౫. పఞ్చమసిక్ఖాపదం

౮౧౦. పఞ్చమే ‘‘అతిగమ్భీర’’న్తిపదం కిరియావిసేసనన్తి ఆహ ‘‘అతిఅన్తో పవేసేత్వా’’తి. ‘‘ఉదకేన ధోవనం కురుమానా’’తి ఇమినా ‘‘ఉదకసుద్ధిక’’న్తిపదస్స ఉదకేన సుద్ధియా కరణన్తి అత్థం దస్సేతి.

౮౧౨. ద్వఙ్గులపబ్బపరమన్తి ఏత్థ ద్వే అఙ్గులాని చ ద్వే పబ్బాని చ ద్వఙ్గులపబ్బం, ఉత్తరపదే పుబ్బపదలోపో. ద్వఙ్గులపబ్బం పరమం పమాణం ఏతస్స ఉదకసుద్ధికస్సాతి ద్వఙ్గులపబ్బపరమం. విత్థారతో ద్వఙ్గులపరమం, గమ్భీరతో ద్విపబ్బపరమన్తి వుత్తం హోతి. తేనాహ ‘‘విత్థారతో’’తిఆది. అఙ్గులం పవేసేన్తియాతి సమ్బన్ధో. హీతి సచ్చం. ‘‘చతున్నం వా’’తి ఇదం ఉక్కట్ఠవసేన వుత్తం, తిణ్ణమ్పి పబ్బం న వట్టతి, చతున్నం పన పగేవాతి అత్థోతి. పఞ్చమం.