౭. సంవిధానసిక్ఖాపదం

౧౮౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ భిక్ఖునీహి సద్ధిం సంవిధాయ ఏకద్ధానమగ్గం పటిపజ్జన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘యథేవ మయం సపజాపతికా ఆహిణ్డామ, ఏవమేవిమే సమణా సక్యపుత్తియా భిక్ఖునీహి సద్ధిం సంవిధాయ ఆహిణ్డన్తీ’’తి! అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ భిక్ఖునీహి సద్ధిం సంవిధాయ ఏకద్ధానమగ్గం పటిపజ్జిస్సన్తీ’’తి…పే… ‘‘సచ్చం కిర తుమ్హే, భిక్ఖవే, భిక్ఖునీహి సద్ధిం సంవిధాయ ఏకద్ధానమగ్గం పటిపజ్జథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, భిక్ఖునీహి సద్ధిం సంవిధాయ ఏకద్ధానమగ్గం పటిపజ్జిస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ.

‘‘యో పన భిక్ఖు భిక్ఖునియా సద్ధిం సంవిధాయ ఏకద్ధానమగ్గం పటిపజ్జేయ్య, అన్తమసో గామన్తరమ్పి, పాచిత్తియ’’న్తి.

ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.

౧౮౧. తేన ఖో పన సమయేన సమ్బహులా భిక్ఖూ చ భిక్ఖునియో చ సాకేతా సావత్థిం అద్ధానమగ్గప్పటిపన్నా హోన్తి. అథ ఖో తా భిక్ఖునియో తే భిక్ఖూ ఏతదవోచుం – ‘‘మయమ్పి అయ్యేహి సద్ధిం గమిస్సామా’’తి. ‘‘న, భగినీ, కప్పతి భిక్ఖునియా సద్ధిం సంవిధాయ ఏకద్ధానమగ్గం పటిపజ్జితుం. తుమ్హే వా పఠమం గచ్ఛథ మయం వా గమిస్సామా’’తి. ‘‘అయ్యా, భన్తే, అగ్గపురిసా. అయ్యావ పఠమం గచ్ఛన్తూ’’తి. అథ ఖో తాసం భిక్ఖునీనం పచ్ఛా గచ్ఛన్తీనం అన్తరామగ్గే చోరా అచ్ఛిన్దింసు చ దూసేసుఞ్చ. అథ ఖో తా భిక్ఖునియో సావత్థిం గన్త్వా భిక్ఖునీనం ఏతమత్థం ఆరోచేసుం. భిక్ఖునియో భిక్ఖూనం ఏతమత్థం ఆరోచేసుం. భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, సత్థగమనీయే మగ్గే సాసఙ్కసమ్మతే సప్పటిభయే భిక్ఖునియా సద్ధిం సంవిధాయ ఏకద్ధానమగ్గం పటిపజ్జితుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౧౮౨. ‘‘యో పన భిక్ఖు భిక్ఖునియా సద్ధిం సంవిధాయ ఏకద్ధానమగ్గం పటిపజ్జేయ్య, అన్తమసో గామన్తరమ్పి, అఞ్ఞత్ర సమయా, పాచిత్తియం. తత్థాయం సమయో . సత్థగమనీయో హోతి మగ్గో సాసఙ్కసమ్మతో సప్పటిభయో – అయం తత్థ సమయో’’తి.

౧౮౩. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

భిక్ఖునీ నామ ఉభతోసఙ్ఘే ఉపసమ్పన్నా.

సద్ధిన్తి ఏకతో.

సంవిధాయాతి – ‘‘గచ్ఛామ, భగిని, గచ్ఛామాయ్య; గచ్ఛామాయ్య, గచ్ఛామ, భగిని; అజ్జ వా హియ్యో వా పరే వా గచ్ఛామా’’తి సంవిదహతి, ఆపత్తి దుక్కటస్స.

అన్తమసో గామన్తరమ్పీతి కుక్కుటసమ్పాతే గామే, గామన్తరే గామన్తరే ఆపత్తి పాచిత్తియస్స. అగామకే అరఞ్ఞే, అద్ధయోజనే అద్ధయోజనే ఆపత్తి పాచిత్తియస్స.

అఞ్ఞత్ర సమయాతి ఠపేత్వా సమయం.

సత్థగమనీయో నామ మగ్గో న సక్కా హోతి వినా సత్థేన గన్తుం.

సాసఙ్కం నామ తస్మిం మగ్గే [యస్మిం మగ్గే (?)] చోరానం నివిట్ఠోకాసో దిస్సతి, భుత్తోకాసో దిస్సతి, ఠితోకాసో దిస్సతి, నిసిన్నోకాసో దిస్సతి, నిపన్నోకాసో దిస్సతి.

సప్పటిభయం నామ తస్మిం మగ్గే చోరేహి మనుస్సా హతా దిస్సన్తి, విలుత్తా దిస్సన్తి, ఆకోటితా దిస్సన్తి, సప్పటిభయం గన్త్వా అప్పటిభయం దస్సేత్వా ఉయ్యోజేతబ్బా – ‘‘గచ్ఛథ భగినియో’’తి.

౧౮౪. సంవిదహితే సంవిదహితసఞ్ఞీ ఏకద్ధానమగ్గం పటిపజ్జతి, అన్తమసో గామన్తరమ్పి, అఞ్ఞత్ర సమయా, ఆపత్తి పాచిత్తియస్స. సంవిదహితే వేమతికో ఏకద్ధానమగ్గం పటిపజ్జతి, అన్తమసో గామన్తరమ్పి, అఞ్ఞత్ర సమయా, ఆపత్తి పాచిత్తియస్స. సంవిదహితే, అసంవిదహితసఞ్ఞీ ఏకద్ధానమగ్గం పటిపజ్జతి, అన్తమసో గామన్తరమ్పి, అఞ్ఞత్ర సమయా, ఆపత్తి పాచిత్తియస్స.

భిక్ఖు సంవిదహతి భిక్ఖునీ న సంవిదహతి, ఆపత్తి దుక్కటస్స. అసంవిదహితే సంవిదహితసఞ్ఞీ, ఆపత్తి దుక్కటస్స. అసంవిదహితే వేమతికో, ఆపత్తి దుక్కటస్స. అసంవిదహితే అసంవిదహితసఞ్ఞీ, అనాపత్తి.

౧౮౫. అనాపత్తి సమయే, అసంవిదహిత్వా గచ్ఛతి, భిక్ఖునీ సంవిదహతి, భిక్ఖు న సంవిదహతి, విసఙ్కేతేన గచ్ఛన్తి, ఆపదాసు, ఉమ్మత్తకస్స, ఆదికమ్మికస్సాతి.

సంవిధానసిక్ఖాపదం నిట్ఠితం సత్తమం.