరతి, మూలట్ఠస్స అనాపత్తి. అవహారకస్స ఆపత్తి పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో అఞ్ఞం మఞ్ఞమానో తం అవహరతి, ఆపత్తి ఉభిన్నం పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో అఞ్ఞం మఞ్ఞమానో అఞ్ఞం అవహరతి, మూలట్ఠస్స అనాపత్తి. అవహారకస్స ఆపత్తి పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామస్స పావద – ‘ఇత్థన్నామో ఇత్థన్నామస్స పావదతు – ఇత్థన్నామో ఇత్థన్నామం భణ్డం అవహరతూ’’’తి, ఆపత్తి దుక్కటస్స. సో ఇతరస్స ఆరోచేతి, ఆపత్తి దుక్కటస్స. అవహారకో పటిగ్గణ్హాతి, మూలట్ఠస్స ఆపత్తి థుల్లచ్చయస్స. సో తం భణ్డం అవహరతి, ఆపత్తి సబ్బేసం పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామస్స పావద – ‘ఇత్థన్నామో ఇత్థన్నామస్స పావదతు – ఇత్థన్నామో ఇత్థన్నామం భణ్డం అవహరతూ’’’తి, ఆపత్తి దుక్కటస్స. సో అఞ్ఞం ఆణాపేతి, ఆపత్తి దుక్కటస్స. అవహారకో పటిగ్గణ్హాతి, ఆపత్తి దుక్కటస్స. సో తం భణ్డం అవహరతి, మూలట్ఠస్స అనాపత్తి. ఆణాపకస్స చ అవహారకస్స చ ఆపత్తి పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో గన్త్వా పున పచ్చాగచ్ఛతి – ‘‘నాహం సక్కోమి తం భణ్డం అవహరితు’’న్తి. సో పున ఆణాపేతి – ‘‘యదా సక్కోసి తదా తం భణ్డం అవహరా’’తి, ఆపత్తి దుక్కటస్స. సో తం భణ్డం అవహరతి, ఆపత్తి ఉభిన్నం పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో ఆణాపేత్వా విప్పటిసారీ న సావేతి – ‘‘మా అవహరీ’’తి. సో తం భణ్డం అవహరతి, ఆపత్తి ఉభిన్నం పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో ఆణాపేత్వా విప్పటిసారీ సావేతి – ‘‘మా అవహరీ’’తి. సో ‘‘ఆణత్తో అహం తయా’’తి, తం భణ్డం అవహరతి, మూలట్ఠస్స అనాపత్తి. అవహారకస్స ఆపత్తి పారాజికస్స.
భిక్ఖు భిక్ఖుం ఆణాపేతి – ‘‘ఇత్థన్నామం భణ్డం అవహరా’’తి, ఆపత్తి దుక్కటస్స. సో ఆణాపేత్వా విప్పటిసారీ సావేతి – ‘‘మా అవహరీ’’తి. సో ‘‘సాధూ’’తి [సుట్ఠూతి (క.)]? ఓరమతి, ఉభిన్నం అనాపత్తి.
౧౨౨. పఞ్చహి ఆకారేహి అదిన్నం ఆదియన్తస్స ఆపత్తి పారాజికస్స – పరపరిగ్గహితఞ్చ హోతి, పరపరిగ్గహితసఞ్ఞీ చ, గరుకో చ హోతి పరిక్ఖారో, పఞ్చమాసకో వా అతిరేకపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౨౩. పఞ్చహి ఆకారేహి అదిన్నం ఆదియన్తస్స ఆపత్తి థుల్లచ్చయస్స – పరపరిగ్గహితఞ్చ హోతి, పరపరిగ్గహితసఞ్ఞీ చ, లహుకో చ హోతి పరిక్ఖారో, అతిరేకమాసకో వా ఊనపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి థుల్లచ్చయస్స.
౧౨౪. పఞ్చహి ఆకారేహి అదిన్నం ఆదియన్తస్స ఆపత్తి దుక్కటస్స. పరపరిగ్గహితఞ్చ హోతి, పరపరిగ్గహితసఞ్ఞీ చ, లహుకో చ హోతి పరిక్ఖారో, మాసకో వా ఊనమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి దుక్కటస్స.
