౧. సురాపానసిక్ఖాపదవణ్ణనా

ఆయస్మతో యం ముని సాగతస్స,

మహిద్ధికత్తస్స నిదస్సనేన;

పానస్స దోసో తస్స దస్సనత్థం,

పుబ్బేవ సో భద్దవతిం పయాతో.

తస్మా పస్సం నాగమపోథయిత్వా,

వినిస్సటం సాగతం ఇద్ధియా చ;

నతో సురాపాననిసేధనత్థం,

కోసమ్బిమేవజ్ఝగమాతి ఞేయ్యం.

౩౨౬-౮. పసుపాలకాతి అజపాలకా. యేన మజ్జతి, తస్స బీజతో పట్ఠాయ. కేచి ‘‘సచిత్తకపక్ఖే చిత్తం అకుసలమేవాతి (కఙ్ఖా. అట్ఠ. పఠమపారాజికవణ్ణనా) వుత్తత్తా వత్థుం జానిత్వా పివతో అకుసల’’న్తి వదన్తి. ఏవం సతి ‘‘అకుసలేనేవ పాతబ్బతాయాతి న వత్తబ్బ’’న్తి వుత్తే ‘‘సచిత్తకపక్ఖమేవ సన్ధాయా’’తి వదన్తి. ఏవం సతి ‘‘కుసలాకుసలాబ్యాకతచిత్తన్తి వత్తబ్బ’’న్తి వుత్తే తమ్పి ‘‘తబ్బహులనయేన వుత్త’’న్తి వదన్తి. కఙ్ఖావితరణియమ్పి అవిసేసేత్వా ‘‘అకుసలచిత్త’’న్తి (కఙ్ఖా. అట్ఠ. సురాపానసిక్ఖాపదవణ్ణనా) వుత్తం, తస్మా ‘‘తం అకుసలేనేవ పివతీ’’తి వదన్తీతి.

సురాపానసిక్ఖాపదవణ్ణనా నిట్ఠితా.