౩. తతియసిక్ఖాపదం

౮౦౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ద్వే భిక్ఖునియో అనభిరతియా పీళితా ఓవరకం పవిసిత్వా తలఘాతకం కరోన్తి. భిక్ఖునియో తేన సద్దేన ఉపధావిత్వా తా భిక్ఖునియో ఏతదవోచుం – ‘‘కిస్స తుమ్హే, అయ్యే, పురిసేన సద్ధిం సమ్పదుస్సథా’’తి? ‘‘న మయం, అయ్యే, పురిసేన సద్ధిం సమ్పదుస్సామా’’తి. భిక్ఖునీనం ఏతమత్థం ఆరోచేసుం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో తలఘాతకం కరిస్సన్తీ’’తి…పే… సచ్చం కిర, భిక్ఖవే, భిక్ఖునియో తలఘాతకం కరోన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో తలఘాతకం కరిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౮౦౩. ‘‘తలఘాతకే పాచిత్తియ’’న్తి.

౮౦౪. తలఘాతకం నామ సమ్ఫస్సం సాదియన్తీ అన్తమసో ఉప్పలపత్తేనపి ముత్తకరణే పహారం దేతి, ఆపత్తి పాచిత్తియస్స.

౮౦౫. అనాపత్తి ఆబాధపచ్చయా, ఉమ్మత్తికాయ, ఆదికమ్మికాయాతి.

తతియసిక్ఖాపదం నిట్ఠితం.