౬౮. సన్నిపాతానుజాననాదికథా

౧౩౨. ఉపోసథక్ఖన్ధకే తరన్తి ఓతరన్తి ఏత్థాతి తిత్థం, ఉదకతిత్థం, తిత్థం వియాతి తిత్థం, లద్ధీతి ఆహ ‘‘తిత్థం వుచ్చతి లద్ధీ’’తి. లద్ధి హి బహూనం లద్ధికానం ఓతరణట్ఠానత్తా తిత్థం నామ. అఞ్ఞన్తి సాసనికలద్ధితో అఞ్ఞం. ఏతేసన్తి పరిబ్బాజకానం. ఇతోతి ఇమస్మా సాసనికలద్ధితో. యన్తి యం ధమ్మజాతం. తేసన్తి అఞ్ఞతిత్థియానం పరిబ్బాజకానం. తే లభన్తీతి ఏత్థ తసద్దో మనుస్సవిసయోతి ఆహ ‘‘తే మనుస్సా’’తి. మూగసూకరాతి ఏత్థ థూలసరీరస్స సూకరస్స సద్దమత్తస్సాపి అభావతో మూగసూకరో నామాతి ఆహ ‘‘థూలసరీరసూకరా’’తి.

౧౩౫. అస్సాతి భిక్ఖునో. సోతి సమ్పజానముసావాదో. కిన్తి కిం ఆపత్తి. దుక్కటన్తి పదస్స దుక్కటం కమ్మన్తి ఆసఙ్కా భవేయ్యాతి ఆహ ‘‘దుక్కటాపత్తీ’’తి. సా చ ఖో దుక్కటాపత్తి ముసావాదలక్ఖణేన న హోతీతి యోజనా. కేన హోతీతి ఆహ ‘‘భగవతో పన వచనేనా’’తి. వచనేనాతి చ ‘‘సమ్పజానముసావాదే కిం హోతి? దుక్కటం హోతీ’’తి (మహావ. ౧౩౫) వచనేన. అకిరియసముట్ఠానాతి ఆవి కత్తబ్బాయ ఆపత్తియా అకరణేన అకిరియసముట్ఠానా.

మనుజేనాతి మనుస్సేన. వాచాతి వాచాయ. యకారస్స హి లోపో. గిరన్తి సద్దం. పరేతి అఞ్ఞే పుగ్గలే. వాచసికన్తి వాచాతో సముట్ఠితం. అయం పనేత్థ యోజనా – భిక్ఖు కేనచి ఆసన్నే ఠితేన మనుజేన వాచాయ అనాలపన్తో హోతి, పరే దూరే ఠితే పుగ్గలే సన్ధాయ గిరం మహాసద్దం నో చ భణేయ్య, ఏవమ్పి వాచసికమేవ ఆపజ్జేయ్యాతి.

అన్తరాయికోతి ఏత్థ కరోత్యత్థే ణికపచ్చయోతి ఆహ ‘‘అన్తరాయకరో’’తి. ‘‘కిమత్థాయా’’తి ఇమినా కిస్సాతి ఏత్థ తదత్థే చతుత్థీతి దస్సేతి, హేత్వత్థోపి యుజ్జతేవ. సబ్బత్థాతి సబ్బేసు ‘‘దుతియస్స ఝానస్స అధిగమాయా’’తిఆదీసు. ఇతీతిఆది నిగమనం. ఉద్దేసతో చాతి ‘‘సుణాతు మే భన్తే సఙ్ఘో’’తిఆదిఉద్దేసతో చ. నిద్దేసతో చాతి ‘‘పాతిమోక్ఖన్తి ఆదిమేత’’న్తిఆదినిద్దేసతో చ.

౧౩౬. దేవసికన్తి ఏత్థ ణికపచ్చయో విచ్ఛత్థే హోతీతి ఆహ ‘‘దివసే దివసే’’తి. తతియే చ సత్తమే చ పక్ఖేతి ఏకస్స ఉతునో అట్ఠసు పక్ఖేసు తతియే చ సత్తమే చ పక్ఖే. ‘‘వచనతో’’తి పదం ‘‘వట్టతీ’’తి పదే ఞాపకహేతు. తథారూపే పచ్చయేతి తథారూపే వికతిచారిత్తసఙ్ఖాతే పచ్చయే. అనువత్తితబ్బన్తి అనుమతిం వత్తితబ్బం. వచనతోపీతి పిసద్దో పుబ్బే ఞాపకహేతుం సమ్పిణ్డేతి. ఏతన్తి ‘‘యస్మిం తస్మిం చాతుద్దసే వా పన్నరసే వా ఉద్దిసితుం వట్టతీ’’తి వచనం.