౬. వత్తాదికణ్డనిద్దేసో

౯౬. ఉపజ్ఝాచరియవత్తఞ్చ, గమికాగన్తుకమ్పి చ;

సేనాసనాదివత్తఞ్చ, కాతబ్బం పియసీలినా.

౯౭. హత్థపాసే ఠితో కిఞ్చి, గహితబ్బం దదే తిధా;

గహేతుకామో గణ్హేయ్య, ద్విధాయం సమ్పటిగ్గహో.

౯౮. సఙ్ఘాటిముత్తరాసఙ్గం, తథా అన్తరవాసకం;

‘‘ఏతం ఇమం అధిట్ఠామి’’, తథా ‘‘పచ్చుద్ధరామి’’తి.

౯౯. ‘‘ఇమం ఇమాని ఏతాని, ఏతమ్పి చీవర’’న్తి వా;

‘‘పరిక్ఖారచోళానీ’’తి, తథా ‘‘పచ్చుద్ధరామి’’తి.

౧౦౦. ‘‘ఏతం ఇమం అధిట్ఠామి, పత్తం పచ్చుద్ధరామి’’తి;

ఏవం పచ్చుద్ధరేధిట్ఠే, చీవరాదిం యథావిధి.

౧౦౧. సఞ్చరిత్తం వినా సేసా, సచిత్తా గరుకన్తిమా;

అచ్ఛిన్నం పరిణతం హిత్వా, నిస్సగ్గియమచిత్తకం.

౧౦౨. పదసోధమ్మం దువే సేయ్యా, ఇత్థియా ధమ్మదేసనా;

దువే సేనాసనానీపి, సిబ్బనం చీవరస్సపి.

౧౦౩. పవారితం సురాపానం, పఞ్చసన్నిధిఆదికం;

జోతినుజ్జాలనఞ్చేవ, కప్పబిన్దుమనాదికం;

గామప్పవేసనన్తేతే, పాచిత్తీసు అచిత్తకా.

౧౦౪. పకిణ్ణకేసు ఉద్దిస్స-కతం హిత్వాఞ్ఞమంసకం;

ఏకత్థరణపావురణం, ఏకమఞ్చే తువట్టనం;

ఏకతో భుఞ్జనఞ్చాపి, నచ్చగీతాదిసత్తపి.

౧౦౫. అకాయబన్ధనఞ్చాపి, పత్తహత్థకవాటకం;

అచిత్తకమిదం సబ్బం, సేసమేత్థ సచిత్తకం.

౧౦౬. వీతిక్కమనచిత్తేన, సచిత్తకమచిత్తకం;

పఞ్ఞత్తిజాననేనాపి, వదన్తాచరియా తథా.

౧౦౭. పుబ్బకరణాదికం కత్వా, ఉపోసథప్పవారణం;

నవధా దీపితం సబ్బం, కాతబ్బం పియసీలినా.

౧౦౮. సమ్మజ్జనీ పదీపో చ, ఉదకం ఆసనేన చ;

ఉపోసథస్స ఏతాని, పుబ్బకరణన్తి వుచ్చతి.

౧౦౯. ఛన్దపారిసుద్ధిఉతుక్ఖానం, భిక్ఖుగణనా చ ఓవాదో;

ఉపోసథస్స ఏతాని, పుబ్బకిచ్చన్తి వుచ్చతి.

౧౧౦. ఉపోసథో యావతికా చ భిక్ఖూ కమ్మప్పత్తా,

సభాగాపత్తియో చ న విజ్జన్తి;

వజ్జనీయా చ పుగ్గలా తస్మిం న హోన్తి,

పత్తకల్లన్తి వుచ్చతి.

౧౧౧. పుబ్బకరణపుబ్బకిచ్చాని సమాపేత్వా దేసితాపత్తికస్స సమగ్గస్స భిక్ఖుసఙ్ఘస్స అనుమతియా పాతిమోక్ఖం ఉద్దిసితుం ఆరాధనం కరోమ.

౧౧౨. పారిసుద్ధిఅధిట్ఠాన-సుత్తుద్దేసవసా తిధా;

గణపుగ్గలసఙ్ఘా చ, తం కరేయ్యుం యథాక్కమం.

౧౧౩. చాతుద్దసో పన్నరసో, సామగ్గీ దినతో తిధా;

దినపుగ్గలకత్తబ్బా-కారతో తే నవేరితా.

౧౧౪. తయో తయోతి కత్వాన, దినపుగ్గలభేదతో;

తేవాచీద్వేకవాచీతి, నవ వుత్తా పవారణా.

౧౧౫. కత్తికన్తిమపక్ఖమ్హా, హేమం ఫగ్గునపుణ్ణమా;

తస్స అన్తిమపక్ఖమ్హా, గిమ్హం ఆసాళ్హిపుణ్ణమా;

వస్సకాలం తతో సేసం, చతువీసతుపోసథా.

౧౧౬. చాతుద్దసా ఛ ఏతేసు, పక్ఖా తతియసత్తమా;

ఞేయ్యా పన్నరసా సేసా, అట్ఠారస ఉపోసథా.

