౩. భిక్ఖునుపస్సయసిక్ఖాపదవణ్ణనా

౧౬౨. ‘‘ఏకరత్తమ్పి వసన్తీ’’తి (పాచి. ౧౬౧) వచనతో యత్థ రత్తియం న వసన్తి, తత్థ గన్త్వా ఓవదితుం వట్టతీతి ఏకే. యది ఏవం సఙ్కేతట్ఠానం గన్త్వా ఓవదితుం వట్టతీతి సిద్ధం. ‘‘తతో అద్ధయోజనేయేవ సభిక్ఖుకో ఆవాసో ఇచ్ఛితబ్బో’’తి న వత్తబ్బం. భిక్ఖునోవాదకో చే అద్ధయోజనం గన్త్వా ఓవదితుకామో హోతి, భిక్ఖునిసఙ్ఘో చ అద్ధయోజనం గన్త్వా సోతుకామో, ‘‘వట్టతీ’’తి వత్తబ్బం సియా, తఞ్చ న వుత్తం, తస్మా న వట్టతి. హేట్ఠిమపరిచ్ఛేదేన పన ‘‘ఏకరత్తమ్పీ’’తి వుత్తం. తతో పట్ఠాయ ఉపస్సయం హోతి, న ఉపస్సయసఙ్ఖేపేన కతమత్తేనాతి వుత్తం హోతి. యత్థ వాసూపగతా భిక్ఖునియో, సో ఉపస్సయసఙ్ఖ్యం గచ్ఛతి, తత్థ న గన్త్వా ఓవాదో దాతబ్బో. ఏకావాసే దివా వట్టతీతి ఏకే, విచారేత్వా యుత్తతరం గహేతబ్బం.

భిక్ఖునుపస్సయసిక్ఖాపదవణ్ణనా నిట్ఠితా.