౮. సన్నిధికారకసిక్ఖాపదం

౨౫౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మతో ఆనన్దస్స ఉపజ్ఝాయో ఆయస్మా బేలట్ఠసీసో [బేలట్ఠిసీసో (సీ.) వేళట్ఠసీసో (స్యా.)] అరఞ్ఞే విహరతి. సో పిణ్డాయ చరిత్వా సుక్ఖకురం ఆరామం హరిత్వా సుక్ఖాపేత్వా నిక్ఖిపతి. యదా ఆహారేన అత్థో హోతి, తదా ఉదకేన తేమేత్వా తేమేత్వా భుఞ్జతి, చిరేన గామం పిణ్డాయ పవిసతి. భిక్ఖూ ఆయస్మన్తం బేలట్ఠసీసం ఏతదవోచుం – ‘‘కిస్స త్వం, ఆవుసో, చిరేన గామం పిణ్డాయ పవిససీ’’తి? అథ ఖో ఆయస్మా బేలట్ఠసీసో భిక్ఖూనం ఏతమత్థం ఆరోచేసి. ‘‘కిం పన త్వం, ఆవుసో, సన్నిధికారకం భోజనం భుఞ్జసీ’’తి? ‘‘ఏవమావుసో’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా బేలట్ఠసీసో సన్నిధికారకం భోజనం భుఞ్జిస్సతీ’’తి…పే… సచ్చం కిర త్వం, బేలట్ఠసీస, సన్నిధికారకం భోజనం భుఞ్జసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, బేలట్ఠసీస, సన్నిధికారకం భోజనం భుఞ్జిస్ససి! నేతం, బేలట్ఠసీస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౨౫౩. ‘‘యో పన భిక్ఖు సన్నిధికారకం ఖాదనీయం వా భోజనీయం వా ఖాదేయ్య వా భుఞ్జేయ్య వా, పాచిత్తియ’’న్తి.

౨౫౪. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

సన్నిధికారకం నామ అజ్జ పటిగ్గహితం అపరజ్జు ఖాదితం హోతి.

ఖాదనీయం నామ పఞ్చ భోజనాని – యామకాలికం సత్తాహకాలికం యావజీవికం ఠపేత్వా అవసేసం ఖాదనీయం నామ.

భోజనీయం నామ పఞ్చ భోజనాని – ఓదనో, కుమ్మాసో, సత్తు, మచ్ఛో, మంసం.

‘‘ఖాదిస్సామి భుఞ్జిస్సామీ’’తి పటిగ్గణ్హాతి, ఆపత్తి దుక్కటస్స. అజ్ఝోహారే అజ్ఝోహారే ఆపత్తి పాచిత్తియస్స.

౨౫౫. సన్నిధికారకే సన్నిధికారకసఞ్ఞీ ఖాదనీయం వా భోజనీయం వా ఖాదతి వా భుఞ్జతి వా, ఆపత్తి పాచిత్తియస్స. సన్నిధికారకే వేమతికో ఖాదనీయం వా భోజనీయం వా ఖాదతి వా భుఞ్జతి వా, ఆపత్తి పాచిత్తియస్స. సన్నిధికారకే అసన్నిధికారకసఞ్ఞీ ఖాదనీయం వా భోజనీయం వా ఖాదతి వా భుఞ్జతి వా, ఆపత్తి పాచిత్తియస్స.

యామకాలికం సత్తాహకాలికం యావజీవికం ఆహారత్థాయ పటిగ్గణ్హాతి, ఆపత్తి దుక్కటస్స. అజ్ఝోహారే అజ్ఝోహారే ఆపత్తి దుక్కటస్స. అసన్నిధికారకే సన్నిధికారకసఞ్ఞీ, ఆపత్తి దుక్కటస్స. అసన్నిధికారకే వేమతికో, ఆపత్తి దుక్కటస్స. అసన్నిధికారకే అసన్నిధికారకసఞ్ఞీ, అనాపత్తి.

౨౫౬. అనాపత్తి యావకాలికం యావకాలే నిదహిత్వా భుఞ్జతి, యామకాలికం యామే నిదహిత్వా భుఞ్జతి, సత్తాహకాలికం సత్తాహం నిదహిత్వా భుఞ్జతి, యావజీవికం సతి పచ్చయే పరిభుఞ్జతి, ఉమ్మత్తకస్స, ఆదికమ్మికస్సాతి.

సన్నిధికారకసిక్ఖాపదం నిట్ఠితం అట్ఠమం.