౮౬. దిసంగమికాదివత్థుకథా

౧౬౩. సంగహేతబ్బోతిఆదీనం చతున్నం కిరియాపదానం విసేసం దస్సేన్తో ఆహ ‘‘సంగహేతబ్బో’’తిఆది. సంగహసద్దస్స సఙ్ఖేపగహణేసుపి వత్తనతో ఇధ ‘‘అనుగ్గహత్థే’’తి దస్సేతుం పాళియం వుత్తం ‘‘అనుగ్గహేతబ్బో’’తి. తేన వుత్తం ‘‘తథాకరణవసేనా’’తి. ఉపలాపేతబ్బోతి సఙ్ఘేన బహుస్సుతో భిక్ఖు భిక్ఖూహి ఉపగన్త్వా లాపేతబ్బో కథాపేతబ్బో. ఉపట్ఠాపేతబ్బోతి సఙ్ఘేన బహుస్సుతో భిక్ఖు భిక్ఖూహి ఉప అచ్చనేన పూజనేన ఠాపేతబ్బో. ‘‘సబ్బేసం దుక్కట’’న్తి వత్వా తదేవ సమత్థేతుం వుత్తం ‘‘ఇధ నేవ థేరా, న దహరా ముచ్చన్తీ’’తి. తేనాతి బహుస్సుతేన భిక్ఖునా. ఏవమ్పి సతీతి ఏవం అసాదియనేపి సతి. సాయం పాతన్తి సాయఞ్చ పాతో చ సాయంపాతం. ఉపట్ఠానన్తి ఉపట్ఠానట్ఠానం, ఉపట్ఠానత్థాయ వా. తేనాతి బహుస్సుతేన భిక్ఖునా. తేసన్తి మహాథేరానం. అస్సాతి బహుస్సుతస్స భిక్ఖునో. సద్ధించరాతి అత్తనా సద్ధిం చరన్తీతి సద్ధించరా. అథాపీతి యదిపి. ఏకో వా వత్తసమ్పన్నో వదతీతి యోజనా. ఏసో చ అహఞ్చాతి మయం. నామతుమ్హఅమ్హసద్దేసు హి ఏకసేసేన కత్తబ్బేసు పరోవ గహేతబ్బో. విహరన్తూతి వదన్తీతి యోజనా.

సో ఆవాసో గన్తబ్బోతి ఏత్థ కిమత్థాయ గన్తబ్బో, కిం అనుదివసం గన్తబ్బోతి ఆహ ‘‘ఉపోసథకరణత్థాయ అన్వద్ధమాసం గన్తబ్బో’’తి. సో చ ఖోతి ఆవాసో. ఉతువస్సేయేవాతి హేమన్తగిమ్హేయేవ. ఉతువస్సేయేవ గన్తబ్బోతి అత్థస్స ఞాతబ్బభావం దస్సేన్తో ఆహ ‘‘వస్సానే పనా’’తిఆది. యన్తి కమ్మం. తత్థాతి ‘‘వస్సం వసన్తీ’’తిఆదివచనే. సోతి పాతిమోక్ఖుద్దేసకో భిక్ఖు. అఞ్ఞస్మిన్తి అపరస్మిం పాతిమోక్ఖుద్దేసకే. మాసద్వయన్తి సావణమాసపుణ్ణమితో యావ అస్సయుజపుణ్ణమీ, తావ మాసద్వయం వసితబ్బం. ఇదం పురిమవస్సం ఉపగన్త్వా పచ్ఛిమికాయ పక్కమనాదిం సన్ధాయ వుత్తం. సచే పచ్ఛిమికం ఉపగన్త్వా అనన్తరమేవ పక్కమనాదిం కరోతి, మాసత్తయమ్పి వసితబ్బం.