౭. సేఖియకణ్డం

౧. పరిమణ్డలవగ్గో

ఇమే ఖో పనాయస్మన్తో సేఖియా

ధమ్మా ఉద్దేసం ఆగచ్ఛన్తి.

౫౭౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ పురతోపి పచ్ఛతోపి ఓలమ్బేన్తా నివాసేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా పురతోపి పచ్ఛతోపి ఓలమ్బేన్తా నివాసేస్సన్తి, సేయ్యథాపి గిహీ కామభోగినో’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ పురతోపి పచ్ఛతోపి ఓలమ్బేన్తా నివాసేస్సన్తీ’’తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఛబ్బగ్గియే భిక్ఖూ పటిపుచ్ఛి – ‘‘సచ్చం కిర తుమ్హే, భిక్ఖవే, పురతోపి పచ్ఛతోపి ఓలమ్బేన్తా నివాసేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, పురతోపి పచ్ఛతోపి ఓలమ్బేన్తా నివాసేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

‘‘పరిమణ్డలం నివాసేస్సామీతి సిక్ఖా కరణీయా’’తి.

పరిమణ్డలం నివాసేతబ్బం నాభిమణ్డలం జాణుమణ్డలం పటిచ్ఛాదేన్తేన. యో అనాదరియం పటిచ్చ పురతో వా పచ్ఛతో వా ఓలమ్బేన్తో నివాసేతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

పఠమసిక్ఖాపదం నిట్ఠితం.

౫౭౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ పురతోపి పచ్ఛతోపి ఓలమ్బేన్తా పారుపన్తి…పే….

‘‘పరిమణ్డలం పారుపిస్సామీతి సిక్ఖా కరణీయా’’తి.

పరిమణ్డలం పారుపితబ్బం ఉభో కణ్ణే సమం కత్వా. యో అనాదరియం పటిచ్చ పురతో వా పచ్ఛతో వా ఓలమ్బేన్తో పారుపతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

దుతియసిక్ఖాపదం నిట్ఠితం.

౫౭౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ కాయం వివరిత్వా అన్తరఘరే గచ్ఛన్తి…పే….

‘‘సుప్పటిచ్ఛన్నో అన్తరఘరే గమిస్సామీతి సిక్ఖా కరణీయా’’తి.

సుప్పటిచ్ఛన్నేన అన్తరఘరే గన్తబ్బం. యో అనాదరియం పటిచ్చ కాయం వివరిత్వా అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

తతియసిక్ఖాపదం నిట్ఠితం.

౫౭౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ కాయం వివరిత్వా అన్తరఘరే నిసీదన్తి…పే….

‘‘సుప్పటిచ్ఛన్నో అన్తరఘరే నిసీదిస్సామీతి సిక్ఖా కరణీయా’’తి.

సుప్పటిచ్ఛన్నేన అన్తరఘరే నిసీదితబ్బం. యో అనాదరియం పటిచ్చ కాయం వివరిత్వా అన్తరఘరే నిసీదతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, వాసూపగతస్స, ఆపదాసు, ఉమ్మత్తకస్స, ఆదికమ్మికస్సాతి.

చతుత్థసిక్ఖాపదం నిట్ఠితం.

౫౮౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ హత్థమ్పి పాదమ్పి కీళాపేన్తా అన్తరఘరే గచ్ఛన్తి…పే….

‘‘సుసంవుతో అన్తరఘరే గమిస్సామీతి సిక్ఖా కరణీయా’’తి.

సుసంవుతేన అన్తరఘరే గన్తబ్బం. యో అనాదరియం పటిచ్చ హత్థం వా పాదం వా కీళాపేన్తో అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఉమ్మత్తకస్స, ఆదికమ్మికస్సాతి.

పఞ్చమసిక్ఖాపదం నిట్ఠితం.

౫౮౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ హత్థమ్పి పాదమ్పి కీళాపేన్తా అన్తరఘరే నిసీదన్తి…పే….

‘‘సుసంవుతో అన్తరఘరే నిసీదిస్సామీతి సిక్ఖా కరణీయా’’తి.

సుసంవుతేన అన్తరఘరే నిసీదితబ్బం. యో అనాదరియం పటిచ్చ హత్థం వా పాదం వా కీళాపేన్తో అన్తరఘరే నిసీదతి, ఆపత్తి దుక్కటస్స.

ఛట్ఠసిక్ఖాపదం నిట్ఠితం.

