౧౧. పఞ్చసతికక్ఖన్ధకో

ఖుద్దానుఖుద్దకసిక్ఖాపదకథావణ్ణనా

౪౩౭. పఞ్చసతికక్ఖన్ధకే పాళియం ‘‘అపావుసో, అమ్హాకం సత్థారం జానాసీ’’తి ఇదం థేరో సయం భగవతో పరినిబ్బుతభావం జానన్తోపి అత్తనా సహగతభిక్ఖుపరిసాయ ఞాపనత్థమేవ, సుభద్దస్స వుడ్ఢపబ్బజితస్స సాసనస్స పటిపక్ఖవచనం భిక్ఖూనం విఞ్ఞాపనత్థఞ్చ ఏవం పుచ్ఛి. సుభద్దో హి కుసినారాయం భగవతి అభిప్పసన్నాయ ఖత్తియాదిగహట్ఠపరిసాయ మజ్ఝే భగవతో పరినిబ్బానం సుత్వా హట్ఠపహట్ఠోపి భయేన పహట్ఠాకారం వాచాయ పకాసేతుం న సక్ఖిస్సతి, ఇధేవ పన విజనపదేసే సుత్వా యథాజ్ఝాసయం అత్తనో పాపలద్ధిం పకాసేస్సతి, తతో తమేవ పచ్చయం దస్సేత్వా భిక్ఖూ సముస్సాహేత్వా ధమ్మవినయసఙ్గహం కారేత్వా ఏతస్స పాపభిక్ఖుస్స, అఞ్ఞేసఞ్చ ఈదిసానం మనోరథవిఘాతం, సాసనట్ఠితిఞ్చ కరిస్సామీతి జానన్తోవ తం పుచ్ఛీతి వేదితబ్బం. తేనేవ థేరో ‘‘ఏకమిదాహం, ఆవుసో, సమయ’’న్తిఆదినా సుభద్దవచనమేవ దస్సేత్వా ధమ్మవినయం సఙ్గాయాపేసి. నానాభావోతి సరీరేన నానాదేసభావో, విప్పవాసోతి అత్థో. వినాభావోతి మరణేన వియుజ్జనం. అఞ్ఞథాభావోతి భవన్తరూపగమనేన అఞ్ఞాకారప్పత్తి.

౪౪౧. ‘‘ఆకఙ్ఖమానో…పే… సమూహనేయ్యా’’తి ఇదం భగవా మయా ‘‘ఆకఙ్ఖమానో’’తి వుత్తత్తా ఏకసిక్ఖాపదమ్పి సమూహనితబ్బం అపస్సన్తా, సమూహనే చ దోసం దిస్వా ధమ్మసఙ్గహకా భిక్ఖూ ‘‘అపఞ్ఞత్తం న పఞ్ఞాపేస్సామ, పఞ్ఞత్తం న సముచ్ఛిన్దిస్సామా’’తిఆదినా పున ‘‘పఞ్ఞత్తిసదిసాయ అకుప్పాయ కమ్మవాచాయ సావేత్వా సమాదాయ వత్తిస్సన్తి, తతో యావ సాసనన్తరధానా అప్పటిబాహియాని సిక్ఖాపదాని భవిస్సన్తీ’’తి ఇమినా అధిప్పాయేన అవోచాతి దట్ఠబ్బం. తేనేవ మహాథేరాపి తథేవ పటిపజ్జింసు.

గిహిగతానీతి గిహీసు గతాని. ఖత్తియమహాసారాదిగిహీహి ఞాతానీతి అత్థో. చితకధూమకాలో అత్తనో పవత్తిపరియోసానభూతో ఏతస్సాతి ధూమకాలికం.

౪౪౩. ఓళారికే నిమిత్తే కరియమానేపీతి ‘‘ఆకఙ్ఖమానో, ఆనన్ద, తథాగతో కప్పం వా తిట్ఠేయ్య కప్పావసేసం వా’’తి ఏవం థూలతరే ‘‘తిట్ఠతు, భగవా, కప్ప’’న్తి యాచనహేతుభూతే ఓకాసనిమిత్తే కమ్మే కరియమానే. మారేన పరియుట్ఠితచిత్తోతి మారేన ఆవిట్ఠచిత్తో.

౪౪౫. ఉజ్జవనికాయాతి పటిసోతగామినియా. కుచ్ఛితో లవో ఛేదో వినాసో కులవో, నిరత్థకవినియోగో. తం న గచ్ఛన్తీతి న కులవం గమేన్తి.

ఖుద్దానుఖుద్దకసిక్ఖాపదకథావణ్ణనా నిట్ఠితా.

పఞ్చసతికక్ఖన్ధకవణ్ణనానయో నిట్ఠితో.