౭-౮. హాలిద్దికానిసుత్తాదివణ్ణనా

౧౩౦-౧౩౧. తం ఇత్థేతన్తి చక్ఖునా యం రూపం దిట్ఠం, తం ఇత్థన్తి అత్థో. తం సుఖవేదనియన్తి తం సుఖవేదనాయ ఉపనిస్సయకోటియా పచ్చయభూతం చక్ఖువిఞ్ఞాణఞ్చేవ, యో చ యథారహం ఉపనిస్సయకోటియా వా, అనన్తరో చే అనన్తరకోటియా వా, సహజాతో చే సమ్పయుత్తకోటియా వా, సుఖవేదనాయ పచ్చయో ఫస్సో. తం సుఖవేదనియఞ్చ ఫస్సం పటిచ్చ ఉప్పజ్జతి సుఖవేదనాతి యోజనా. ఏస నయో సబ్బత్థ సబ్బేసు సేసేసు సత్తసు వారేసు. మనోధాతుయేవ వా సమానాతి అభిధమ్మనయేన. సుత్తన్తనయేన పన సుఞ్ఞతట్ఠేన నిస్సత్తనిజ్జీవట్ఠేన చ మనోధాతుసమఞ్ఞం లభతేవ. అట్ఠమం ఉత్తానమేవ హేట్ఠా వుత్తనయత్తా.

హాలిద్దికానిసుత్తాదివణ్ణనా నిట్ఠితా.