౪. సక్కచ్చవగ్గో

౬౦౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ అసక్కచ్చం పిణ్డపాతం భుఞ్జన్తి అభుఞ్జితుకామా వియ…పే….

‘‘సక్కచ్చం పిణ్డపాతం భుఞ్జిస్సామీతి సిక్ఖా కరణీయా’’తి.

సక్కచ్చం పిణ్డపాతో భుఞ్జితబ్బో. యో అనాదరియం పటిచ్చ అసక్కచ్చం పిణ్డపాతం భుఞ్జతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఆపదాసు, ఉమ్మత్తకస్స,

ఆదికమ్మికస్సాతి.

పఠమసిక్ఖాపదం నిట్ఠితం.

౬౦౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ తహం తహం ఓలోకేన్తా పిణ్డపాతం భుఞ్జన్తి, ఆకిరన్తేపి అతిక్కన్తేపి న జానన్తి…పే….

‘‘పత్తసఞ్ఞీ పిణ్డపాతం భుఞ్జిస్సామీతి సిక్ఖా కరణీయా’’తి.

పత్తసఞ్ఞినా పిణ్డపాతో భుఞ్జితబ్బో. యో అనాదరియం పటిచ్చ తహం తహం ఓలోకేన్తో పిణ్డపాతం భుఞ్జతి, ఆపత్తి దుక్కటస్స.

అనాపత్తి అసఞ్చిచ్చ…పే… ఆదికమ్మికస్సాతి.

దుతియసిక్ఖాపదం నిట్ఠితం.

౬౦౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ తహం తహం ఓమసిత్వా [ఓమద్దిత్వా (క.)] పిణ్డపాతం భుఞ్జన్తి…పే….

‘‘సపదానం పిణ్డపాతం భుఞ్జిస్సామీతి సిక్ఖా కరణీయా’’తి.

సపదానం పిణ్డపాతో భుఞ్జితబ్బో. యో అనాదరియం పటిచ్చ తహం తహం ఓమసిత్వా [ఓమద్దిత్వా (క.)] పిణ్డపాతం భుఞ్జతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, అఞ్ఞేసం దేన్తో ఓమసతి, అఞ్ఞస్స భాజనే ఆకిరన్తో ఓమసతి, ఉత్తరిభఙ్గే, ఆపదాసు, ఉమ్మత్తకస్స, ఆదికమ్మికస్సాతి.

తతియసిక్ఖాపదం నిట్ఠితం.

౬౦౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ పిణ్డపాతం భుఞ్జన్తా సూపఞ్ఞేవ బహుం భుఞ్జన్తి…పే….

‘‘సమసూపకం పిణ్డపాతం భుఞ్జిస్సామీతి సిక్ఖా కరణీయా’’తి.

సూపో నామ ద్వే సూపా – ముగ్గసూపో, మాససూపో హత్థహారియో. సమసూపకో పిణ్డపాతో భుఞ్జితబ్బో. యో అనాదరియం పటిచ్చ సూపఞ్ఞేవ బహుం భుఞ్జతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, రసరసే, ఞాతకానం పవారితానం, అత్తనో ధనేన, ఆపదాసు, ఉమ్మత్తకస్స, ఆదికమ్మికస్సాతి.

చతుత్థసిక్ఖాపదం నిట్ఠితం.

౬౧౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ థూపకతో ఓమద్దిత్వా పిణ్డపాతం భుఞ్జన్తి…పే….

‘‘న థూపకతో ఓమద్దిత్వా పిణ్డపాతం భుఞ్జిస్సామీతి సిక్ఖా కరణీయా’’తి.

న థూపకతో ఓమద్దిత్వా పిణ్డపాతో భుఞ్జితబ్బో. యో అనాదరియం పటిచ్చ థూపకతో ఓమద్దిత్వా పిణ్డపాతం భుఞ్జతి ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, పరిత్తకే సేసే ఏకతో సంకడ్ఢిత్వా ఓమద్దిత్వా భుఞ్జతి, ఆపదాసు, ఉమ్మత్తకస్స, ఆదికమ్మికస్సాతి.

పఞ్చమసిక్ఖాపదం నిట్ఠితం.

౬౧౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సూపమ్పి బ్యఞ్జనమ్పి ఓదనేన పటిచ్ఛాదేన్తి భియ్యోకమ్యతం ఉపాదాయ…పే….

‘‘న సూపం వా బ్యఞ్జనం వా ఓదనేన పటిచ్ఛాదేస్సామి భియ్యోకమ్యతం ఉపాదాయాతి సిక్ఖా కరణీయా’’తి.