౧౨౫. ఛహి ఆకారేహి అదిన్నం ఆదియన్తస్స ఆపత్తి పారాజికస్స. న చ సకసఞ్ఞీ, న చ విస్సాసగ్గాహీ, న చ తావకాలికం, గరుకో చ హోతి పరిక్ఖారో, పఞ్చమాసకో వా అతిరేకపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస. ఫన్దాపేతి, ఆపత్తి థుల్లచ్చయస్స. ఠానా చావేతి, ఆపత్తి పారాజికస్స.
౧౨౬. ఛహి ఆకారేహి అదిన్నం ఆదియన్తస్స ఆపత్తి థుల్లచ్చయస్స. న చ సకసఞ్ఞీ, న చ విస్సాసగ్గాహీ, న చ తావకాలికం, లహుకో చ హోతి పరిక్ఖారో అతిరేకమాసకో వా ఊనపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి థుల్లచ్చయస్స.
౧౨౭. ఛహి ఆకారేహి అదిన్నం ఆదియన్తస్స ఆపత్తి దుక్కటస్స. న చ సకసఞ్ఞీ, న చ విస్సాసగ్గాహీ, న చ తావకాలికం, లహుకో చ హోతి పరిక్ఖారో, మాసకో వా ఊనమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి దుక్కటస్స.
౧౨౮. పఞ్చహి ఆకారేహి అదిన్నం ఆదియన్తస్స ఆపత్తి దుక్కటస్స. న చ పరపరిగ్గహితం హోతి, పరపరిగ్గహితసఞ్ఞీ చ, గరుకో చ హోతి పరిక్ఖారో, పఞ్చమాసకో వా అతిరేకపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి దుక్కటస్స.
౧౨౯. పఞ్చహి ఆకారేహి అదిన్నం ఆదియన్తస్స ఆపత్తి దుక్కటస్స. న చ పరపరిగ్గహితం హోతి, పరపరిగ్గహితసఞ్ఞీ చ, లహుకో చ హోతి పరిక్ఖారో, అతిరేకమాసకో వా ఊనపఞ్చమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి దుక్కటస్స.
౧౩౦. పఞ్చహి ఆకారేహి అదిన్నం ఆదియన్తస్స ఆపత్తి దుక్కటస్స. న చ పరపరిగ్గహితం హోతి, పరపరిగ్గహితసఞ్ఞీ చ, లహుకో చ హోతి పరిక్ఖారో, మాసకో వా ఊనమాసకో వా, థేయ్యచిత్తఞ్చ పచ్చుపట్ఠితం హోతి. ఆమసతి, ఆపత్తి దుక్కటస్స. ఫన్దాపేతి, ఆపత్తి దుక్కటస్స. ఠానా చావేతి, ఆపత్తి దుక్కటస్స.
౧౩౧. అనాపత్తి ససఞ్ఞిస్స, విస్సాసగ్గాహే, తావకాలికే, పేతపరిగ్గహే, తిరచ్ఛానగతపరిగ్గహే, పంసుకూలసఞ్ఞిస్స, ఉమ్మత్తకస్స, (ఖిత్తచిత్తస్స వేదనాట్టస్స) [(ఖిత్తచిత్తస్స వేదనాట్టస్స) కత్థచి నత్థి] ఆదికమ్మికస్సాతి.
అదిన్నాదానమ్హి పఠమభాణవారో నిట్ఠితో.
వినీతవత్థుఉద్దానగాథా
రజకేహి పఞ్చ అక్ఖాతా, చతురో అత్థరణేహి చ;
అన్ధకారేన వే పఞ్చ, పఞ్చ హారణకేన చ.
నిరుత్తియా పఞ్చ అక్ఖాతా, వాతేహి అపరే దువే;
అసమ్భిన్నే కుసాపాతో, జన్తగ్గేన [జన్తాఘరేన (స్యా.)] సహా దస.
విఘాసేహి పఞ్చ అక్ఖాతా, పఞ్చ చేవ అమూలకా;
దుబ్భిక్ఖే కురమంసఞ్చ [కూరమంసఞ్చ (స్యా.)], పూవసక్ఖలిమోదకా.
ఛపరిక్ఖారథవికా, భిసివంసా న నిక్ఖమే;
ఖాదనీయఞ్చ విస్సాసం, ససఞ్ఞాయపరే దువే.
