౯. కట్ఠోపమసుత్తవణ్ణనా

౫౦౯. ద్విన్నం అరణీనన్తి అధరుత్తరారణీనం. కిఞ్చి ద్వయం సఙ్ఘట్టితమత్తం హుత్వా న సమోధానగతం హోతీతి తంనివత్తనత్థం ‘‘సఙ్ఘట్టనసమోధానా’’తి వుత్తం. పునప్పునం సఙ్ఘట్టనేన హి తేజోపాతుభావో. అధరారణీ వియ వత్థారమ్మణం అసతిపి వాయామే తజ్జసమ్ఫస్సపచ్చయతో. ఉత్తరారణీ వియ ఫస్సో వత్థారమ్మణాదిఫస్సేన పవత్తనతో. సఙ్ఘట్టో వియ ఫస్ససఙ్ఘట్టనం అరణిద్వయసఙ్ఘట్టనా వియ ఫస్సస్సేవ వత్థారమ్మణేసు సఙ్ఘట్టనాకారేన పవత్తితో. అగ్గి వియ వేదనా అనుదహనట్ఠేన ఖణికావాయఞ్చ. వత్థారమ్మణం వా ఉత్తరారణీ వియ ఇన్ధనాపాతగహణాదీసు ఉస్సాహస్స వియ పవత్తిసమ్భవతో. ఫస్సో అధరారణీ వియ నిరుస్సాహనిరీహతావసేన అత్తసాధనతో.