౮. వత్తక్ఖన్ధకో

ఆగన్తుకవత్తకథావణ్ణనా

౩౫౭. వత్తక్ఖన్ధకే పత్థరితబ్బన్తి ఆతపే పత్థరితబ్బం. పాళియం అభివాదాపేతబ్బోతి వన్దనత్థాయ వస్సం పుచ్ఛనేన నవకో సయమేవ వన్దతీతి వుత్తం. నిల్లోకేతబ్బోతి ఓలోకేతబ్బో.

ఆగన్తుకవత్తకథావణ్ణనా నిట్ఠితా.

ఆవాసికవత్తకథావణ్ణనా

౩౫౯. ‘‘యథాభాగ’’న్తి ఠపితట్ఠానం అనతిక్కమిత్వా మఞ్చపీఠాదిం పప్ఫోటేత్వా పత్థరిత్వా ఉపరి పచ్చత్థరణం దత్వా దానమ్పి సేనాసనపఞ్ఞాపనమేవాతి దస్సేన్తో ఆహ ‘‘పప్ఫోటేత్వా హి పత్థరితుం పన వట్టతియేవా’’తి.

ఆవాసికవత్తకథావణ్ణనా నిట్ఠితా.

అనుమోదనవత్తకథావణ్ణనా

౩౬౨. పఞ్చమే నిసిన్నేతి అనుమోదనత్థాయ నిసిన్నే. న మహాథేరస్స భారో హోతీతి అనుమోదకం ఆగమేతుం న భారో. అజ్ఝిట్ఠోవ ఆగమేతబ్బోతి అత్తనా అజ్ఝిట్ఠేహి భిక్ఖూహి అనుమోదన్తేయేవ నిసీదితబ్బన్తి అత్థో.

అనుమోదనవత్తకథావణ్ణనా నిట్ఠితా.

భత్తగ్గవత్తకథావణ్ణనా

౩౬౪. మనుస్సానం పరివిసనట్ఠానన్తి యత్థ అన్తోవిహారేపి మనుస్సా సపుత్తదారా ఆవసిత్వా భిక్ఖూ నేత్వా భోజేన్తి. ఆసనేసు సతీతి నిసీదనట్ఠానేసు సన్తేసు. ఇదం, భన్తే, ఆసనం ఉచ్చన్తి ఆసన్నే సమభూమిభాగే పఞ్ఞత్తం థేరాసనేన సమకం ఆసనం సన్ధాయ వుత్తం, థేరాసనతో పన ఉచ్చతరే ఆపుచ్ఛిత్వాపి నిసీదితుం న వట్టతి. యది తం ఆసన్నమ్పి నీచతరం హోతి, అనాపుచ్ఛాపి నిసీదితుం వట్టతి. మహాథేరస్సేవ ఆపత్తీతి ఆసనేన పటిబాహనాపత్తియా ఆపత్తి. అవత్థరిత్వాతి పారుతసఙ్ఘాటిం అవత్థరిత్వా, అనుక్ఖిపిత్వాతి అత్థో.

పాళియం ‘‘ఉభోహి హత్థేహి…పే… ఓదనో పటిగ్గహేతబ్బో’’తి ఇదం హత్థతలే వా పచ్ఛిపిట్ఠిఆదిదుస్సణ్ఠితాధారే వా పత్తం ఠపేత్వా ఓదనస్స గహణకాలే పత్తస్స అపతనత్థాయ వుత్తం, సుసజ్జితే పన ఆధారే పత్తం ఠపేత్వా ఏకేన హత్థేన తం పరామసిత్వాపి ఓదనం పటిగ్గహేతుం వట్టతి ఏవ. ఉభోహి హత్థేహి…పే… ఉదకం పటిగ్గహేతబ్బన్తి ఏత్థాపి ఏసేవ నయో.

హత్థధోవనఉదకన్తి భోజనావసానే ఉదకం. తేనాహ ‘‘పానీయం పివిత్వా హత్థా ధోవితబ్బా’’తి. తేన పరియోసానే ధోవనమేవ పటిక్ఖిత్తం, భోజనన్తరే పన పానీయపివనాదినా నయేన హత్థం ధోవిత్వా పున భుఞ్జితుం వట్టతీతి దస్సేతి. పోత్థకేసు పన ‘‘పానీయం పివిత్వా హత్థా న ధోవితబ్బా’’తి లిఖన్తి, తం పురిమవచనేన న సమేతి పరియోసానే ఉదకస్సేవ ‘‘హత్థధోవనఉదక’’న్తి వుత్తత్తా. సచే మనుస్సా ధోవథ, భన్తేతిఆది నిట్ఠితభత్తం నిసిన్నం థేరం సన్ధాయ వుత్తం. ధురే ద్వారసమీపే.

భత్తగ్గవత్తకథావణ్ణనా నిట్ఠితా.

పిణ్డచారికవత్తకథాదివణ్ణనా

౩౬౬. పాళియం ఠాపేతి వాతి తిట్ఠ భన్తేతి వదన్తి.

౩౬౭. అత్థి, భన్తే, నక్ఖత్తపదానీతి నక్ఖత్తపదవిసయాని ఞాతాని అత్థి, అస్సయుజాదినక్ఖత్తం జానాథాతి అధిప్పాయో. తేనాహ ‘‘న జానామ, ఆవుసో’’తి. అత్థి, భన్తే, దిసాభాగన్తి ఏత్థాపి ఏసేవ నయో. కేనజ్జ, భన్తే, యుత్తన్తి కేన నక్ఖత్తేన చన్దో యుత్తోతి అత్థో.

౩౬౯. అఙ్గణేతి అబ్భోకాసే. ఏవమేవ పటిపజ్జితబ్బన్తి ఉద్దేసదానాది ఆపుచ్ఛితబ్బన్తి దస్సేతి.

౩౭౪. నిబద్ధగమనత్థాయాతి అత్తనోవ నిరన్తరగమనత్థాయ. ఊహదితాతి ఏత్థ హద-ధాతుస్స వచ్చవిస్సజ్జనత్థతాయాహ ‘‘బహి వచ్చమక్ఖితా’’తి.

పిణ్డచారికవత్తకథాదివణ్ణనా నిట్ఠితా.

వత్తక్ఖన్ధకవణ్ణనానయో నిట్ఠితో.