సత్త నావహరామాతి, సత్త చేవ అవాహరుం;
సఙ్ఘస్స అవహరుం సత్త, పుప్ఫేహి అపరే దువే.
తయో చ వుత్తవాదినో, మణి తీణి అతిక్కమే;
సూకరా చ మిగా మచ్ఛా, యానఞ్చాపి పవత్తయి.
దువే పేసీ దువే దారూ, పంసుకూలం దువే దకా;
అనుపుబ్బవిధానేన, తదఞ్ఞో న పరిపూరయి.
సావత్థియా చతురో ముట్ఠీ, ద్వే విఘాసా దువే తిణా;
సఙ్ఘస్స భాజయుం సత్త, సత్త చేవ అస్సామికా.
దారుదకా మత్తికా ద్వే తిణాని;
సఙ్ఘస్స సత్త అవహాసి సేయ్యం;
సస్సామికం న చాపి నీహరేయ్య;
హరేయ్య సస్సామికం తావకాలికం.
చమ్పా రాజగహే చేవ, వేసాలియా చ అజ్జుకో;
బారాణసీ చ కోసమ్బీ, సాగలా దళ్హికేన చాతి.
వినీతవత్థు
౧౩౨. తేన ఖో పన సమయేన ఛబ్బగ్గియా భిక్ఖూ రజకత్థరణం గన్త్వా రజకభణ్డికం అవహరింసు. తేసం కుక్కుచ్చం అహోసి – ‘‘భగవతా సిక్ఖాపదం పఞ్ఞత్తం. కచ్చి ను ఖో మయం పారాజికం ఆపత్తిం ఆపన్నా’’తి. భగవతో ఏతమత్థం ఆరోచేసుం. ‘‘ఆపత్తిం తుమ్హే, భిక్ఖవే, ఆపన్నా పారాజిక’’న్తి.
తేన ఖో పన సమయేన అఞ్ఞతరో భిక్ఖు రజకత్థరణం గన్త్వా మహగ్ఘం దుస్సం పస్సిత్వా థేయ్యచిత్తం ఉప్పాదేసి. తస్స కుక్కుచ్చం అహోసి – ‘‘భగవతా సిక్ఖాపదం పఞ్ఞత్తం, కచ్చి ను ఖో అహం పారాజికం ఆపత్తిం ఆపన్నో’’తి? భగవతో ఏతమత్థం ఆరోచేసి. ‘‘అనాపత్తి, భిక్ఖు, చిత్తుప్పాదే’’తి.
తేన ఖో పన సమయేన అఞ్ఞతరో భిక్ఖు రజకత్థరణం గన్త్వా మహగ్ఘం దుస్సం పస్సిత్వా థేయ్యచిత్తో ఆమసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. ఆపత్తి దుక్కటస్సా’’తి.
తేన ఖో పన సమయేన అఞ్ఞతరో భిక్ఖు రజకత్థరణం గన్త్వా మహగ్ఘం దుస్సం పస్సిత్వా థేయ్యచిత్తో ఫన్దాపేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. ఆపత్తి థుల్లచ్చయస్సా’’తి.
తేన ఖో పన సమయేన అఞ్ఞతరో భిక్ఖు రజకత్థరణం గన్త్వా మహగ్ఘం దుస్సం పస్సిత్వా థేయ్యచిత్తో ఠానా చావేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౩౩. తేన ఖో పన సమయేన అఞ్ఞతరో పిణ్డచారికో భిక్ఖు మహగ్ఘం ఉత్తరత్థరణం పస్సిత్వా థేయ్యచిత్తం ఉప్పాదేసి…పే… థేయ్యచిత్తో ఆమసి…పే… థేయ్యచిత్తో ఫన్దాపేసి…పే… థేయ్యచిత్తో ఠానా చావేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౩౪. తేన ఖో పన సమయేన అఞ్ఞతరో భిక్ఖు దివా భణ్డం పస్సిత్వా నిమిత్తం అకాసి – ‘రత్తిం అవహరిస్సామీ’తి. సో తం మఞ్ఞమానో తం అవహరి…పే… తం మఞ్ఞమానో అఞ్ఞం అవహరి…పే… అఞ్ఞం మఞ్ఞమానో తం అవహరి…పే… అఞ్ఞం మఞ్ఞమానో అఞ్ఞం అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు దివా భణ్డం పస్సిత్వా నిమిత్తం అకాసి – ‘‘రత్తిం అవహరిస్సామీ’’తి. సో తం మఞ్ఞమానో అత్తనో భణ్డం అవహరి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. ఆపత్తి దుక్కటస్సా’’తి.
