చతువిపత్తికథావణ్ణనా

౨౭౩. ఇదాని ఉభయసాధారణం కత్వా విపత్తివారాదీనం విసిట్ఠవారానం సఙ్గహం కాతుమాహ ‘‘కతి ఆపత్తియో’’తిఆది.

౨౭౪. భిక్ఖునీ సచే ఛాదేతి, చుతా హోతి. సచే వేమతికా ఛాదేతి, థుల్లచ్చయం సియాతి యోజనా.

౨౭౫. సఙ్ఘాదిసేసన్తి పరస్స సఙ్ఘాదిసేసం.

౨౭౬. ‘‘కతి ఆచారవిపత్తిపచ్చయా’’తి పదచ్ఛేదో.

౨౭౭. ఆచారవిపత్తిన్తి అత్తనో వా పరస్స వా ఆచారవిపత్తిం.

౨౭౯. పాపికం దిట్ఠిన్తి అహేతుకఅకిరియనత్థికదిట్ఠిఆదిం లామికం దిట్ఠిం.

౨౮౧. మనుస్సుత్తరిధమ్మన్తి ఉత్తరిమనుస్సధమ్మం.

౨౮౨. ఆజీవహేతు సఞ్చరిత్తం సమాపన్నోతి యోజనా. పరియాయవచనేతి ‘‘యో తే విహారే వసతి, సో భిక్ఖు అరహా’’తిఆదికే లేసవచనే. ఞాతేతి యం ఉద్దిస్స వదతి, తస్మిం మనుస్సజాతికే వచనసమనన్తరమేవ ఞాతే.

౨౮౩. వత్వాతి అగిలానో అత్తనో అత్థాయ విఞ్ఞాపేత్వా. భిక్ఖునీ పన సచే ఏవం హోతి, భిక్ఖునీ అగిలానా అత్తనో అత్థాయ పణీతభోజనం విఞ్ఞాపేత్వా భుత్తావినీ సచే హోతీతి అధిప్పాయో. తస్సా పాటిదేసనీయం సియాతి యోజనా.

౨౮౪. ‘‘అత్తనో అత్థాయ విఞ్ఞాపేత్వానా’’తి ఇమినా పరస్స ఞాతకపవారితే తస్సేవత్థాయ విఞ్ఞాపేత్వా తేన దిన్నం వా తస్స విస్సాసేన వా పరిభుఞ్జన్తస్స తేసం అత్తనో అఞ్ఞాతకఅప్పవారితే సుద్ధచిత్తతాయ అనాపత్తీతి దీపేతి.

ఇతి ఉత్తరే లీనత్థపకాసనియా

చతువిపత్తికథావణ్ణనా నిట్ఠితా.