౧౦౩. నగన్తబ్బగన్తబ్బవారకథా

౧౮౧. సభిక్ఖుకాతి పదస్స సంవిజ్జన్తి భిక్ఖూ ఏతస్మిమావాసేతి సభిక్ఖుకోతి వచనత్థం దస్సేన్తో ఆహ ‘‘యస్మిం ఆవాసే’’తిఆది. యన్తి ఆవాసం. తదహేవాతి తదహుపోసథే ఏవ. ఇమినా సచే సక్కోతి, తదహేవ గన్తుం, సో గన్తబ్బోతి దస్సేతి. ‘‘అకత్వా’’తి ఇమినా కత్వా పన గన్తబ్బోతి దస్సేతి. ‘‘అఞ్ఞత్రా’’తి నిపాతో ‘‘వినా’’తి నిపాతస్స పరియాయోతి ఆహ ‘‘వినా’’తి. అత్తచతుత్థేన వా అత్తపఞ్చమేన వా సఙ్ఘేన గన్తుం వట్టతీతి యోజనా. ఏత్థ చ ‘‘అత్తచతుత్థేన వా’’తి ఇదం ఉపోసథకమ్మం సన్ధాయ వుత్తం. ‘‘అత్తపఞ్చమేన వా’’తి ఇదం పవారణాకమ్మం సన్ధాయ వుత్తన్తి దట్ఠబ్బం. విహారేతి విహారసీమాయ మహాసీమాయన్తి అత్థో. ఇదఞ్హి విహారసీమానం అభేదేన వుత్తం. సీమాపీతి ఖణ్డసీమాపి. న గన్తబ్బాతి సఙ్ఘస్స గరుకత్తా న గన్తబ్బా. ఏత్థాతి ఖణ్డసీమాదీసు. తస్సాతి భిక్ఖుస్స. గన్తుం వట్టతీతి గణుపోసథట్ఠానతో గన్తుం వట్టతి, సఙ్ఘుపోసథట్ఠానతో పన న వట్టతియేవాతి దట్ఠబ్బం. విస్సట్ఠఉపోసథా ఆవాసాపి అఞ్ఞం గన్తుం వట్టతీతి యోజనా. ఆరఞ్ఞకేనాపీతి అరఞ్ఞే ఏకకేన నివాసేనపి. తత్థాతి అఞ్ఞవిహారే. ఉపోసథన్తి సఙ్ఘుపోసథఞ్చ గణుపోసథఞ్చ.

౧౮౨. యన్తి ఆవాసం. తత్థాతి తం ఆవాసం. గన్తుం సక్కోమి ఇతి జానేయ్యాతి యోజనా. తత్థాతి తస్మిం ఆవాసే. ఇమినా నేవ కతోతి సమ్బన్ధో. నేవ కతో భవిస్సతి ఇతి జానేయ్యాతి యోజనా.