తేన ఖో పన సమయేన అఞ్ఞతరో భిక్ఖు అఞ్ఞస్స భణ్డం హరన్తో సీసే భారం థేయ్యచిత్తో ఆమసి…పే… థేయ్యచిత్తో ఫన్దాపేసి…పే… థేయ్యచిత్తో ఖన్ధం ఓరోపేసి…పే… ఖన్ధే భారం థేయ్యచిత్తో ఆమసి…పే… థేయ్యచిత్తో ఫన్దాపేసి…పే… థేయ్యచిత్తో కటిం ఓరోపేసి…పే… కటియా భారం థేయ్యచిత్తో ఆమసి…పే… థేయ్యచిత్తో ఫన్దాపేసి…పే… థేయ్యచిత్తో హత్థేన అగ్గహేసి…పే… హత్థే భారం థేయ్యచిత్తో భూమియం నిక్ఖిపి…పే… థేయ్యచిత్తో భూమితో అగ్గహేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౩౫. తేన ఖో పన సమయేన అఞ్ఞతరో భిక్ఖు అజ్ఝోకాసే చీవరం పత్థరిత్వా విహారం పావిసి. అఞ్ఞతరో భిక్ఖు – ‘మాయిదం చీవరం నస్సీ’తి, పటిసామేసి. సో నిక్ఖమిత్వా తం భిక్ఖుం పుచ్ఛి – ‘‘ఆవుసో, మయ్హం చీవరం కేన అవహట’’న్తి? సో ఏవమాహ – ‘‘మయా అవహట’’న్తి. ‘‘సో తం ఆదియి, అస్సమణోసి త్వ’’న్తి. తస్స కుక్కుచ్చం అహోసి…పే…. భగవతో ఏతమత్థం ఆరోచేసి. ‘‘కించిత్తో త్వం, భిక్ఖూ’’తి? ‘‘నిరుత్తిపథో అహం, భగవా’’తి. ‘‘అనాపత్తి, భిక్ఖు, నిరుత్తిపథే’’తి.
తేన ఖో పన సమయేన అఞ్ఞతరో భిక్ఖు పీఠే చీవరం నిక్ఖిపిత్వా. పీఠే నిసీదనం నిక్ఖిపిత్వా… హేట్ఠాపీఠే పత్తం నిక్ఖిపిత్వా విహారం పావిసి. అఞ్ఞతరో భిక్ఖు – ‘‘మాయం పత్తో నస్సీ’’తి పటిసామేసి. సో నిక్ఖమిత్వా తం భిక్ఖుం పుచ్ఛి – ‘‘ఆవుసో, మయ్హం పత్తో కేన అవహటో’’తి? సో ఏవమాహ – ‘‘మయా అవహటో’’తి. ‘‘సో తం ఆదియి, అస్సమణోసి త్వ’’న్తి. తస్స కుక్కుచ్చం అహోసి…పే… ‘‘అనాపత్తి, భిక్ఖు, నిరుత్తిపథే’’తి.
తేన ఖో పన సమయేన అఞ్ఞతరా భిక్ఖునీ వతియా చీవరం పత్థరిత్వా విహారం పావిసి. అఞ్ఞతరా భిక్ఖునీ – ‘మాయిదం చీవరం నస్సీ’తి పటిసామేసి. సా నిక్ఖమిత్వా తం భిక్ఖునిం పుచ్ఛి – ‘‘అయ్యే, మయ్హం చీవరం కేన అవహట’’న్తి? సా ఏవమాహ – ‘‘మయా అవహట’’న్తి. ‘‘సా తం ఆదియి, అస్సమణీసి త్వ’’న్తి. తస్సా కుక్కుచ్చం అహోసి. అథ ఖో సా భిక్ఖునీ భిక్ఖునీనం ఏతమత్థం ఆరోచేసి. భిక్ఖునియో భిక్ఖూనం ఏతమత్థం ఆరోచేసుం. భిక్ఖూ భగవతో ఏతమత్థం ఆరోచేసుం…పే… ‘‘అనాపత్తి, భిక్ఖవే, నిరుత్తిపథే’’తి.
