౨. బళిససుత్తవణ్ణనా

౧౫౮. బళిసేన చరతి, తేన వా జీవతీతి బాళిసికో. తేనాహ ‘‘బళిసం గహేత్వా చరమానో’’తి. ఆమిసగతన్తి ఆమిసూపగతం ఆమిసపతితం. తేనాహ ‘‘ఆమిసమక్ఖిత’’న్తి. భిన్నాధికరణానమ్పి బాహిరత్థసమాసో హోతేవాతి ఆహ ‘‘ఆమిసే చక్ఖుదస్సన’’న్తి. అయో వుచ్చతి సుఖం, తబ్బిధురతాయ అనయో, దుక్ఖన్తి ఆహ ‘‘దుక్ఖం పత్తో’’తి. అస్సాతి ఏతేన. కత్తుఅత్థే హి ఏతం సామివచనం. యథా కిలేసా వత్తన్తి, ఏవం పవత్తమానో పుగ్గలో కిలేసవిప్పయోగో న హోతీతి వుత్తం ‘‘యథా కిలేసమారస్స కామో, ఏవం కత్తబ్బో’’తి.

బళిససుత్తవణ్ణనా నిట్ఠితా.