౧౧౭. ‘‘ఛన్దం దమ్మి, ఛన్దం మే హర, ఛన్దం మే ఆరోచేహీ’’తి ఛన్దం దాతబ్బం.

౧౧౮. ‘‘పారిసుద్ధిం దమ్మి, పారిసుద్ధిం మే హర, పారిసుద్ధిం మే ఆరోచేహీ’’తి పారిసుద్ధి దాతబ్బా.

౧౧౯. ‘‘పవారణం దమ్మి, పవారణం మే హర, పవారణం మే ఆరోచేహి, మమత్థాయ పవారేహీ’’తి పవారణా దాతబ్బా.

౧౨౦. ఆపత్తిదేసకేన ‘‘అహం, భన్తే, సమ్బహులా నానావత్థుకా ఆపత్తియో ఆపజ్జిం, తా తుమ్హమూలే పటిదేసేమీ’’తి వత్వా పటిగ్గణ్హన్తేన ‘‘పస్ససి, ఆవుసో, తా ఆపత్తియో’’తి వుత్తే ‘‘ఆమ, భన్తే, పస్సామీ’’తి వత్వా పున పటిగ్గణ్హన్తేన ‘‘ఆయతిం, ఆవుసో, సంవరేయ్యాసీ’’తి వుత్తే ‘‘సాధు, సుట్ఠు, భన్తే సంవరిస్సామీ’’తి తిక్ఖత్తుం వత్వా దేసేతబ్బం.

౧౨౧. వేమతిం ఆరోచేన్తేన ‘‘అహం, భన్తే, సమ్బహులాసు నానావత్థుకాసు ఆపత్తీసు వేమతికో, యదా నిబ్బేమతికో భవిస్సామి, తదా తా ఆపత్తియో పటికరిస్సామీ’’తి తిక్ఖత్తుం వత్వా ఆరోచేతబ్బం.

౧౨౨. ‘‘అజ్జ మే ఉపోసథో ‘పన్నరసో, చాతుద్దసో’తి వా అధిట్ఠామీ’’తి తిక్ఖత్తుం వత్వా పుగ్గలేన అధిట్ఠానుపోసథో కాతబ్బో.

౧౨౩. ద్వీసు పన థేరేన ‘‘పరిసుద్ధో అహం ఆవుసో, ‘పరిసుద్ధో’తి మం ధారేహీ’’తి తిక్ఖత్తుం వత్తబ్బం. నవకేనపి తథేవ వత్తబ్బం. ‘‘భన్తే, ధారేథా’’తి వచనం విసేసో.

౧౨౪. తీసు పన ‘‘సుణన్తు మే ఆయస్మన్తా, అజ్జుపోసథో పన్నరసో, యదాయస్మన్తానం పత్తకల్లం, మయం అఞ్ఞమఞ్ఞం పారిసుద్ధిఉపోసథం కరేయ్యామా’’తి ఞత్తిం ఠపేత్వా పటిపాటియా వుత్తనయేన పారిసుద్ధిఉపోసథో కాతబ్బో.

౧౨౫. ‘‘అజ్జ మే పవారణా ‘చాతుద్దసీ, పన్నరసీ’తి వా అధిట్ఠామీ’’తి తిక్ఖత్తుం వత్వా ఏకేన పవారేతబ్బం.

౧౨౬. ద్వీసు పన థేరేన ‘‘అహం, ఆవుసో, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా, వదతు మం ఆయస్మా అనుకమ్పం ఉపాదాయ, పస్సన్తో పటికరిస్సామీ’’తి తిక్ఖత్తుం వత్వా పవారేతబ్బం. నవకేనాపి తథేవ వత్తబ్బం. ‘‘భన్తే’’తి వచనం విసేసో.

౧౨౭. తీసు వా చతూసు వా పన ‘‘సుణన్తు మే ఆయస్మన్తా, అజ్జ పవారణా పన్నరసీ, యదాయస్మన్తానం పత్తకల్లం, మయం అఞ్ఞమఞ్ఞం పవారేయ్యామా’’తి ఞత్తిం ఠపేత్వా థేరేన ‘‘అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తా అనుకమ్పం ఉపాదాయ, పస్సన్తో పటికరిస్సామీ’’తి తిక్ఖత్తుం వత్వా పవారేతబ్బం. నవకేహిపి తథేవ పటిపాటియా పవారేతబ్బం. ‘‘భన్తే’’తివచనం విసేసో.

౧౨౮. చతూహి అధికేసు పన ‘‘సుణాతు మే ఆవుసో సఙ్ఘో, అజ్జ పవారణా పన్నరసీ, యది సఙ్ఘస్స పత్తకల్లం, సఙ్ఘో పవారేయ్యా’’తి ఞత్తిం ఠపేత్వా వుడ్ఢతరేన ‘‘సఙ్ఘం, ఆవుసో, పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామీ’’తి తిక్ఖత్తుం వత్వా పవారేతబ్బం. నవకేహిపి తథేవ పటిపాటియా ‘‘సఙ్ఘం, భన్తే, పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామీ’’తి తిక్ఖత్తుం వత్వా పవారేతబ్బం.

మూలసిక్ఖా నిట్ఠితా.

నమో తస్స భగవతో అరహతో సమ్మాసమ్బుద్ధస్స