౧౩౬. తేన ఖో పన సమయేన అఞ్ఞతరో భిక్ఖు వాతమణ్డలికాయ ఉక్ఖిత్తం సాటకం పస్సిత్వా సామికానం దస్సామీతి, అగ్గహేసి. సామికా తం భిక్ఖుం చోదేసుం – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘కించిత్తో త్వం భిక్ఖూ’’తి? ‘‘అథేయ్యచిత్తో అహం, భగవా’’తి. అనాపత్తి, భిక్ఖు, అథేయ్యచిత్తస్సా’’తి.
తేన ఖో పన సమయేన అఞ్ఞతరో భిక్ఖు వాతమణ్డలికాయ ఉక్ఖిత్తం వేఠనం పస్సిత్వా ‘పురే సామికా పస్సన్తీ’తి థేయ్యచిత్తో అగ్గహేసి. సామికా తం భిక్ఖుం చోదేసుం – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౩౭. తేన ఖో పన సమయేన అఞ్ఞతరో భిక్ఖు సుసానం గన్త్వా అభిన్నే సరీరే పంసుకూలం అగ్గహేసి. తస్మిఞ్చ సరీరే పేతో అధివత్థో హోతి. అథ ఖో సో పేతో తం భిక్ఖుం ఏతదవోచ – ‘‘మా, భన్తే, మయ్హం సాటకం అగ్గహేసీ’’తి. సో భిక్ఖు అనాదియన్తో అగమాసి. అథ ఖో తం సరీరం ఉట్ఠహిత్వా తస్స భిక్ఖునో పిట్ఠితో పిట్ఠితో అనుబన్ధి. అథ ఖో సో భిక్ఖు విహారం పవిసిత్వా ద్వారం థకేసి. అథ ఖో తం సరీరం తత్థేవ పరిపతి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. న చ, భిక్ఖవే, అభిన్నే సరీరే పంసుకూలం గహేతబ్బం. సో గణ్హేయ్య, ఆపత్తి దుక్కటస్సా’’తి.
౧౩౮. తేన ఖో పన సమయేన అఞ్ఞతరో భిక్ఖు సఙ్ఘస్స చీవరే భాజీయమానే థేయ్యచిత్తో కుసం సఙ్కామేత్వా చీవరం అగ్గహేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౩౯. తేన ఖో పన సమయేన ఆయస్మా ఆనన్దో జన్తాఘరే అఞ్ఞతరస్స భిక్ఖునో అన్తరవాసకం అత్తనో మఞ్ఞమానో నివాసేసి. అథ ఖో సో భిక్ఖు ఆయస్మన్తం ఆనన్దం ఏతదవోచ – ‘‘కిస్స మే త్వం, ఆవుసో ఆనన్ద, అన్తరవాసకం నివాసేసీ’’తి? ‘‘సకసఞ్ఞీ అహం, ఆవుసో’’తి. భగవతో ఏతమత్థం ఆరోచేసుం. ‘‘అనాపత్తి, భిక్ఖవే, సకసఞ్ఞిస్సా’’తి.
౧౪౦. తేన ఖో పన సమయేన సమ్బహులా భిక్ఖూ గిజ్ఝకూటా పబ్బతా ఓరోహన్తా సీహవిఘాసం పస్సిత్వా పచాపేత్వా పరిభుఞ్జింసు. తేసం కుక్కుచ్చం అహోసి…పే… ‘‘అనాపత్తి, భిక్ఖవే, సీహవిఘాసే’’తి.
తేన ఖో పన సమయేన సమ్బహులా భిక్ఖూ గిజ్ఝకూటా పబ్బతా ఓరోహన్తా బ్యగ్ఘవిఘాసం పస్సిత్వా… దీపివిఘాసం పస్సిత్వా… తరచ్ఛవిఘాసం పస్సిత్వా… కోకవిఘాసం పస్సిత్వా పచాపేత్వా పరిభుఞ్జింసు. తేసం కుక్కుచ్చం అహోసి…పే… ‘‘అనాపత్తి, భిక్ఖవే, తిరచ్ఛానగతపరిగ్గహే’’తి.
