౪. పథవీసుత్తాదివణ్ణనా

౭౮-౮౪. చక్కవాళబ్భన్తరాయాతి చక్కవాళపబ్బతస్స అన్తోగధాయ.

ఛట్ఠాదీసు వుత్తనయేనేవాతి ఇధ ఛట్ఠసుత్తాదీసు పఠమసుత్తాదీసు వుత్తనయేనేవాతి అత్థో వేదితబ్బో విసేసాభావతో.

పరియోసానేతి ఇమస్స అభిసమయసంయుత్తస్స ఓసానట్ఠానే. అఞ్ఞతిత్థియసమణబ్రాహ్మణపరిబ్బాజకానన్తి అఞ్ఞతిత్థియానం. గుణాధిగమోతి ఝానాభిఞ్ఞాసహితో గుణాధిగమో. సతభాగమ్పి…పే… న ఉపగచ్ఛతి సచ్చపటివేధస్స మహానుభావత్తా. తేనాహ భగవా పచ్చక్ఖసబ్బధమ్మో ‘‘ఏవం మహాధిగమో, భిక్ఖవే, దిట్ఠిసమ్పన్నో పుగ్గలో ఏవం మహాభిఞ్ఞో’’తి.

పథవీసుత్తాదివణ్ణనా నిట్ఠితా.

సారత్థప్పకాసినియా సంయుత్తనికాయ-అట్ఠకథాయ

అభిసమయసంయుత్తవణ్ణనాయ లీనత్థప్పకాసనా సమత్తా.