౮. బీజగామసుత్తవణ్ణనా

౧౧౪౮. ‘‘మూలబీజ’’న్తిఆదీసు మూలమేవ బీజన్తి మూలబీజం, మూలబీజం ఏతస్సాతిపి మూలబీజం. తత్థ పురిమేన బీజగామో వుత్తో ‘‘బీజానం సమూహో’’తి కత్వా, దుతియేన భూతగామో. దువిధోపేసో సామఞ్ఞనిద్దేసేన, ‘‘మూలబీజఞ్చ మూలబీజఞ్చ మూలబీజ’’న్తి ఏకసేసనయేన వా బీజత్థో వేదితబ్బో. ఏస నయో సేసేసుపి. ఫళుబీజన్తి పబ్బబీజం. బాహిరపచ్చయన్తరసమవాయే సదిసఫలుప్పత్తియా విసేసకారణభావతో విరుహనసమత్థే సారఫలే నిరుళ్హో బీజ-సద్దో. తదత్థసిద్ధియా మూలాదీసుపి కేసుచి పవత్తతీతి తతో నివత్తనత్థం ఏకేన బీజ-సద్దేన విసేసేత్వా వుత్తం ‘‘బీజబీజ’’న్తి ‘‘రూపరూపం, దుక్ఖదుక్ఖ’’న్తి (సం. ని. ౪.౩౨౭) చ యథా. నీలతిణరుక్ఖాదికస్సాతి అల్లతిణస్స చేవ అల్లరుక్ఖాదికస్స చ. ఆది-సద్దేన ఓసధిగచ్ఛలతాదీనం గహణం.