౩. తతియపారాజికసిక్ఖాపదం

౬౬౯. తతియే అస్సాతి ‘‘ధమ్మేన వినయేనా’’తి పదస్స. పదభాజనం వుత్తన్తి సమ్బన్ధో. ఞత్తిసమ్పదా చేవ అనుసావనసమ్పదా చ సత్థుసాసనం నామాతి దస్సేన్తో ఆహ ‘‘ఞత్తి…పే… సమ్పదాయ చా’’తి. సత్థుసాసనేనాతి చ సత్థు ఆణాయ. కమ్మన్తి ఉక్ఖేపనీయకమ్మం. తత్థాతి సఙ్ఘే. ‘‘వచనం నాదియతీ’’తిఆదీసు వియ సఙ్ఘం వా నాదియతీతి ఏత్థ నాదియనం నామ నానువత్తనమేవాతి ఆహ ‘‘నానువత్తతీ’’తి. తత్థాతి సఙ్ఘాదీసు. అయం తావ సంవాసోతి సహ భిక్ఖూ వసన్తి ఏత్థాతి సంవాసోతి అత్థేన అయం ఏకకమ్మాది సంవాసో నామ. ‘‘సహ అయనభావేనా’’తిఇమినా సహ అయన్తి పవత్తన్తీతి సహాయాతి వచనత్థం దస్సేతి. తేతి భిక్ఖూ. యేహి చాతి భిక్ఖూహి చ. తస్సాతి ఉక్ఖిత్తకస్స. తేనాతి ఉక్ఖిత్తకేన. అత్తనోతి ఉక్ఖిత్తకస్సాతి. తతియం.