౧౦౦. సీమోక్కన్తికపేయ్యాలకథా

౧౭౭. ఆవాసికేనఆగన్తుకపేయ్యాలే సబ్బం వేదితబ్బన్తి సమ్బన్ధో. వేదితబ్బాకారం సహ ఉపమాయ దస్సేన్తో ఆహ ‘‘యథా’’తిఆది. ఆగన్తుకేనఆవాసికపేయ్యాలే పన ఆనేతబ్బన్తి సమ్బన్ధో. పురిమపేయ్యాలేతి ఆవాసికేనఆగన్తుకపేయ్యాలే. ఆగన్తుకేనఆగన్తుకపేయ్యాలే పన యోజేతబ్బోతి సమ్బన్ధో. ఏత్థ చ పేయ్యాలన్తి సదిసనయస్స చ తంజాననఞాణస్స చ పాతబ్బం రక్ఖనం పేయ్యం, పేయ్యం, పేయ్యే వా, పేయ్యాయ వా అలతి సమత్థేతీతి పేయ్యాలన్తి వచనత్థో కాతబ్బో.

౧౭౮. ఆవాసికానం చాతుద్దసో హుత్వా కస్మా ఆగన్తుకానం పన్నరసోతి ఆహ ‘‘యేస’’న్తిఆది. తత్థ యేసన్తి ఆగన్తుకానం. తిరోరట్ఠతోతి ఆవాసికానం రట్ఠస్స అఞ్ఞరట్ఠతో. తిరోజనపదతోతి ఏకరట్ఠేపి అఞ్ఞజనపదతో. చాతుద్దసికం అకంసూతి సఞ్ఞానానత్తవసేన చాతుద్దసికం అకంసు. అనువత్తితబ్బన్తి అనుమతిం వత్తితబ్బం. న పటిక్కోసితబ్బన్తి ‘‘న చాతుద్దసో’’తి వత్వా న వారితబ్బం. న అకామాతి ఏత్థ కముధాతు ఇచ్ఛత్థో, కరణత్థే చ నిస్సక్కవచనన్తి ఆహ ‘‘న అనిచ్ఛాయ దాతబ్బా’’తి.