౧౦. రహోనిసజ్జసిక్ఖాపదం
౧౯౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మతో ఉదాయిస్స పురాణదుతియికా భిక్ఖునీసు పబ్బజితా హోతి. సా ఆయస్మతో ఉదాయిస్స సన్తికే అభిక్ఖణం ఆగచ్ఛతి, ఆయస్మాపి ఉదాయీ తస్సా భిక్ఖునియా సన్తికే అభిక్ఖణం గచ్ఛతి. తేన ఖో పన సమయేన ఆయస్మా ఉదాయీ తస్సా భిక్ఖునియా సద్ధిం ఏకో ఏకాయ రహో నిసజ్జం కప్పేసి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉదాయీ భిక్ఖునియా సద్ధిం ఏకో ఏకాయ రహో నిసజ్జం కప్పేస్సతీ’’తి…పే… సచ్చం కిర త్వం, ఉదాయి, భిక్ఖునియా సద్ధిం ఏకో ఏకాయ రహో నిసజ్జం కప్పేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, భిక్ఖునియా సద్ధిం ఏకో ఏకాయ రహో నిసజ్జం కప్పేస్ససి! నేతం, మోఘపురిస అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౧౯౯. ‘‘యో పన భిక్ఖు భిక్ఖునియా సద్ధిం ఏకో ఏకాయ రహో నిసజ్జం కప్పేయ్య, పాచిత్తియ’’న్తి.
౨౦౦. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
భిక్ఖునీ నామ ఉభతోసఙ్ఘే ఉపసమ్పన్నా.
సద్ధిన్తి ఏకతో.
ఏకో ఏకాయాతి భిక్ఖు చేవ హోతి భిక్ఖునీ చ.
[పాచి. ౨౮౬, ౨౯౧; పారా. ౪౪౫,౪౫౪] రహో నామ చక్ఖుస్స రహో సోతస్స రహో. చక్ఖుస్స రహో నామ న సక్కా హోతి అక్ఖిం వా నిఖణీయమానే భముకం వా ఉక్ఖిపీయమానే సీసం వా ఉక్ఖిపీయమానే పస్సితుం. సోతస్స రహో నామ న సక్కా హోతి పకతికథా సోతుం.
నిసజ్జం కప్పేయ్యాతి భిక్ఖునియా నిసిన్నాయ భిక్ఖు ఉపనిసిన్నో వా హోతి ఉపనిపన్నో వా, ఆపత్తి పాచిత్తియస్స.
భిక్ఖు నిసిన్నే భిక్ఖునీ ఉపనిసిన్నా వా హోతి ఉపనిపన్నా వా, ఆపత్తి పాచిత్తియస్స. ఉభో వా నిసిన్నా హోన్తి ఉభో వా నిపన్నా, ఆపత్తి పాచిత్తియస్స.
౨౦౧. రహో రహోసఞ్ఞీ ఏకో ఏకాయ నిసజ్జం కప్పేతి, ఆపత్తి పాచిత్తియస్స. రహో వేమతికో ఏకో ఏకాయ నిసజ్జం కప్పేతి, ఆపత్తి పాచిత్తియస్స. రహో అరహోసఞ్ఞీ ఏకో ఏకాయ నిసజ్జం కప్పేతి, ఆపత్తి పాచిత్తియస్స.
అరహో రహోసఞ్ఞీ, ఆపత్తి దుక్కటస్స. అరహో వేమతికో, ఆపత్తి దుక్కటస్స. అరహో అరహోసఞ్ఞీ, అనాపత్తి.
౨౦౨. అనాపత్తి యో కోచి విఞ్ఞూ దుతియో హోతి, తిట్ఠతి న నిసీదతి, అరహోపేక్ఖో, అఞ్ఞవిహితో నిసీదతి, ఉమ్మత్తకస్స, ఆదికమ్మికస్సాతి.
రహోనిసజ్జసిక్ఖాపదం నిట్ఠితం దసమం.
ఓవాదవగ్గో తతియో.
తస్సుద్దానం –
అసమ్మతఅత్థఙ్గతూ, పస్సయామిసదానేన;
సిబ్బతి అద్ధానం నావం భుఞ్జేయ్య, ఏకో ఏకాయ తే దసాతి.