౮౭. పారిసుద్ధిదానకథా

౧౬౪. యేన కేనచి అఙ్గపచ్చఙ్గేన విఞ్ఞాపేతీతి పటివచనం నిచ్ఛారేతుమసక్కోన్తో యేన కేనచి అఙ్గపచ్చఙ్గేన విఞ్ఞాపేతి. ఉభయథాతి ఉభయేహి కాయవాచాసఙ్ఖాతేహి ఆకారేహి. కాయవాచాహి విఞ్ఞాపేతీతి సమ్బన్ధో. సబ్బేతి అఖిలా గిలానా. హత్థపాసేతి సఙ్ఘస్స హత్థపాసమ్హి. సచే దూరే హోన్తీతి సచే బహూ గిలానా అఞ్ఞమఞ్ఞం దూరే హోన్తి. తం దివసన్తి తస్మిం సఙ్ఘఅప్పహోనకదివసే.

తత్థేవ పక్కమతీతి ఏత్థ నిస్సక్కత్థే థపచ్చయోతి ఆహ ‘‘తతోవా’’తి, పారిసుద్ధిహారట్ఠానతో ఏవాతి అత్థో. ‘‘గచ్ఛతీ’’తి ఇమినా కముధాతుయా పదవిక్ఖేపత్థం దస్సేతి, ‘‘కత్థచీ’’తి ఇమినా తస్స కమ్మం. సామణేరో పటిజానాతీతిఆదీసు పటిజాననాకారత్థస్స ఇతిసద్దస్స లోపభావం దస్సేన్తో ఆహ ‘‘సామణేరో అహ’’న్తి ఏవం పటిజానాతీ’’తిఆది. భూతంయేవాతి విజ్జమానంయేవ. సబ్బత్థాతి సబ్బేసు ‘‘సిక్ఖం పచ్చక్ఖాతకో పటిజానాతీ’’తిఆదీసు.

సబ్బన్తిమేన పరిచ్ఛేదేన చతున్నం భిక్ఖూనన్తి సమ్బన్ధో. సబ్బత్థాతి సబ్బేసు ‘‘సఙ్ఘప్పత్తో విబ్భమతీ’’తిఆదీసు. ఏత్థాతి పారిసుద్ధిహరణే. బహూనమ్పీతి ఏత్థ పిసద్దేన ఏకేన ఏకస్సాపి, బహూహి ఏకస్సాపి, బహూహి బహూనమ్పి ఆహటా పారిసుద్ధి ఆహటావ హోతీతి దస్సేతి. సోతి పారిసుద్ధిహారకో భిక్ఖు. యేసన్తి భిక్ఖూనం. తస్సేవాతి పారిసుద్ధిహారకస్సేవ. ఇతరా పనాతి ఇతరేసం పారిసుద్ధి పన. బిళాలసఙ్ఖలికాతి ఏత్థ బిళాలోతి ఆఖుభుజో. సో హి బిళాసయం ఆఖుం గణ్హితుం అలతి సమత్థేతీతి బిళాలోతి వుచ్చతి. సఙ్ఖలికాతి ఏతం సత్తానం బన్ధనూపకరణవిసేసస్స నామం. బిళాలస్స సఙ్ఖలికా తేన సమ్బన్ధసమ్బన్ధిభావేన సమ్బన్ధత్తాతి బిళాలసఙ్ఖలికా. ఇదం ఉపలక్ఖణమత్తం యేసం కేసఞ్చి సఙ్ఖలికాయ గహేతబ్బత్తా. తాయ సదిసా బిళాలసఙ్ఖలికా పారిసుద్ధీతి అత్థో. ఇదం పనేత్థ ఓపమ్మసంసన్దనం – యథా సఙ్ఖలికాయ పఠమం వలయం దుతియంయేవ వలయం పాపుణాతి, న తతియం, ఏవమేవ పఠమం దిన్నా పారిసుద్ధి దుతియమేవ పాపుణాతి, న తతియన్తి.

ఆగన్త్వాతి సఙ్ఘస్స హత్థపాసం ఆగన్త్వా. పాళియం సుత్తో న ఆరోచేతీతిఆదీసు హేత్వత్థే పచ్చత్తవచనం. సుత్తేన నారోచేతీతి హి అత్థో. పారిసుద్ధిహారకస్స అనాపత్తీతి ఏత్థ ఆపత్తీతి అన్వయత్థం అత్థాపత్తితో దస్సేన్తో ఆహ ‘‘సచే…పే… ఆపజ్జతీ’’తి. అస్సాతి భిక్ఖుస్స. ఉభిన్నమ్పీతి పారిసుద్ధిదాయకస్స, తంహారకస్స చాతి ఉభిన్నమ్పి.