న సూపం వా బ్యఞ్జనం వా ఓదనేన పటిచ్ఛాదేతబ్బం భియ్యోకమ్యతం ఉపాదాయ. యో అనాదరియం పటిచ్చ సూపం వా బ్యఞ్జనం వా ఓదనేన పటిచ్ఛాదేతి భియ్యోకమ్యతం ఉపాదాయ, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, సామికా పటిచ్ఛాదేత్వా దేన్తి, న భియ్యోకమ్యతం ఉపాదాయ, ఆపదాసు, ఉమ్మత్తకస్స, ఆదికమ్మికస్సాతి.

ఛట్ఠసిక్ఖాపదం నిట్ఠితం.

౬౧౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జిస్సన్తి! కస్స సమ్పన్నం న మనాపం! కస్స సాదుం న రుచ్చతీ’’తి! అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జిస్సన్తీ’’తి…పే… సచ్చం కిర తుమ్హే, భిక్ఖవే, సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జిస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

‘‘న సూపం వా ఓదనం వా అత్తనో అత్థాయ విఞ్ఞాపేత్వా భుఞ్జిస్సామీతి సిక్ఖా కరణీయా’’తి.

ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.

౬౧౩. తేన ఖో పన సమయేన భిక్ఖూ గిలానా హోన్తి. గిలానపుచ్ఛకా భిక్ఖూ గిలానే భిక్ఖూ ఏతదవోచుం – ‘‘కచ్చావుసో, ఖమనీయం, కచ్చి యాపనీయ’’న్తి? ‘‘పుబ్బే మయం, ఆవుసో, సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జామ, తేన నో ఫాసు హోతి. ఇదాని పన – ‘‘భగవతా పటిక్ఖిత్త’’న్తి కుక్కుచ్చాయన్తా న విఞ్ఞాపేమ, తేన నో న ఫాసు హోతీ’’తి. భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానేన భిక్ఖునా సూపమ్పి ఓదనమ్పి అత్తనో అత్థాయ విఞ్ఞాపేత్వా భుఞ్జితుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

‘‘న సూపం వా ఓదనం వా అగిలానో అత్తనో అత్థాయ విఞ్ఞాపేత్వా భుఞ్జిస్సామీతి సిక్ఖా కరణీయా’’తి.

న సూపం వా ఓదనం వా అగిలానేన అత్తనో అత్థాయ విఞ్ఞాపేత్వా భుఞ్జితబ్బం. యో అనాదరియం పటిచ్చ సూపం వా ఓదనం వా అగిలానో అత్తనో అత్థాయ విఞ్ఞాపేత్వా భుఞ్జతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఞాతకానం పవారితానం, అఞ్ఞస్సత్థాయ, అత్తనో ధనేన, ఆపదాసు, ఉమ్మత్తకస్స, ఆదికమ్మికస్సాతి.

సత్తమసిక్ఖాపదం నిట్ఠితం.

౬౧౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ ఉజ్ఝానసఞ్ఞీ పరేసం పత్తం ఓలోకేన్తి…పే….

‘‘న ఉజ్ఝానసఞ్ఞీ పరేసం పత్తం ఓలోకేస్సామీతి సిక్ఖా కరణీయా’’తి.

న ఉజ్ఝానసఞ్ఞినా పరేసం పత్తో ఓలోకేతబ్బో. యో అనాదరియం పటిచ్చ ఉజ్ఝానసఞ్ఞీ పరేసం పత్తం ఓలోకేతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, ‘‘దస్సామీ’’తి వా ‘‘దాపేస్సామీ’’తి వా ఓలోకేతి, న ఉజ్ఝానసఞ్ఞిస్స, ఆపదాసు, ఉమ్మత్తకస్స, ఆదికమ్మికస్సాతి.

అట్ఠమసిక్ఖాపదం నిట్ఠితం.

౬౧౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ మహన్తం కబళం కరోన్తి…పే….

‘‘నాతిమహన్తం కబళం కరిస్సామీతి సిక్ఖా కరణీయా’’తి.

నాతిమహన్తో కబళో కాతబ్బో. యో అనాదరియం పటిచ్చ మహన్తం కబళం కరోతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తస్స, గిలానస్స, ఖజ్జకే, ఫలాఫలే, ఉత్తరిభఙ్గే, ఆపదాసు, ఉమ్మత్తకస్స, ఆదికమ్మికస్సాతి.

నవమసిక్ఖాపదం నిట్ఠితం.

౬౧౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ దీఘం ఆలోపం కరోన్తి…పే….

‘‘పరిమణ్డలం ఆలోపం కరిస్సామీతి సిక్ఖా కరణీయా’’తి.

పరిమణ్డలో ఆలోపో కాతబ్బో. యో అనాదరియం పటిచ్చ దీఘం ఆలోపం కరోతి, ఆపత్తి దుక్కటస్స.

దసమసిక్ఖాపదం నిట్ఠితం.

సక్కచ్చవగ్గో చతుత్థో.