౭. మహాపేసకారసిక్ఖాపదవణ్ణనా

౬౪౨. సత్తమే కిఞ్చిమత్తం అనుపదజ్జేయ్యాతి ఇదం తస్స కత్తబ్బాకారమత్తదస్సనం, దానం పనేత్థ అఙ్గం న హోతి సుత్తవడ్ఢనవసేనేవ ఆపజ్జితబ్బత్తా. తేనేవ పదభాజనేపి ‘‘తస్స వచనేన ఆయతం వా విత్థతం వా అప్పితం వా కరోతి, పయోగే దుక్కటం, పటిలాభేన నిస్సగ్గియ’’న్తి సుత్తవడ్ఢనాకారమేవ దస్సేత్వా ఆపత్తి వుత్తా. మాతికాట్ఠకథాయమ్పి (కఙ్ఖా. అట్ఠ. మహాపేసకారసిక్ఖాపదవణ్ణనా) వుత్తం ‘‘న భిక్ఖునో పిణ్డపాతదానమత్తేన తం నిస్సగ్గియం హోతి. సచే పన తే తస్స వచనేన చీవరసామికానం హత్థతో సుత్తం గహేత్వా ఈసకమ్పి ఆయతం వా విత్థతం వా అప్పితం వా కరోన్తి, అథ తేసం పయోగే భిక్ఖునో దుక్కటం, పటిలాభేన నిస్సగ్గియం హోతీ’’తి. ఆయతాదీసు సత్తసు ఆకారేసు ఆదిమ్హి తయో ఆకారే సుత్తవడ్ఢనేన వినా న సక్కా కాతున్తి ఆహ ‘‘సుత్తవడ్ఢనఆకారమేవ దస్సేతీ’’తి. సువీతాదయో హి ఆకారే వినాపి సుత్తవడ్ఢనేన సక్కా కాతుం. సేసమేత్థ ఉత్తానమేవ. అఞ్ఞాతకఅప్పవారితానం తన్తవాయే ఉపసఙ్కమిత్వా వికప్పమాపజ్జనతా, చీవరస్స అత్తుద్దేసికతా, తస్స వచనేన సుత్తవడ్ఢనం, చీవరస్స పటిలాభోతి ఇమానేత్థ చత్తారి అఙ్గాని.

మహాపేసకారసిక్ఖాపదవణ్ణనా నిట్ఠితా.