౧౦. సప్పాణకసిక్ఖాపదం

౧౪౦. దసమే ‘‘జాన’’న్తి గచ్ఛన్తాదిగణోతి ఆహ ‘‘జానన్తో’’తి. సం విజ్జతి పాణో ఏత్థాతి సపాణకం. ఏతన్తి ఉదకం. సయం జానన్తోపి పరేన జానాపేన్తోపి జానాతియేవ నామాతి ఆహ ‘‘యథా తథా వా’’తి. సపాణకం ఉదకన్తి కరణత్థే చేతం ఉపయోగవచనం, తేనాహ ‘‘తేన ఉదకేనా’’తి. పుబ్బేతి పథవిఖణనసిక్ఖాపదాదికే.

తత్థాతి ‘‘సిఞ్చేయ్య వా సిఞ్చాపేయ్య వా’’తిపదే. ధారన్తి సోతం. మాతికం పముఖన్తి మాతికం అభిముఖం. తత్థ తత్థాతి తస్మిం తస్మిం ఠానే. అఞ్ఞతో ఠానతో అఞ్ఞం ఠానం నేతీతి యోజనా. ‘‘సపాణకం ఉదక’’న్తి సామఞ్ఞవచనస్సపి విసేసే అవట్ఠానతో, విసేసత్థినా చ విసేసస్స అనుపయోజితబ్బతో ఇధ విసేసఉదకన్తి సన్ధాయభాసితత్థం దస్సేన్తో ఆహ ‘‘ఇదం పనా’’తిఆది. ఇదం పన న వుత్తన్తి సమ్బన్ధో. యన్తి ఉదకం ‘‘గచ్ఛతీ’’తిపదే కత్తా. యత్థాతి యస్మిం ఉదకేతి. దసమం.

భూతగామవగ్గో దుతియో.