అధికరణపచ్చయకథావణ్ణనా

౨౮౫. వివాదాధికరణమ్హాతి ‘‘అధమ్మం ‘ధమ్మో’తి దీపేతీ’’తిఆదినయప్పవత్తా అట్ఠారసభేదకరవత్థునిస్సితా వివాదాధికరణమ్హా.

౨౮౬. ఉపసమ్పన్నం ఓమసతో భిక్ఖుస్స పాచిత్తి హోతీతి యోజనా.

౨౮౭. అనువాదాధికరణపచ్చయాతి చోదనాపరనామధేయ్యం అనువాదాధికరణమేవ పచ్చయో, తస్మా, అనువాదనాధికరణహేతూతి అత్థో.

౨౮౯. ‘‘తథా’’తి ఇమినా అమూలకత్తం అతిదిసతి.

౨౯౦. ఆపత్తిపచ్చయాతి ఆపత్తాధికరణపచ్చయా.

౨౯౩. కిచ్చాధికరణపచ్చయాతి అపలోకనాదిచతుబ్బిధకమ్మసఙ్ఖాతకిచ్చాధికరణహేతు.

౨౯౪. అచ్చజన్తీవాతి అత్తనో లద్ధిం అపరిచ్చజన్తీ ఏవ.

౨౯౭. పాపికాయ దిట్ఠియా పరిచ్చజనత్థాయ కతాయ యావతతియకం సమనుభాసనాయ తం దిట్ఠిం అచ్చజన్తియా తస్సా భిక్ఖునియా, తస్స భిక్ఖుస్స చ అచ్చజతో పాచిత్తి హోతీతి యోజనా.

ఇతి ఉత్తరే లీనత్థపకాసనియా

అధికరణపచ్చయకథావణ్ణనా నిట్ఠితా.