౨. దుతియసఙ్ఘాదిసేససిక్ఖాపదవణ్ణనా

౬౮౩. పాళియం దుతియే మల్లగణభటిపుత్తగణాదికన్తిఆదీసు మల్లరాజూనం గణో మల్లగణో. భటిపుత్తా నామ కేచి గణరాజానో, తేసం గణో. కేచి పన ‘‘నారాయనభత్తికో పుఞ్ఞకారగణో మల్లగణో. తథా కుమారభత్తికో చ గణో భటిపుత్తగణో’’తిపి (సారత్థ. టీ. సంఘాదిసేసకణ్డ ౩.౬౮౩) వదన్తి. ధమ్మగణోతి సాసనే, లోకే వా అనేకప్పకారపుఞ్ఞకారకో గణో. గన్ధవికతికారకో గణో గన్ధికసేణీ. పేసకారాదిగణో దుస్సికసేణీ. కప్పగతికన్తి కప్పియభావగతం, పబ్బజితపుబ్బన్తి అత్థో.

౬౮౫. పాళియం వుట్ఠాపేతీతి ఉపసమ్పాదేతి. అకప్పగతమ్పి పబ్బాజేన్తియా దుక్కటన్తి వదన్తి. ఖీణాసవాయపి ఆపజ్జితబ్బతో ‘‘తిచిత్త’’న్తి వుత్తం. చోరితా, తం ఞత్వా అననుఞ్ఞాతకారణా వుట్ఠాపనన్తి ద్వే అఙ్గాని.

దుతియసఙ్ఘాదిసేససిక్ఖాపదవణ్ణనా నిట్ఠితా.