౫౮౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ తహం తహం ఓలోకేన్తా అన్తరఘరే గచ్ఛన్తి…పే….

‘‘ఓక్ఖిత్తచక్ఖు అన్తరఘరే గమిస్సామీతి సిక్ఖా కరణీయా’’తి.

ఓక్ఖిత్తచక్ఖునా అన్తరఘరే గన్తబ్బం యుగమత్తం పేక్ఖన్తేన. యో అనాదరియం పటిచ్చ తహం తహం ఓలోకేన్తో అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

సత్తమసిక్ఖాపదం నిట్ఠితం.

౫౮౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ తహం తహం ఓలోకేన్తా అన్తరఘరే నిసీదన్తి…పే….

‘‘ఓక్ఖిత్తచక్ఖు అన్తరఘరే నిసీదిస్సామీతి సిక్ఖా కరణీయా’’తి.

ఓక్ఖిత్తచక్ఖునా అన్తరఘరే నిసీదితబ్బం యుగమత్తం పేక్ఖన్తేన. యో అనాదరియం పటిచ్చ తహం తహం ఓలోకేన్తో అన్తరఘరే నిసీదతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

అట్ఠమసిక్ఖాపదం నిట్ఠితం.

౫౮౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉక్ఖిత్తకాయ అన్తరఘరే గచ్ఛన్తి…పే….

‘‘న ఉక్ఖిత్తకాయ అన్తరఘరే గమిస్సామీతి సిక్ఖా కరణీయా’’తి.

న ఉక్ఖిత్తకాయ అన్తరఘరే గన్తబ్బం. యో అనాదరియం పటిచ్చ ఏకతో వా ఉభతో వా ఉక్ఖిపిత్వా అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

నవమసిక్ఖాపదం నిట్ఠితం.

౫౮౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉక్ఖిత్తకాయ అన్తరఘరే నిసీదన్తి…పే….

‘‘న ఉక్ఖిత్తకాయ అన్తరఘరే నిసీదిస్సామీతి సిక్ఖా కరణీయా’’తి.

న ఉక్ఖిత్తకాయ అన్తరఘరే నిసీదితబ్బం. యో అనాదరియం పటిచ్చ ఏకతో వా ఉభతో వా ఉక్ఖిపిత్వా అన్తరఘరే నిసీదతి, ఆపత్తి దుక్కటస్స.

దసమసిక్ఖాపదం నిట్ఠితం.

పరిమణ్డలవగ్గో పఠమో.

౨. ఉజ్జగ్ఘికవగ్గో

౫౮౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ మహాహసితం హసన్తా అన్తరఘరే గచ్ఛన్తి…పే….

‘‘న ఉజ్జగ్ఘికాయ అన్తరఘరే గమిస్సామీతి సిక్ఖా కరణీయా’’తి.

న ఉజ్జగ్ఘికాయ అన్తరఘరే గన్తబ్బం. యో అనాదరియం పటిచ్చ మహాహసితం హసన్తో అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, హసనీయస్మిం వత్థుస్మిం మిహితమత్తం కరోతి, ఆపదాసు, ఉమ్మత్తకస్స, ఆదికమ్మికస్సాతి.

పఠమసిక్ఖాపదం నిట్ఠితం.

౫౮౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ మహాహసితం హసన్తా అన్తరఘరే నిసీదన్తి…పే….

‘‘న ఉజ్జగ్ఘికాయ అన్తరఘరే నిసీదిస్సామీతి సిక్ఖా కరణీయా’’తి.

న ఉజ్జగ్ఘికాయ అన్తరఘరే నిసీదితబ్బం. యో అనాదరియం పటిచ్చ మహాహసితం హసన్తో అన్తరఘరే నిసీదతి, ఆపత్తి దుక్కటస్స.

దుతియసిక్ఖాపదం నిట్ఠితం.

౫౮౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉచ్చాసద్దం మహాసద్దం కరోన్తా అన్తరఘరే గచ్ఛన్తి…పే….

‘‘అప్పసద్దో అన్తరఘరే గమిస్సామీతి సిక్ఖా కరణీయా’’తి.

అప్పసద్దేన అన్తరఘరే గన్తబ్బం. యో అనాదరియం పటిచ్చ ఉచ్చాసద్దం మహాసద్దం కరోన్తో అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స, ఆదికమ్మికస్సాతి.

తతియసిక్ఖాపదం నిట్ఠితం.

౫౮౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉచ్చాసద్దం మహాసద్దం కరోన్తా అన్తరఘరే నిసీదన్తి…పే….

