౫. కబళవగ్గో
౬౧౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ అనాహటే కబళే ముఖద్వారం వివరన్తి…పే….
‘‘న అనాహటే కబళే ముఖద్వారం వివరిస్సామీతి సిక్ఖా కరణీయా’’తి.
న అనాహటే కబళే ముఖద్వారం వివరితబ్బం. యో అనాదరియం పటిచ్చ అనాహటే కబళే ముఖద్వారం వివరతి, ఆపత్తి దుక్కటస్స.
అనాపత్తి అసఞ్చిచ్చ…పే… ఆదికమ్మికస్సాతి.
పఠమసిక్ఖాపదం నిట్ఠితం.
౬౧౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ భుఞ్జమానా సబ్బం హత్థం ముఖే పక్ఖిపన్తి…పే….
‘‘న భుఞ్జమానో సబ్బం హత్థం ముఖే పక్ఖిపిస్సామీతి సిక్ఖాకరణీయా’’తి.
న భుఞ్జమానేన సబ్బో హత్థో ముఖే పక్ఖిపితబ్బో. యో అనాదరియం పటిచ్చ భుఞ్జమానో సబ్బం హత్థం ముఖే పక్ఖిపతి, ఆపత్తి దుక్కటస్స.
అనాపత్తి అసఞ్చిచ్చ…పే… ఆదికమ్మికస్సాతి.
దుతియసిక్ఖాపదం నిట్ఠితం.
౬౧౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సకబళేన ముఖేన బ్యాహరన్తి…పే….
‘‘న సకబళేన ముఖేన బ్యాహరిస్సామీతి సిక్ఖా కరణీయా’’తి.
న సకబళేన ముఖేన బ్యాహరితబ్బం. యో అనాదరియం పటిచ్చ సకబళేన ముఖేన బ్యాహరతి, ఆపత్తి దుక్కటస్స.
అనాపత్తి అసఞ్చిచ్చ…పే… ఆదికమ్మికస్సాతి.
తతియసిక్ఖాపదం నిట్ఠితం.
౬౨౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ పిణ్డుక్ఖేపకం భుఞ్జన్తి…పే….
‘‘న పిణ్డుక్ఖేపకం భుఞ్జిస్సామీతి సిక్ఖా కరణీయా’’తి.
న పిణ్డుక్ఖేపకం భుఞ్జితబ్బం. యో అనాదరియం పటిచ్చ పిణ్డుక్ఖేపకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఖజ్జకే, ఫలాఫలే, ఆపదాసు, ఉమ్మత్తకస్స, ఆదికమ్మికస్సాతి.
చతుత్థసిక్ఖాపదం నిట్ఠితం.
౬౨౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ కబళావచ్ఛేదకం భుఞ్జన్తి…పే….
‘‘న కబళావచ్ఛేదకం భుఞ్జిస్సామీతి సిక్ఖా కరణీయా’’తి.
న కబళావచ్ఛేదకం భుఞ్జితబ్బం. యో అనాదరియం పటిచ్చ కబళావచ్ఛేదకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఖజ్జకే ఫలాఫలే, ఉత్తరిభఙ్గే, ఆపదాసు, ఉమ్మత్తకస్స, ఆదికమ్మికస్సాతి.
పఞ్చమసిక్ఖాపదం నిట్ఠితం.
౬౨౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ అవగణ్డకారకం భుఞ్జన్తి…పే….
‘‘న అవగణ్డకారకం భుఞ్జిస్సామీతి సిక్ఖా కరణీయా’’తి.
న అవగణ్డకారకం భుఞ్జితబ్బం. యో అనాదరియం పటిచ్చ ఏకతో వా ఉభతో వా గణ్డం కత్వా భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఫలాఫలే, ఆపదాసు, ఉమ్మత్తకస్స, ఆదికమ్మికస్సాతి.
ఛట్ఠసిక్ఖాపదం నిట్ఠితం.
౬౨౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ హత్థనిద్ధునకం భుఞ్జన్తి…పే….
‘‘న హత్థనిద్ధునకం భుఞ్జిస్సామీతి సిక్ఖా కరణీయా’’తి.
న హత్థనిద్ధునకం భుఞ్జితబ్బం. యో అనాదరియం పటిచ్చ హత్థనిద్ధునకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ, అస్సతియా, అజానన్తస్స, గిలానస్స, కచవరం ఛడ్డేన్తో హత్థం నిద్ధునాతి, ఆపదాసు, ఉమ్మత్తకస్స, ఆదికమ్మికస్సాతి.
సత్తమసిక్ఖాపదం నిట్ఠితం.
౬౨౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సిత్థావకారకం భుఞ్జన్తి…పే….
‘‘న సిత్థావకారకం భుఞ్జిస్సామీతి సిక్ఖా కరణీయా’’తి.
న సిత్థావకారకం భుఞ్జితబ్బం. యో అనాదరియం పటిచ్చ సిత్థావకారకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ, అస్సతియా, అజానన్తస్స, గిలానస్స, కచవరం ఛడ్డేన్తో సిత్థం ఛడ్డయతి, ఆపదాసు, ఉమ్మత్తకస్స, ఆదికమ్మికస్సాతి.
అట్ఠమసిక్ఖాపదం నిట్ఠితం.
౬౨౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ జివ్హానిచ్ఛారకం భుఞ్జన్తి…పే….
‘‘న జివ్హానిచ్ఛారకం భుఞ్జిస్సామీతి సిక్ఖా కరణీయా’’తి.
న జివ్హానిచ్ఛారకం భుఞ్జితబ్బం. యో అనాదరియం పటిచ్చ జివ్హానిచ్ఛారకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ…పే… ఆదికమ్మికస్సాతి.
నవమసిక్ఖాపదం నిట్ఠితం.
౬౨౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ చపుచపుకారకం భుఞ్జన్తి…పే….
‘‘న చపుచపుకారకం భుఞ్జిస్సామీతి సిక్ఖా కరణీయా’’తి.
న చపుచపుకారకం భుఞ్జితబ్బం. యో అనాదరియం పటిచ్చ చపుచపుకారకం భుఞ్జతి, ఆపత్తి దుక్కటస్స.
అనాపత్తి అసఞ్చిచ్చ…పే… ఆదికమ్మికస్సాతి.
దసమసిక్ఖాపదం నిట్ఠితం.
కబళవగ్గో పఞ్చమో.