౧౪౧. తేన ఖో పన సమయేన అఞ్ఞతరో భిక్ఖు సఙ్ఘస్స ఓదనే భాజీయమానే – ‘అపరస్స భాగం దేహీ’తి అమూలకం అగ్గహేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. ఆపత్తి సమ్పజానముసావాదే పాచిత్తియస్సా’’తి.
తేన ఖో పన సమయేన అఞ్ఞతరో భిక్ఖు సఙ్ఘస్స ఖాదనీయే భాజియమానే… సఙ్ఘస్స పూవే భాజియమానే… సఙ్ఘస్స ఉచ్ఛుమ్హి భాజియమానే… సఙ్ఘస్స తిమ్బరూసకే భాజియమానే – ‘అపరస్స భాగం దేహీ’తి అమూలకం అగ్గహేసి. తస్స కుక్కుచ్చం అహోసి…పే…. ‘‘అనాపత్తి, భిక్ఖు, పారాజికస్స. ఆపత్తి సమ్పజానముసావాదే పాచిత్తియస్సా’’తి.
౧౪౨. తేన ఖో పన సమయేన అఞ్ఞతరో భిక్ఖు దుబ్భిక్ఖే ఓదనీయఘరం పవిసిత్వా పత్తపూరం ఓదనం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు దుబ్భిక్ఖే సూనఘరం [సూనాఘరం (సీ. స్యా)] పవిసిత్వా పత్తపూరం మంసం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు దుబ్భిక్ఖే పూవఘరం పవిసిత్వా పత్తపూరం పూవం థేయ్యచిత్తో అవహరి…పే… పత్తపూరా సక్ఖలియో థేయ్యచిత్తో అవహరి…పే… పత్తపూరే మోదకే థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౪౩. తేన ఖో పన సమయేన అఞ్ఞతరో భిక్ఖు దివా పరిక్ఖారం పస్సిత్వా నిమిత్తం అకాసి – ‘‘రత్తిం అవహరిస్సామీ’’తి. సో తం మఞ్ఞమానో తం అవహరి…పే… తం మఞ్ఞమానో అఞ్ఞం అవహరి…పే… అఞ్ఞం మఞ్ఞమానో తం అవహరి…పే… అఞ్ఞం మఞ్ఞమానో అఞ్ఞం అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు దివా పరిక్ఖారం పస్సిత్వా నిమిత్తం అకాసి – ‘‘రత్తిం అవహరిస్సామీ’’తి. సో తం మఞ్ఞమానో అత్తనో పరిక్ఖారం అవహరి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. ఆపత్తి దుక్కటస్సా’’తి.
౧౪౪. తేన ఖో పన సమయేన అఞ్ఞతరో భిక్ఖు పీఠే థవికం పస్సిత్వా – ‘‘ఇతో గణ్హన్తో పారాజికో భవిస్సామీ’’తి సహ పీఠకేన సఙ్కామేత్వా అగ్గహేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు సఙ్ఘస్స భిసిం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౪౫. తేన ఖో పన సమయేన అఞ్ఞతరో భిక్ఖు చీవరవంసే చీవరం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు విహారే చీవరం అవహరిత్వా – ‘‘ఇతో నిక్ఖమన్తో పారాజికో భవిస్సామీ’’తి విహారా న నిక్ఖమి…పే… భగవతో ఏతమత్థం ఆరోచేసుం. ‘‘నిక్ఖమి [నిక్ఖమేయ్య (సీ. స్యా.)] వా సో, భిక్ఖవే, మోఘపురిసో న వా నిక్ఖమి [నిక్ఖమేయ్య (సీ. స్యా.)], ఆపత్తి పారాజికస్సా’’తి.
౧౪౬. తేన ఖో పన సమయేన ద్వే భిక్ఖూ సహాయకా హోన్తి. ఏకో భిక్ఖు గామం పిణ్డాయ పావిసి. దుతియో భిక్ఖు సఙ్ఘస్స ఖాదనీయే భాజీయమానే సహాయకస్స భాగం గహేత్వా తస్స విస్ససన్తో పరిభుఞ్జి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘కిం చిత్తో త్వం, భిక్ఖూ’’తి? ‘‘విస్సాసగ్గాహో అహం, భగవా’’తి. ‘‘అనాపత్తి, భిక్ఖు, విస్సాసగ్గాహే’’తి.