‘‘అప్పసద్దో అన్తరఘరే నిసీదిస్సామీతి సిక్ఖా కరణీయా’’తి.

అప్పసద్దేన అన్తరఘరే నిసీదితబ్బం. యో అనాదరియం పటిచ్చ ఉచ్చాసద్దం మహాసద్దం కరోన్తో అన్తరఘరే నిసీదతి, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

చతుత్థసిక్ఖాపదం నిట్ఠితం.

౫౯౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ కాయప్పచాలకం అన్తరఘరే గచ్ఛన్తి కాయం ఓలమ్బేన్తా…పే….

‘‘న కాయప్పచాలకం అన్తరఘరే గమిస్సామీతి సిక్ఖా కరణీయా’’తి.

న కాయప్పచాలకం అన్తరఘరే గన్తబ్బం. కాయం పగ్గహేత్వా గన్తబ్బం. యో అనాదరియం పటిచ్చ కాయప్పచాలకం అన్తరఘరే గచ్ఛతి కాయం ఓలమ్బేన్తో, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

పఞ్చమసిక్ఖాపదం నిట్ఠితం.

౫౯౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ కాయప్పచాలకం అన్తరఘరే నిసీదన్తి, కాయం ఓలమ్బేన్తా…పే….

‘‘న కాయప్పచాలకం అన్తరఘరే నిసీదిస్సామీతి సిక్ఖా కరణీయా’’తి.

న కాయప్పచాలకం అన్తరఘరే నిసీదితబ్బం. కాయం పగ్గహేత్వా నిసీదితబ్బం. యో అనాదరియం పటిచ్చ కాయప్పచాలకం అన్తరఘరే నిసీదతి కాయం ఓలమ్బేన్తో, ఆపత్తి దుక్కటస్స.

ఛట్ఠసిక్ఖాపదం నిట్ఠితం.

౫౯౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ బాహుప్పచాలకం అన్తరఘరే గచ్ఛన్తి బాహుం ఓలమ్బేన్తా…పే….

‘‘న బాహుప్పచాలకం అన్తరఘరే గమిస్సామీతి సిక్ఖా కరణీయా’’తి.

న బాహుప్పచాలకం అన్తరఘరే గన్తబ్బం. బాహుం పగ్గహేత్వా గన్తబ్బం. యో అనాదరియం పటిచ్చ బాహుప్పచాలకం అన్తరఘరే గచ్ఛతి బాహుం ఓలమ్బేన్తో, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

సత్తమసిక్ఖాపదం నిట్ఠితం.

౫౯౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ బాహుప్పచాలకం అన్తరఘరే నిసీదన్తి బాహుం ఓలమ్బేన్తా…పే….

‘‘న బాహుప్పచాలకం అన్తరఘరే నిసీదిస్సామీతి సిక్ఖా కరణీయా’’తి.

న బాహుప్పచాలకం అన్తరఘరే నిసీదితబ్బం. బాహుం పగ్గహేత్వా నిసీదితబ్బం. యో అనాదరియం పటిచ్చ బాహుప్పచాలకం అన్తరఘరే నిసీదతి బాహుం ఓలమ్బేన్తో, ఆపత్తి దుక్కటస్స.

అట్ఠమసిక్ఖాపదం నిట్ఠితం.

౫౯౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డకస్స ఆరామే. తేన ఖో పన సమయేన ఛబ్బగ్గియా భిక్ఖూ సీసప్పచాలకం అన్తరఘరే గచ్ఛన్తి సీసం ఓలమ్బేన్తా…పే….

‘‘న సీసప్పచాలకం అన్తరఘరే గమిస్సామీతి సిక్ఖా కరణీయా’’తి.

న సీసప్పచాలకం అన్తరఘరే గన్తబ్బం. సీసం పగ్గహేత్వా గన్తబ్బం. యో అనాదరియం పటిచ్చ సీసప్పచాలకం అన్తరఘరే గచ్ఛతి సీసం ఓలమ్బేన్తో, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

నవమసిక్ఖాపదం నిట్ఠితం.

౫౯౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సీసప్పచాలకం అన్తరఘరే నిసీదన్తి సీసం ఓలమ్బేన్తా…పే….

‘‘న సీసప్పచాలకం అన్తరఘరే నిసీదిస్సామీతి సిక్ఖా కరణీయా’’తి.

