౧౧౪. సఙ్ఘభేదే అనాపత్తివస్సచ్ఛేదకథా

౨౦౨. భిన్నోతి ఏత్థ తపచ్చయస్స అతీతత్థే అయుత్తభావం దస్సేన్తో ఆహ ‘‘భిన్నే సఙ్ఘే కరణీయం నత్థీ’’తి. యో పనాతి సఙ్ఘో పన. ఇదం ‘‘భిజ్జిస్సతీ’’తిపదే కత్తా, ‘‘ఆసఙ్కితో’’తిపదే కమ్మం. ‘‘భిజ్జిస్సతీ’’తి ఇమినా భిన్నోతి ఏత్థ తపచ్చయస్స అనాగతత్థే పవత్తభావం దస్సేతి. భిక్ఖునీహి సఙ్ఘో భిన్నోతి ఏత్థ కిం భిక్ఖునీహి సఙ్ఘో భిన్నోతి దట్ఠబ్బోతి ఆహ ‘‘న భిక్ఖునీహి సఙ్ఘో భిన్నోతి దట్ఠబ్బో’’తి. ఏతన్తి భిక్ఖునీహి అభిన్నభావం. ఏతా పనాతి భిక్ఖునియో పన. తన్తి సఙ్ఘం. ఏతన్తి ‘‘సమ్బహులాహి భిక్ఖునీహి సఙ్ఘో భిన్నో’’తి వచనం.