౧౦. చీవరఅపనిధానసిక్ఖాపదం

౩౭౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన సత్తరసవగ్గియా భిక్ఖూ అసన్నిహితపరిక్ఖారా హోన్తి. ఛబ్బగ్గియా భిక్ఖూ సత్తరసవగ్గియానం భిక్ఖూనం పత్తమ్పి చీవరమ్పి అపనిధేన్తి. సత్తరసవగ్గియా భిక్ఖూ ఛబ్బగ్గియే భిక్ఖూ ఏతదవోచుం – ‘‘దేథావుసో, అమ్హాకం పత్తమ్పి చీవరమ్పీ’’తి. ఛబ్బగ్గియా భిక్ఖూ హసన్తి, తే రోదన్తి. భిక్ఖూ ఏవమాహంసు – ‘‘కిస్స తుమ్హే, ఆవుసో, రోదథా’’తి? ‘‘ఇమే, ఆవుసో, ఛబ్బగ్గియా భిక్ఖూ అమ్హాకం పత్తమ్పి చీవరమ్పి అపనిధేన్తీ’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ భిక్ఖూనం పత్తమ్పి చీవరమ్పి అపనిధేస్సన్తీ’’తి…పే… సచ్చం కిర తుమ్హే, భిక్ఖవే, భిక్ఖూనం పత్తమ్పి చీవరమ్పి అపనిధేథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, భిక్ఖూనం పత్తమ్పి చీవరమ్పి అపనిధేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౩౭౮. ‘‘యో పన భిక్ఖు భిక్ఖుస్స పత్తం వా చీవరం వా నిసీదనం వా సూచిఘరం వా కాయబన్ధనం వా అపనిధేయ్య వా అపనిధాపేయ్య వా, అన్తమసో హసాపేక్ఖోపి, పాచిత్తియ’’న్తి.

౩౭౯. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

భిక్ఖుస్సాతి అఞ్ఞస్స భిక్ఖుస్స.

పత్తో నామ ద్వే పత్తా – అయోపత్తో, మత్తికాపత్తో.

చీవరం నామ ఛన్నం చీవరానం అఞ్ఞతరం చీవరం, వికప్పనుపగం పచ్ఛిమం.

నిసీదనం నామ సదసం వుచ్చతి.

సూచిఘరం నామ ససూచికం వా అసూచికం వా.

కాయబన్ధనం నామ ద్వే కాయబన్ధనాని – పట్టికా, సూకరన్తకం.

అపనిధేయ్య వాతి సయం అపనిధేతి, ఆపత్తి పాచిత్తియస్స.

అపనిధాపేయ్య వాతి అఞ్ఞం ఆణాపేసి, ఆపత్తి పాచిత్తియస్స. అపనిధాపేయ్య వా తి అయ్యం ఆణాపేతి, ఆపత్తి పాచిత్తియస్స. సకిం ఆణత్తో బహుకమ్పి అపనిధేతి, ఆపత్తి పాచిత్తియస్స.

అన్తమసో హసాపేక్ఖోపీతి కీళాధిప్పాయో.

౩౮౦. ఉపసమ్పన్నే ఉపసమ్పన్నసఞ్ఞీ పత్తం వా చీవరం వా నిసీదనం వా సూచిఘరం వా కాయబన్ధనం వా అపనిధేతి వా అపనిధాపేతి వా, అన్తమసో హసాపేక్ఖోపి, ఆపత్తి పాచిత్తియస్స. ఉపసమ్పన్నే వేమతికో…పే… ఉపసమ్పన్నే అనుపసమ్పన్నసఞ్ఞీ పత్తం వా చీవరం వా నిసీదనం వా సూచిఘరం వా కాయబన్ధనం వా అపనిధేతి వా అపనిధాపేతి వా, అన్తమసో హసాపేక్ఖోపి, ఆపత్తి పాచిత్తియస్స.

అఞ్ఞం పరిక్ఖారం అపనిధేతి వా అపనిధాపేతి వా, అన్తమసో హసాపేక్ఖోపి, ఆపత్తి దుక్కటస్స. అనుపసమ్పన్నస్స పత్తం వా చీవరం వా అఞ్ఞం వా పరిక్ఖారం అపనిధేతి వా అపనిధాపేతి వా, అన్తమసో హసాపేక్ఖోపి, ఆపత్తి దుక్కటస్స. అనుపసమ్పన్నే ఉపసమ్పన్నసఞ్ఞీ, ఆపత్తి దుక్కటస్స. అనుపసమ్పన్నే వేమతికో, ఆపత్తి దుక్కటస్స. అనుపసమ్పన్నే అనుపసమ్పన్నసఞ్ఞీ, ఆపత్తి దుక్కటస్స.

౩౮౧. అనాపత్తి నహసాధిప్పాయో, దున్నిక్ఖిత్తం పటిసామేతి, ‘‘ధమ్మిం కథం కత్వా దస్సామీ’’తి పటిసామేతి, ఉమ్మత్తకస్స, ఆదికమ్మికస్సాతి.

చీవరఅపనిధానసిక్ఖాపదం నిట్ఠితం దసమం.

సురాపానవగ్గో ఛట్ఠో.

తస్సుద్దానం –

సురా అఙ్గులి హాసో చ [తోయఞ్చ (ఇతిపి)], అనాదరియఞ్చ భింసనం;

జోతినహానదుబ్బణ్ణం, సామం అపనిధేన చాతి.