౮. నిబ్బేధభాగియసుత్తవణ్ణనా

౨౦౯. నిబ్బిజ్ఝన్తీతి నిబ్బేధా, నిబ్బిజ్ఝనధమ్మా ధమ్మవినయాదయో, తప్పరియాపన్నతాయ నిబ్బేధభాగే గతో నిబ్బేధభాగియో, తం నిబ్బేధభాగియం. తేనాహ ‘‘నిబ్బిజ్ఝనకోట్ఠాసియ’’న్తి. భావేత్వా ఠితేన చిత్తేన. విపస్సనామగ్గమ్పి గహేత్వా ‘‘మగ్గబోజ్ఝఙ్గా మిస్సకా’’తి వుత్తా. తేహీతి బోజ్ఝఙ్గేహి భావితం చిత్తం. తే వా బోజ్ఝఙ్గే భావేత్వా ఠితం చిత్తం నామ ఫలచిత్తం, తస్మా నిబ్బత్తితలోకుత్తరమేవ. తమ్పీతి ఫలచిత్తమ్పి మగ్గానన్తరతాయ మగ్గనిస్సితం కత్వా మిస్సకమేవ కథేతుం వట్టతి ‘‘బోధాయ సంవత్తన్తీ’’తి వుత్తత్తా.