౧౪౭. తేన ఖో పన సమయేన సమ్బహులా భిక్ఖూ చీవరకమ్మం కరోన్తి. సఙ్ఘస్స ఖాదనీయే భాజీయమానే సబ్బేసం పటివిసా ఆహరిత్వా ఉపనిక్ఖిత్తా హోన్తి. అఞ్ఞతరో భిక్ఖు అఞ్ఞతరస్స భిక్ఖునో పటివిసం అత్తనో మఞ్ఞమానో పరిభుఞ్జి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘కించిత్తో త్వం, భిక్ఖూ’’తి? ‘‘సకసఞ్ఞీ అహం, భగవా’’తి. ‘‘అనాపత్తి, భిక్ఖు, సకసఞ్ఞిస్సా’’తి.
తేన ఖో పన సమయేన సమ్బహులా భిక్ఖూ చీవరకమ్మం కరోన్తి. సఙ్ఘస్స ఖాదనీయే భాజియమానే అఞ్ఞతరస్స భిక్ఖునో పత్తేన అఞ్ఞతరస్స భిక్ఖునో పటివిసో ఆహరిత్వా ఉపనిక్ఖిత్తో హోతి. పత్తసామికో భిక్ఖు అత్తనో మఞ్ఞమానో పరిభుఞ్జి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సకసఞ్ఞిస్సా’’తి.
౧౪౮. తేన ఖో పన సమయేన అమ్బచోరకా అమ్బం పాతేత్వా భణ్డికం ఆదాయ అగమంసు. సామికా తే చోరకే అనుబన్ధింసు. చోరకా సామికే పస్సిత్వా భణ్డికం పాతేత్వా పలాయింసు. భిక్ఖూ పంసుకూలసఞ్ఞినో పటిగ్గహాపేత్వా పరిభుఞ్జింసు. సామికా తే భిక్ఖూ చోదేసుం – ‘‘అస్సమణాత్థ తుమ్హే’’తి. తేసం కుక్కుచ్చం అహోసి…పే… భగవతో ఏతమత్థం ఆరోచేసుం. ‘‘కించిత్తా తుమ్హే, భిక్ఖవే’’తి? ‘‘పంసుకూలసఞ్ఞినో మయం, భగవా’’తి. ‘‘అనాపత్తి, భిక్ఖవే, పంసుకూలసఞ్ఞిస్సా’’తి.
తేన ఖో పన సమయేన జమ్బుచోరకా… లబుజచోరకా… పనసచోరకా… తాలపక్కచోరకా… ఉచ్ఛుచోరకా… తిమ్బరూసకచోరకా తిమ్బరూసకే ఉచ్చినిత్వా భణ్డికం ఆదాయ అగమంసు. సామికా తే చోరకే అనుబన్ధింసు. చోరకా సామికే పస్సిత్వా భణ్డికం పాతేత్వా పలాయింసు. భిక్ఖూ పంసుకూలసఞ్ఞినో పటిగ్గహాపేత్వా పరిభుఞ్జింసు. సామికా తే భిక్ఖూ చోదేసుం – ‘‘అస్సమణాత్థ తుమ్హే’’తి. తేసం కుక్కుచ్చం అహోసి…పే… ‘‘అనాపత్తి, భిక్ఖవే, పంసుకూలసఞ్ఞిస్సా’’తి.
తేన ఖో పన సమయేన అమ్బచోరకా అమ్బం పాతేత్వా భణ్డికం ఆదాయ అగమంసు. సామికా తే చోరకే అనుబన్ధింసు. చోరకా సామికే పస్సిత్వా భణ్డికం పాతేత్వా పలాయింసు. భిక్ఖూ – ‘పురే సామికా పస్సన్తీ’తి, థేయ్యచిత్తా పరిభుఞ్జింసు. సామికా తే భిక్ఖూ చోదేసుం – ‘‘అస్సమణాత్థ తుమ్హే’’తి. తేసం కుక్కుచ్చం అహోసి…పే… ‘‘ఆపత్తిం తుమ్హే, భిక్ఖవే, ఆపన్నా పారాజిక’’న్తి.