న సీసప్పచాలకం అన్తరఘరే నిసీదితబ్బం. సీసం పగ్గహేత్వా నిసీదితబ్బం. యో అనాదరియం పటిచ్చ సీసప్పచాలకం అన్తరఘరే నిసీదతి సీసం ఓలమ్బేన్తో, ఆపత్తి దుక్కటస్స.

దసమసిక్ఖాపదం నిట్ఠితం.

ఉజ్జగ్ఘికవగ్గో దుతియో.

౩. ఖమ్భకతవగ్గో

౫౯౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఖమ్భకతా అన్తరఘరే గచ్ఛన్తి…పే….

‘‘న ఖమ్భకతో అన్తరఘరే గమిస్సామీతి సిక్ఖా కరణీయా’’తి.

న ఖమ్భకతేన అన్తరఘరే గన్తబ్బం. యో అనాదరియం పటిచ్చ ఏకతో వా ఉభతో వా ఖమ్భం కత్వా అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

పఠమసిక్ఖాపదం నిట్ఠితం.

౫౯౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఖమ్భకతా అన్తరఘరే నిసీదన్తి…పే….

‘‘న ఖమ్భకతో అన్తరఘరే నిసీదిస్సామీతి సిక్ఖా కరణీయా’’తి.

న ఖమ్భకతేన అన్తరఘరే నిసీదితబ్బం. యో అనాదరియం పటిచ్చ ఏకతో వా ఉభతో వా ఖమ్భం కత్వా అన్తరఘరే నిసీదతి, ఆపత్తి దుక్కటస్స.

దుతియసిక్ఖాపదం నిట్ఠితం.

౫౯౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ససీసం పారుపిత్వా అన్తరఘరే గచ్ఛన్తి…పే….

‘‘న ఓగుణ్ఠితో అన్తరఘరే గమిస్సామీతి సిక్ఖా కరణీయా’’తి.

న ఓగుణ్ఠితేన అన్తరఘరే గన్తబ్బం. యో అనాదరియం పటిచ్చ ససీసం పారుపిత్వా అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

తతియసిక్ఖాపదం నిట్ఠితం.

౫౯౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ససీసం పారుపిత్వా అన్తరఘరే నిసీదన్తి…పే….

‘‘న ఓగుణ్ఠితో అన్తరఘరే నిసీదిస్సామీతి సిక్ఖా కరణీయా’’తి.

న ఓగుణ్ఠితేన అన్తరఘరే నిసీదితబ్బం. యో అనాదరియం పటిచ్చ ససీసం పారుపిత్వా అన్తరఘరే నిసీదతి, ఆపత్తి దుక్కటస్స.

చతుత్థసిక్ఖాపదం నిట్ఠితం.

౬౦౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉక్కుటికాయ అన్తరఘరే గచ్ఛన్తి…పే….

‘‘న ఉక్కుటికాయ అన్తరఘరే గమిస్సామీతి సిక్ఖా కరణీయా’’తి.

న ఉక్కుటికాయ అన్తరఘరే గన్తబ్బం. యో అనాదరియం పటిచ్చ ఉక్కుటికాయ అన్తరఘరే గచ్ఛతి, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

పఞ్చమసిక్ఖాపదం నిట్ఠితం.

౬౦౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ పల్లత్థికాయ [పల్లత్తికాయ (క.)] అన్తరఘరే నిసీదన్తి…పే….

‘‘న పల్లత్థికాయ అన్తరఘరే నిసీదిస్సామీతి సిక్ఖా కరణీయా’’తి.

న పల్లత్థికాయ అన్తరఘరే నిసీదితబ్బం. యో అనాదరియం పటిచ్చ హత్థపల్లత్థికాయ వా దుస్సపల్లత్థికాయ వా అన్తరఘరే నిసీదతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, వాసూపగతస్స, ఆపదాసు,

ఉమ్మత్తకస్స, ఆదికమ్మికస్సాతి.

ఛట్ఠసిక్ఖాపదం నిట్ఠితం.

౬౦౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ అసక్కచ్చం పిణ్డపాతం పటిగ్గణ్హన్తి ఛడ్డేతుకామా వియ…పే….

‘‘సక్కచ్చం పిణ్డపాతం పటిగ్గహేస్సామీతి సిక్ఖా కరణీయా’’తి.

సక్కచ్చం పిణ్డపాతో పటిగ్గహేతబ్బో. యో అనాదరియం పటిచ్చ అసక్కచ్చం పిణ్డపాతం పటిగ్గణ్హాతి ఛడ్డేతుకామో వియ, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

సత్తమసిక్ఖాపదం నిట్ఠితం.