౧౦౫. వజ్జనీయపుగ్గలసన్దస్సనకథా

౧౮౩. హత్థపాసూపగమనమేవాతి ఉపోసథసఙ్ఘాదీనం హత్థపాసస్స ఉపగమనమేవ. ఇదం పారివాసియపారిసుద్ధిదానం నామ న వట్టతీతి యోజనా. తస్సాతి పారివాసియపారిసుద్ధిదానస్స. అనుపోసథేతి ఏత్థ అకారస్స అఞ్ఞత్థం దస్సేన్తో ఆహ ‘‘అఞ్ఞస్మిం దివసే’’తి. తత్థ అఞ్ఞస్మిన్తి ద్వీహి ఉపోసథేహి అఞ్ఞస్మిం. యా సఙ్ఘసామగ్గీ కరియతి, తథారూపిన్తి యోజనా. కోసమ్బకభిక్ఖూనన్తి కోసమ్బియం నివాసీనం భిక్ఖూనం. సామగ్గీ వియ యా సామగ్గీతి యోజనా. ‘‘ఠపేత్వా’’తి ఇమినా అఞ్ఞత్రాతి నిపాతస్స అత్థం దస్సేతి. యే పనాతి భిక్ఖూ పన సమగ్గా హోన్తీతి సమ్బన్ధో. ఉపోసథేయేవాతి ఉపోసథదివసేయేవ.

ఇతి ఉపోసథక్ఖన్ధకవణ్ణనాయ యోజనా సమత్తా.