తేన ఖో పన సమయేన జమ్బుచోరకా… లబుజచోరకా… పనసచోరకా… తాలపక్కచోరకా… ఉచ్ఛుచోరకా… తిమ్బరూసకచోరకా తిమ్బరూసకే ఉచ్చినిత్వా భణ్డికం ఆదాయ అగమంసు. సామికా తే చోరకే అనుబన్ధింసు. చోరకా సామికే పస్సిత్వా భణ్డికం పాతేత్వా పలాయింసు. భిక్ఖూ – ‘పురే సామికా పస్సన్తీ’తి, థేయ్యచిత్తా పరిభుఞ్జింసు. సామికా తే భిక్ఖూ చోదేసుం – ‘‘అస్సమణాత్థ తుమ్హే’’తి. తేసం కుక్కుచ్చం అహోసి…పే… ‘‘ఆపత్తిం తుమ్హే, భిక్ఖవే, ఆపన్నా పారాజిక’’న్తి.
తేన ఖో పన సమయేన అఞ్ఞతరో భిక్ఖు సఙ్ఘస్స అమ్బం థేయ్యచిత్తో అవహరి… సఙ్ఘస్స జమ్బుం… సఙ్ఘస్స లబుజం… సఙ్ఘస్స పనసం… సఙ్ఘస్స తాలపక్కం… సఙ్ఘస్స ఉచ్ఛుం… సఙ్ఘస్స తిమ్బరూసకం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
౧౪౯. తేన ఖో పన సమయేన అఞ్ఞతరో భిక్ఖు పుప్ఫారామం గన్త్వా ఓచితం పుప్ఫం పఞ్చమాసగ్ఘనకం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో పారాజిక’’న్తి.
తేన ఖో పన సమయేన అఞ్ఞతరో భిక్ఖు పుప్ఫారామం గన్త్వా పుప్ఫం ఓచినిత్వా పఞ్చమాసగ్ఘనకం థేయ్యచిత్తో అవహరి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు ఆపన్నో పారాజిక’’న్తి.
౧౫౦. తేన ఖో పన సమయేన అఞ్ఞతరో భిక్ఖు గామకం గచ్ఛన్తో అఞ్ఞతరం భిక్ఖుం ఏతదవోచ – ‘‘ఆవుసో, తుయ్హం ఉపట్ఠాకకులం వుత్తో వజ్జేమీ’’తి. సో గన్త్వా ఏకం సాటకం ఆహరాపేత్వా అత్తనా పరిభుఞ్జి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. న చ, భిక్ఖవే, వుత్తో వజ్జేమీతి వత్తబ్బో. యో వదేయ్య, ఆపత్తి దుక్కటస్సా’’తి.
తేన ఖో పన సమయేన అఞ్ఞతరో భిక్ఖు గామకం గచ్ఛతి. అఞ్ఞతరో భిక్ఖు తం భిక్ఖుం ఏతదవోచ – ‘‘ఆవుసో, మయ్హం ఉపట్ఠాకకులం వుత్తో వజ్జేహీ’’తి. సో గన్త్వా యుగసాటకం ఆహరాపేత్వా ఏకం అత్తనా పరిభుఞ్జి, ఏకం తస్స భిక్ఖునో అదాసి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. న చ, భిక్ఖవే, వుత్తో వజ్జేహీతి వత్తబ్బో. యో వదేయ్య, ఆపత్తి దుక్కటస్సా’’తి.
తేన ఖో పన సమయేన అఞ్ఞతరో భిక్ఖు గామకం గచ్ఛన్తో అఞ్ఞతరం భిక్ఖుం ఏతదవోచ – ‘‘ఆవుసో, తుయ్హం ఉపట్ఠాకకులం వుత్తో వజ్జేమీ’’తి. సోపి ఏవమాహ – ‘‘వుత్తో వజ్జేహీ’’తి. సో గన్త్వా ఆళ్హకం సప్పిం తులం గుళం దోణం తణ్డులం ఆహరాపేత్వా అత్తనా పరిభుఞ్జి. సో జానిత్వా తం చోదేసి – ‘‘అస్సమణోసి త్వ’’న్తి. తస్స కుక్కుచ్చం అహోసి…పే… ‘‘అనాపత్తి, భిక్ఖు, పారాజికస్స. న చ, భిక్ఖవే, వుత్తో వజ్జేమీతి వత్తబ్బో, న చ వుత్తో వజ్జేహీతి వత్తబ్బో. యో వదేయ్య, ఆపత్తి దుక్కటస్సా’’తి.