౪. దుట్ఠుల్లసిక్ఖాపదం

౩౯౯. చతుత్థే అత్థుద్ధారవసేన దస్సితాని దుట్ఠుల్లసద్దత్థభావేన సదిసత్తాతి అధిప్పాయో. ‘‘ధుర’’న్తి ఏత్థ లక్ఖణవన్తత్తా భుమ్మత్థే ఉపయోగవచనన్తి ఆహ ‘‘ధురే’’తి. ధురే నిక్ఖిత్తమత్తే సతీతి యోజనా.

ఏవం ధురం నిక్ఖిపిత్వాతి ‘‘అఞ్ఞస్స నారోచేస్సామీ’’తి ఏవం ధురం నిక్ఖిపిత్వా. అఞ్ఞస్సాతి వత్థు, పుగ్గలతో అఞ్ఞస్స దుతియస్స. సోపీతి దుతియోపి. అఞ్ఞస్సాతి తతియస్స. యావ కోటి న ఛిజ్జతి, తావ ఆపజ్జతియేవాతి యోజనా. తస్సేవాతి ఆపత్తిం ఆపన్నపుగ్గలస్స. వత్థుపుగ్గలోయేవాతి ఆపత్తిం ఆపన్నపుగ్గలోయేవ. అయన్తి పఠమభిక్ఖు. అఞ్ఞస్సాతి దుతియస్స. సోతి దుతియో ఆరోచేతీతి సమ్బన్ధో. యేనాతి పఠమభిక్ఖునా. అస్సాతి దుతియస్స. తస్సేవాతి పఠమభిక్ఖుస్సేవ. వత్థుపుగ్గలం ఉపనిధాయ ‘‘తతియేన పుగ్గలేన దుతియస్సా’’తి వుత్తం.

౪౦౦. పఞ్చాపత్తిక్ఖన్ధేతి థుల్లచ్చయాదికే పఞ్చ ఆపత్తిక్ఖన్ధే. అజ్ఝాచారో నామాతి అధిభవిత్వా వీతిక్కమిత్వా ఆచరితబ్బత్తా అజ్ఝాచారో నామాతి. చతుత్థం.