౪. చతుత్థసిక్ఖాపదం

౮౦౬. చతుత్థే రఞ్ఞో ఓరోధా రాజోరోధా, పురాణే రాజోరోధా పురాణరాజోరోధాతి వచనత్థం దస్సేన్తో ఆహ ‘‘పురాణే’’తిఆది. ‘‘గిహిభావే’’తి ఇమినా పురాణేతి ఏత్థ ణపచ్చయస్స సరూపం దస్సేతి. చిరాచిరన్తి నిపాతపటిరూపకం. తేన వుత్తం ‘‘చిరేన చిరేనా’’తి. ‘‘సక్కోథా’’తి ఇమినా కథం తుమ్హే రాగచిత్తం పటిహనిత్వా అత్తానం ధారేథ ధారేతుం సక్కోథాతి అత్థం దస్సేతి. అనారోచితేపీతి భూతతో అనారోచితేపి.

౮౦౭. జతునాతి లాఖాయ. పట్ఠదణ్డకేతి పటుభావేన ఠాతి పవత్తతీతి పట్ఠో, సోయేవ దణ్డో పట్ఠదణ్డో, తస్స పవేసనం పట్ఠదణ్డకం, తస్మిం నిమిత్తభూతే. ఏతన్తి ‘‘జతుమట్ఠకే’’తి ఏతం వచనన్తి. చతుత్థం.