౨౩౦. సఙ్ఘే భిన్నే చీవరుప్పాదకథా

౩౭౬. సఙ్ఘో భిజ్జతీతి ఏత్థ ద్వికోట్ఠాసవసేన భిజ్జనమేవాధిప్పేతం, న అఞ్ఞన్తి ఆహ ‘‘ద్వే కోట్ఠాసా’’తి. ఏకస్మిం పక్ఖే చీవరాని దేన్తీతి యోజనా. ద్విపక్ఖం సన్ధాయ ‘‘సకలస్స సఙ్ఘస్సా’’తి వుత్తం. ఏతన్తి చీవరం. తస్సేవ చీవరన్తి తస్స కోట్ఠాసస్స చీవరమేవ. యత్థాతి యస్మిం దేసే. దక్ఖిణోదకం పమాణన్తి దక్ఖిణోదకమేవ పమాణం, న దేయ్యధమ్మో. తస్మా దక్ఖిణోదకం పటిగ్గణ్హన్తా, దేయ్యధమ్మస్స సామినో హోన్తీతి అధిప్పాయో. ఉభోహిపి పక్ఖేహీతి యోజనా. పరసముద్దేతి జమ్బుదీపే. సో హి సీహళదీపతో సముద్దస్స పారత్తా పరసముద్దోతి వుచ్చతి. ఇతరో పక్ఖోతి దక్ఖిణోదకస్స చ చీవరస్స చ లద్ధపక్ఖతో ఇతరో అలద్ధో పక్ఖో.